Natan Levy no peryo munchos maches. El atlet de artes de boks, de 31 anyos, kada vez sale viktoriozo del ring. El atlet israeliano, izo un akordo kon Ultimate Fighting Championship, ke es la kompania de MMA la mas selebre del mundo.
Duspues de un mach el mez ke pasimos, en una konferensia de prensa, Levy respondio las kestiones sovre el komporto antisemit de Kanye West. “Kreygo ke la vida es muy kurta por aborreser, me esto adjideando de todas estas personas odiozas’’ disho Levy a todos los gazeteros. “I aparte de esto, Kanye West, si tiene un problema kon mi o kon mi djente, ke venga a verme, ermano”.
Levy sinyalo en este momento ke esta resiviendo muncho antisemitizmo en linea, ma esto solo lo esta aziendo sintirse mas orgoyozo de su erensia. “So judio, nasi judio. Esto muy orgoyozo de serlo i de gerreyar por esto, gerreyar por mi djente, kuando es menester. No tengo tolerensia por el antisemitizmo, no tolero dingun rasizmo”. El atlet disho ke no esta menazando West. “No esto yamando Kanye para un pleto. Solo le esto diziendo si tiene un problema kon mi o kon mi djente, ke venga a verme’.
Los dias dalkavo, duspues ke salyo viktoriozo de un mach de UFC kontra Genaro Valdéz en Orlando, Florida, su rekor jeneral profesional de MMA se izo 8 viktorias i 1 venzito. “Kuando lavoras muncho durante anyos, kuando vale la pena de esta manera i ganas un mach kontra el oponente de mas alto nivel, esto signifika ke tu lavoro esta dando sus frutas” disho el atlet.
Levy disho ke los judios del mundo entero deven de ser antrenados en el arte de la otodefensia. “Kreygo ke todos los israelianos, todos los judios del mundo entero deven de saver komo defendersen. No solo kuando son mansevos, deven de azer anyos de antrenemiento seriozo… mantenerse saludozo, ser kapache de defendersen de kualsiker ataka, kreygo ke esto es muy emportante.’’
Levy disho ke judo esta popular entre los mansevos israelianos. Israel tiene viktorias olimpikas en este espasio. “Muestro pais chiko optenio medalyas en judo, en taekwondo”. Kuando era un ijiko ke se estava engrandesio en Israel, Levy empeso a estudiar karate, aziendo antreman munchas oras al dia. Kuando teniya 18 anyos, se fue a Japon para estudiar mas muncho i a la fin gano una fasha preta en karate. Despues ke torno a Israel, Levy avrio djimnazios para anseniar karate a las kreaturas. ‘’Ma un dia me desidi ke keriya ser un atlet de MMA. Serri mi jimnazio i me fui a Las Vegas”.
Levy disho ke es probable que su proksimo mach profesional va ser en febrero. Kale ke de a su puerpo bastante tiempo para rekuperarse de su mach en Florida i duspues va ampesar a antrenar de muevo. El atlet israeliano, ke se kazo en 2019, estuvo biviendo i antrenandose en Las Vegas durante mueve anyos. Ma su pais de orijin nunka esta leshos de sus pensamientos. “Me plaze Las Vegas, el entrenimiento es perfekto. Ma Israel es mi kaza, Israel es ande kero engrandeser mis ijos i enviejeser”, disho Levy. “A la fin kreygo ke va tornar a Israel, ma en este momento kero konsantrarme en mi kariera, por esto tengo menester de estar aki.’’.
Comments