(Teksto-Audio)
(Yazarı sesli dinlemek için tıklayınız)
El destino gloriozo de los djudyos sefaradís ke se establisieron en las tyerras otomanas durante los siglos XV i XVI, desparesyo kon tiempo sovre todo kon la kayida lenta del poder del rejimen otokratiko de Estambol en los territoryos evropeos del este, en los Balkanes i al este del reynado. Un grande deskaimyento se ve entre los djudyos durante los siglos XVII i XVIII ke bivieron en las sivdades portuaras, las mas importantes del Imperio tal Estambol, Salonika, Izmir, Aleksandriya, Tunis i mas.
Durante los siglos de sima i de dominasyon del mundo kristyano por el Imperio muzulmano, los djudyos ke fueron arondjados de la peninsula Iberika i mas después ke fuyeron de los progromes en Evropa vinieron en grande kuantidad a bivir en el reynado muzulmano sin dinguna kondisyon a la eksepsyon ke devian ser ovligados de respektar el Islam i pagar dasyos. Ansi el Imperio se izo la tyerra de azilo de los ke teniyan fey.
Los djudyos fueron achetados komo nasyon (millet) i eyos fueron en el empesijo establisidos en mayoriya en Estambol, Salonika i Sfad, aunke esta sivdad no era al bodre de la mar. En los anyos 1568, se pretendyo ke en estas 3 sivdades bivian kaje ventemil almas en kada una de eyas. Lo ke reprezentava un rekordo mondial para la epoka. Eyos ayudaron a los otomanos a dezvelopar armamiento moderno, a estableser industrias de techido de lana i azer komersio kon las kolonias djudias del norte de Evropa, del bodre del Mediteraneo i mizmo kon las de la India.
Los Otomanos después de la konkista de la Anatolia i de Estambol enkontraron djudyos ke avlavan grego, los kualos bivian en estos lugares dezde el tiempo de los Romanos. Los sefaradis en viniendo en grande kuantidad yamaron a estos djudyos ‘romaniotes’ los kualos apenas eran un punyado en Anatolia i en Gresya. Los romaniotes, mas de 70 anyos no kijeron asimilarsen kon los sefaradís i mizmo kontinuaron a tratarlos de konversos i ansi de no kos.huegrar kon eyos. En los anyos 1569, achakes del grande fuego ke kemo la mayoriya de las moradas de los romaniotes en la vieja parte de Estambol, eyos fueron forsados a achetar la ospitalidad de las organizasyones sefaradís de la sivdad i ansi a asimilarsen kon el tiempo i peryer sus identidad.
Los sefaradís en poko tiempo despues de sus estabilisimiento en diferentes sivdades del payis se organizaron libremente a krear sigagogas i institusyones laikas komo relijiozas, koza ke favorizo a los rabinos los kualos avian trayido las kustumbres de sus orijines. Estos chikos grupos kon el tiempo peryeron sus valores i es ansi verso el empesijo del siglo XVII se kreyo una uma uniforma. No olvidar ke las primeras imprimerias djudiyas fueron kreadas en Estambol en 1504 i en Salonika en 1513, koza ke ayudo grasyas a las publikasyones la uniformita de la grande komunidad.
Los djudyos en buenas kon los Djaniseros, en poko tiempo se izyeron los solos ke abastesieron el tichido de lana de la armada. En Salonika, en Estambol i en Sfad las industrias sefaradis fueron las mas grandes del reynado. El militar o el fonksonaryo turko no tenian muncha konfiyensa enverso los kristyanos otoktonos o evropeos i davan siempre la preferensia a los djudyos los kualos no tenían dingun atadijo kon los puevlos kristyanos, ke eran vistos por eyos komo inimigos. La klasa dirijente siempre dizia los djudyos sefaradís son muestros musafires, devemos tratarlos kon amabilidad. Se puede dizir ke en los siglos XVI i XVII la amisdad enverso los djudyos suvyo al pino. Kuando los Otomanos konkistaron la sivdad de Buda en la Ongaria se yevaron sefaradis de Estambol i kuando fueron forsados en 1686 de abandonar este payis los trusheron atrás. Es ansi ke durante una de mis vijitas a Budapest topi en el simeteryo de Buda antepasados de mi famiya Salti, koza ke me enkanto.
Dezde el empesijo del siglo XVII el Imperyo djunto kon sus djudyos empesa a deskayerse i este fenómeno durara fin a la fin del siglo XIX. Sovre la presyon de los imperyos evropeos, los Turkos piedren apoko apoko sus territoryos evropeos i ademas fueron ovligados a rekonoser derechos de kapitulasyon enverso la Fransya, la Austria, la Ingletierra i otros payizes. Entremientes estos mizmos payizes forman miembros otoktones de las minoridades gregas i armenas en sus eskolas i en evropa, koza ke falta a los sefaradís. Una mueva jenerasyon de negosiantes kristyanos es kreyada en Turkiya los kualos remplasan sistematikamente los djudyos. Si adjustamos a esto los dos evenimientos trajikos ke las komunidades suportaron kon el avanturizmo de Sabetay Sevi i la likidasyon en 1826 de los Djaniseros se entiende mijor deke una grande povredad i atrazamiento se dezvelopo entre los sefaradís. Ansi los djudyos peryeron sus industrias de lana i kon la kayida de Sevi los rabinos se enfortesyeron de manera a impedir el adelantamiento intelektual de la sosieta sefaradí.
Malgrado todo, verso la fin del siglo XVIIl la influensa de las muevas ideas de libertad i de dezvelopamiento komunitaryo fue grande en el Imperio i grasyas a el ayudo de las institusyones djudias evropeas, komo entre otras la Aliansa, una importante emansipasyon ampeso. Todas las komunidades, de una parte, del norte de la Afrika fina la sivdad de Bagdad i de la otra del norte de los Balkanes fin el Ayifto empesaron a dezveloparsen apoko apoko, ma en mizmo tiempo kon las muevas ideas se ve por la primera ves en tyerra muzulmana vinir el antisemitizmo evropeyo.
Durante el siglo XIX ampesa una mueva imigrasyon de djudíos ashkenazes de la Evropa del este, de la Rusia i de los Balkanes verso la Turkiya, ma demografikamente avlando, eya no tuvo ke muy poko efekto sovre las komunidades sefaradís, porke lo mas de eyos pasaron en transit para irsen a otros payizes ke los alikodavan entre otros, los de las Amerikas. I mizmo otoktonos sefaradís se puede dizir, tomaron el mizmo kamino.
Comments