(Teksto-Audio)
(Yazarı sesli dinlemek için tıklayınız)
La semana pasada se fiesto en Bale en la Suissa el 125en aniversaryo del sionizmo politiko pensado i dezvelopado por Hertzl i achetado por las komunidades djudias de 17 importantes payizes de la epoka. Los djudyos dezde 2000 anyos no mankaron nunka sus atadichos a la tyerra de Israel de la kualo fueron forsados de egzilarse. Basta de akodrar ke kada ombre djudyo en su dia de kazamiento repeta su promesa de no alvidarese de Yerushalayim i si esto será el kavzo ke sea kastigado.
Dunke no es korekto de dizir ke la primera konferensya de Bale fue la baza del renasimiento de la uma djudia i ke eya es el mirakolo ke se asperava, visto ke siempre el djudyo biviendo en kual ker parte del mundo no se alvido nunka de retornar a su patria i es esto lo ke yamamos ‘sionizmo’. Retornar a Sion, para kada uno de eyos era un eshuenyo ke devia ser un dia realizado, lo ke kreyo en la konsesya djudia la idea mesianika.
De otro lado es korekto de dizir ke el sionizmo politiko fue inisyado en Bale i ke dyo kon los anyos su fruto, komo lo avia pensado Hertzl el kual avia eskrito ‘en este kongreso se fondo Israel’. Komo se save, su profesia salyo djusta i 50 anyos despues de este primer kongreso se fondo el aktual Israel. En un siglo i un kurto Israel se izo mas de lo ke siertos vizyoneroz djudyos se asperavan, mizmo sus eshuenyos fueron depasados.
Oganyo la Organizasyon Sionista Mondiala dechizyo de komemorar este akto politiko de muevo en Bale, onde miles de reprezentantes de diversos payizes enjuntos kon los de Israel se renkontraron para dar un muevo konsepto al futuro de Israel, a sus dezvelopamentos ekonomikos, industriales, kulturales i mas. La idea prensipal siendo siempre de enkorajar a los djudyos de la diaspora de vinir a establisirse en Israel. No ay duvda ke esta utopia de los siglos pasados se izo realita, visto ke oy Israel esta en kamino de tener la majoriya de la uma djudia.
La demografía aktuala siempre en pujita mos da a vizyonar ke en los anyos 2031 la povlasyon djudia de Israel depasara los 9 milyones de almas. Kada anyo ke pasa las komunidades djudias de la diaspora en general se amenguan de sus miembros por kavza de emigrasyon o de asimilasyon ma por kontra la aliya verso Israel puja de anyo en anyo. Este anyo se aspera serka 50 mil imigrantes donde la mayoriya son de la Rusia, de la Ukranya de Los Estados Unidos i de Fransya onde biven grandes komunidades djudiyas.
Munchos anyos antes el gran rabino Lau de Israel avia vijitado la komunidad de Jenevra onde eramos serka 5000 almas. En una de la entrevistas ke tuvimos kon su eminensya, asentado en frente de mi, el avia demandado a los prezentes kaji unos kuantos de los dirijentes komunotaryos si aviamos merkado kaza o apartamento en Israel. Siertos avian respondido negativamente, sovre esto el se avia alevantado, avryendo los brazos, avia dicho a boz alta ‘Sinyores ke asperash, merka presto en estos diyas por ke pensó ke el Mashiah va vinir de vista, todos los djudyos se embarkaran para a Israel dunke no va kedar ni tyerra ni moradas para merkar’.
Kuando les konto este evenimiento oy en Israel, sovre todo a los mansevos rezin kazados, eyos meneyan la kavesa i kon tristesa me responden ke mizmo sin la vinida del Mashiah los presyos de los apartamentos i los del alkilo son tanto altos, ke no es kestyon de poder merkar i bivir en el sentro del payis.
Mira, a ke punto el sionizmo aktual se topa, todo no fue i no será miel i leche, munchos mos demandamos deke los dirijentes aktuales erev de la eleksyones de la Kenesset, no pensan i no deklaran una politika sosyala ke ayudara a muestra manseves ke da sus mijores anyos para la patria. El sionizmo politiko mos prometyo demokrasiya i igualidad, dunke las muevas jenerasyones sabras tienen el derecho de engrandeser sus famiyas en sus moradas i esto es una ovligasyon politika ke se deve respektar. Ademas el Sionizmo politiko mos prometyo ke el djudyo no sufrirá mas de espanto i de ambyertura. Pensaremos a estos faktos kuando votaremos en serka.
댓글