Kada dia digo mas no kero ni oyir ni avlar de la gerra, porke me esta azyendo pena. Todos ya mos izimos politikos. Sin pueder azer nada.
Seya en la televizyon, seya en medyos de komunikasyon sosyal, no ay otro sujeto.
Kada diya tomo desizyon, ken me avlar de este sujeto lo va kortar kurto, ma no es posivle, afilu ke kero trokar la kestyon yene las palavras me vyenen a la boka, tanto tyempo ke tenemos keridos i mansevos gerreando, bivyendo en los refugyos no es posivle de trokar la palavra.
Ay un mez ke estamos en kaza, todas las aktividades de la komunidad djudia se anularon, aparte de la eskola ke no se serro. Poveretos, los elevos estan entrando a sus klasas kon panzeres, polises i guardadores. Las keilas se serraron mezmo bodas i barmitzvas se desharon a otras datas.
Me vino al tino los diyas de la pandemiya. Aviamos aparejado una kantika para el diya de la shoah ke se iva komerorar en zoom. “ELİ ELİ”.
No fue muy fasil de enrejistrar una kantika en kaza kon un telefon i kon un komputer. Ma para las damas del koro “NES” no ay difikultad, ya parvinimos.
“ELI ELI” en İvrit ( por siguro ke ya lo savesh) kere dizir
“Mİ DYO Mİ DYO”. Una kantika muy sentimental i en mezmo tyempo tyene una istorya muy enteresante de la eskritora de palavras, HANNA SZENESH.
HANNA SZENESH nasyo el 17 julio en el anyo1921 en Budapest, Ungaria, ija de un eskritor i periodista.
Hanna teniya un talento literal i kon esto empeso a eskrivir a un diaryo, des de 13 anyos fin unos kuantos diyas antes su muerte.
Su famiya fue asimilada, akeos anyos en Budapest aviya un antisemitizmo dezgrasyado. Kon este sentimyento, desho su pais ke nasyo i partyo por Erets Israel en el anyo 1939’i se enstalo en el Kibutz Sdot Yam. Ayi eskrivyo poezias i teatros sovre la vida del Kibutz.
En el anyo 1943, Zsenesh entro a la armada Ingleza i tomo una misyon de ayudar a los djudyos situados de la Evropa.
Tomo formasyon en Ejipto i se ambezo a saltar kon parashutes.
En el anyo 1944, salto a Yugoslavia i se izo a la una kon los partizanos de Tito por su idealismo. De ayi paso a la frontyera Ungara para salvar su puevlo ma malorozamente la polisiya la aferro. La torturaron la maltrataron ma eya no avlo ni dyo en mano a dingunos. Uno kuantos mezes dospues, en el ultimo djuzgado, kon grande koraje se defendyo eya mezmo sin avokato ma malorozamente el 7 novembre del mezmo anyo a los 23 anyos fue kondanada a muerte.
En 1950 fue yevada a Yerushalayim al simiteryo Monte Herzl.
Su diario i sus ovras literaryas se publikaron despues de su muerte. El mas konosido de sus poemas es “ELI ELI”. Un poema de kuatro versos
La melodiya fue kreada por Davit Zahavi i kantada por Ofra Haza i mas por munchas kantaderas.
“ELI ELI” se kanta kada anyo en el diya de la Shoah.
HANNA ZSENESH oy en diya es un eroe nasyonal en Israel.
Comments