El agrikultor Oz Davidian risko su vida para salvar a los partisipantes del festival Nova, indo i viniendo 15 vezes al lugar del festival i yevarlos a un lugar seguro. “Mi solo arrepentimyento es no pueder salvar mas munchas personas’’ esta diziendo Davidian. “Komo bivimos en el sur, ya mos ambezimos a konoser los tipos de misilis i este fue una ataka inuzual”.
Oz mora sinko minutos del lugar del festival Nova. Kuando resivio un mesaj de WhatsApp para ayudar a los eridos, Oz disho a su famiya ke se esta indo, salio de su kaza i vido djente korriendo. Los yevo a un lugar seguro i empeso a konduizar de los kalejones. Los teroristos estavan konduizando en las kalejas presipales. Empeso a salvar a los mansevos ke rankotro en el kamino. Los ke salvaron empesaron a dar haber a sus amigos. Oz se fue direktamente a sus lugares. Oz les demando de eskrivir sus nombres en un papel. Mas duspues esta lista se konvertio a ‘La lista de Oz’. Esta lista pujo i pujo i se izo 120 personas.
Mas duspues, Oz disho ke era un miraklo de pueder salvar este karar de mansevos. Era inkreivle de pueder ir i vinir 15 vezes a la zona de la gerra. Los teroristos munchas vezes lo vieron i tiraron enriva de el ma el Dio lo salvo. ‘Me di kuento ke si no kontinuava, munchos de estos mansevos se ivan a ir al otro lado. No so relijiozo ma me kreo al Dio. “Los mansevos estavan seguros ke so uno de Mossad. No, les dishe so un sempl judio ke vino a ayudar.’ Kada vez ke Oz los konduizava a un lugar seguro, les diziya: “No mirej a la siedra, ni a la derecha. No keriya ke veygan las kadavras. Uno de los mansevos en la kamioneta kedo kompleteman sin palavras. Solo estava yorando. Yo estava mirando a kalmarlos, les di sigaras para ayudarles a relasharsen.
Enduna vido un ombre ayedado. El padre de un mansevo. El mansevo le aviya telefonado a su padre. El ombre konduizo asta el lugar del festival. Oz le disho ke se guadre, el lo iva bushkar a su ijo. Unos kuantos minitos duspues, Oz vino kon la kamioneta yena de mansevos. El mansevo salyo de la kamioneta i lo abraso a su padre.
Aviya sienes de kadavras i otos kemadas por todas las partes. No aviya nada para protejar a estos mansevos. No se puediya ver este modo de oror mezmo en los filmos. Oz vido un oto de polisia israeliana djusto al lado. Penso puede ser ke es un mediko judio ayudando a los ferridos. Oz les disho: ‘Ay munchos ferridos ke tienen menester de ayauda’. Kuando el ombre le respondio en arabo, Oz entendio ke no es un mediko ma ke es un teroristo. Oz akselero la kamioneta i se alesho de aya.
Oz bushko en los kampos siniales de vida. Vido kadavras esparesidos por todas las partes. Fin a la noche estuvo indo i viniendo al lugar del festival. ‘No teniya nada en la kavesa eksepto salvar mas munchos mansevos. Oz esta diziendo ke kada persona ke salvo agora es su ijo. ‘Son komo mi proprio ijo. Los kontrolo si estan buenos. Tenemos un grupo en WhatsApp i esto en kontakto kon todos. Mos reunimos de vezes en kuando. Munchos estan en terapia, i se estan aziendo buenos.
Dora NİYEGO
Comments