(Teksto-Audio)
(Yazarı sesli dinlemek için tıklayınız)
Israel , los terriotoryos arabos palestinianos i mizmo la medya internasyonala fueron sakudidos durante munchos diyas sovre la novela de los 6 prizyoneros aparteniendo a ogranizasyones teroristas, kon sangre en sus manos, ke fueron kapaches de eskabuyirsen de la prisyon de Gilboa en Israel a traverso un túnel ke kavakaron sin ke los guardianos serenden kuento. Ken se burlaron pensando a un epizodo de sinema, ken mirikiyozos , kedaron penserozos si estos rachas no miraran a atakar sivdadinos en sus momentos de libertad. En poko biervos, pasimos en Israel momentos tristes fin ke sintimos las novelas ke ya se aferraron por las fuersas de seguridad. Bien entendido en Gaza esta fuyida se fiesto kon orgolyo i manifestasyones fueron organizadas kontra Israel, el ‘okupante’. El Hamas, mizmo amenaza ke si una koza mala fuera echa kontra estos teroristos el esta pronto a atakar kon raketas i misiles a Israel.
Ma sovre este evenimiento trajiko, a ma umilde opinyón, devemos estudyar urjamente kon muncha perseverensya la situasyon del sistema juridiko i penal del payis. Esto devra ser komo en 1973 un alarme para espertar los politikos aktuales a ke metan orden i dan la importansa demenestoroza para ke el sistema de las prisyones sea modernizado sin mas asperar. Israel payis de alta teknolojiya tiene la kapachidad de atakanar i traer solusyones a los problemas de la seguridad en las prisyones.
El servisyo de las prisyones (IPS) anyos no fue del todo apuyado i es ansi ke oy es povre i inefektivo en su lavoro. Por ampesar de su personel ke la mayoriya son viejos de la polisiya o de Tsahal en las kualas no parvinyeron a avansar. No es sekreto ke la IPS acheto en sus kadros personel sin muncha kualifikasyon profesyonala, komo el kavzo del kapo de la intelijensya ke su formasyon de dentista no lo ayuda muncho en su lavoro. Ademas la IPS sufre de mankura de elementos i esta en difikultad de engajar personel muevo por diferentes razones. En el aktual kadro el 20 por sien del personel son de orijin druza – el mas alto persentaje entre las ajensias de seguridad -i sin remedyo el servisyo del personel ampeso a demandar el los formularyos de eskripsyon la religión del aplikante para mirar de kambyar un poko la demografya , koza ke inyierva los sirkolos druzes del payis. De otra parte malgrado ke los guardyanos son onestos i dedikados a sus lavoros, uvo entre eyos kavzos kriminales komo por echemplo una guardiana ke pasava drogas a un prizyonero.
En despartes del problem del personel, ay mankura de remedyos elektonikos modernos de kontrol komo los sistemas dijitales para depistar los prizyoneros. Enfin todos estos faktos i la grande neglijensa kavzo este insidente grave. Difisil de entender deke anyos las otoridades judisiaras no dieron importansa al sistema de enkarselamyento en Israel, i todas las tendesias politikas en sus programas nunka se okuparon de la kestyon. Dunke el kavzo esta en medyo, en riva de la meza i en los mezes a vinir el governo de Bennett devra absolutamente okuparse entre los problemas urjentes del futuro de la IPS si keremos tener un sistema bien organizado sin podridura en las prisyones.
En la kaye israeliana komo entre los djudyos en jeneral no se ve un entereso espesial sovre las prisyones. Istorikamente los djudyos mos espantimos de la idea de ser emprisonados, porke guadrimos en muestra memoria el maltreto ke milanyos, los goyim mos izieron en akuzandomos de kozas por las kualas no eramos kulpavles. Ademas en Israel la kantidad de kulpavles djudyos kometyendo aktos kriminales son relativamente pokos, por esta razón la mayoriya de mozotros no dimos importansa al sujeto. Ma, los kavzos de los prizyoneros de terorizmo devemos tomarlos kom muncha seryozita i ke kada uno de mozotros devemos organizarmos para azer presyon a los dirijentes de muestro payis a tener los ojos aviertos i organizar komo se deve la prisyon de alta siguridad. Mizmo la Otoridad palestiniana no vido kon un buen ojo los del djihad eskabuyirsen de la prisyon. Seremos konsyentes para ke Israel sea un payis kalmo i bien defendido.
Comments