Kuando empesa a akurtar los diyas i a vertersen las ojas de los arvoles, kere dizir ke otro un enverano ya esta para eskapar. Dianda ayer parese ke vinimos a la kampanya, ayer parese ke mos topimos kon amigas ke mos vemos solo enverano. Ke presto paso.
Dizen si pasa presto el tyempo, es ke paso ermozo.
Me akodro kuando era chika en estos diyas, mi papa me yevava al selihot i me diziya:
“Esta noche avla kon el Dyo, demanda todo lo ke keres i dizele ke te pardone si tyenes pekados”
Mos ivamos a media noche en aleskuro al kal, a la torna amanesiya. A mi me paresiya porke avli kon el Dyo, porke orasyoni i le demandi lo ke dezeo mi alma, ke se izo demanyana. De akel tyempo fin oy en diya, yo, avlo kon el Dyo. Esto me da pas a la alma.
Mi papa me ambezo munchas kozaz presyozas, me diziya:
“Da saludo kon el chapeyo ke tyenes”
“De otros no te seles”,
“Syempre vas a ser korekta”
Kijo dizİr ke erensya no es solo paras, kazas i moradas.
El mez Septembre es mes de atorgar, mez de pardonar, es verda ke el Dyo pardona ma mozotros yene no pekaremos, azeremos las mitsvas ke mos ordena la tora i no romperemos korasones.
Mozos los djudyos syempre estamos en un maraton. Vyene Roshashana azemos dulse de mansana, detras vyene Kipur, a la tomadura makaron ograten a la kortadura pan i azete i supa de gayna, detras vyene Sukot, vamos a la Suka komeremos uvas, oy no se lava es Oshana raba, oy no se aze echo es Simhat tora.
Una amiga non djudia, un dia me demando
“Kada mez tenesh un moed?”
“ Kada moed depende de komidas?”
Ven dale a entender deke no komemos uvas antes de sukot.
Va terminar kon una anegdot, entraremos al anyo muevo kon rizas.
Un merkader estava en viyaje afuera la sivdad. Kijo saver si ya esta todo beseder en kaza, avyo telefon dospues de sonar sinko sesh vezes avyo el guertelano:
-Alo
-Simon tu sos
-Si sinyor
- Deke no avres? Ay una ora ke esto sonando
-Se rompyo el mango de la paleta la estava adovando
- Deke se rompyo
- En akavando la tomba del perro
- Kualo! El perro se muryo?
- Si sinyor se kayo a la pisina
- El perro saviya nadar muy ermozo
- No aviya agua en la pisina se chafteyo la kavesa
- Deke no aviya agua? Yo la inchi antes de ir
-Salyo fuego i uvo menester de agua para amatar el fuego
- Fuego! ande salyo fuego?
-En el funeral de su mama uno echo un sigaro enbasho
- Mi mama muryo? No teniya nada
- Si ma kuando la vido a su mujer kon su amigo entimo Henry en la kama paso kriza de korason
- Henry? yabasta Simon yabasta te rogare dizeme una koza POZİTİF
- Devista sinyor
- Dize presto
- El la otra semana se izo un testo de AİDS
- Ya vino el resultado?
- Ya vino sinyor
- Dizeme una koza pozitif
- Bueno sinyor, salyo“POZİTİF”.
Vos sueto una anyada buena, kon sanedad, kon parnasa tova, kon rizas i kon gozos. SHANA TOVA.
Comments