(Teksto-Oudio)
(Yazarı sesli dinlemek için tıklayınız)
En sinko diyas vamos a votar por demuvo para elijir los 125 deputados de la Kenesset, por la kuatrena ves en manko de 2 anyos. La povlasyon israeliana espera ke esta va ser la dalkavo i ke finalmente se podera formar un governo estavle, si no se asperara una sinkena votasyon koza ke los politisianos devran de mirar de guadrarse ke akonteska. Los sondajes mos ambezan ke el 80 por cien de los votos serán para los partidos de la derecha i el resto se partajara entre el sentro de siedra, la siedra i la lista araba. Kere dizir ke los partidos de la derecha si no miran de aunarse no va ver muevo governo visto ke no keren ser sosyos de Binyamin Netanyahu prezidente del Likud el kual sovre los dalkavos sondajes tenera lo mas de elijidos i dunke probavlamente sera nominado por el Prezidente Rivlin a formar el muevo governo.
A la eksepsyon de Naftali Bennett líder del partido Yemina, ke pode ser ke se ajunta kon Netanyahu(BIBI), Gideon Sa’ar líder del partido Mueva Esperansa el kual demisyono del Likud poko antes, Yair Lapid líder del partido Yesh Atid, Avigdor Liberman líder del partido Yisrael Beytenu ansi ke Benny Gantz líder del partido Blu i Blanko se deklararon ke nunka se ajuntaran a un governo formado por el líder aktual del Likud amenos ke el partido en kestyon achete de nominar komo kandidado un otro miembro del partido, koza ke no es del todo pensavle.
Dunke la derecha israeliana al seno de la Kenesset todo en tenyendo el monopol de la mayoriya, por kestyon de politika politisyana no podera dar apoyo a BIBI si el será nominado a formar el governo futuro. El Likud , lo 2 partidos relijiozos el uno sefarad i el otro ashkenaz i kon Yemina encuntos sin otro partido de la derecha, no tenera la mayoridad minimala de 61 deputados demenesteroza para resivir el voto de konfiensa. BIBI devra de tratar kon diplomasia a konveser su viejo konkorente Sa’ar a ajuntarse kon el visto ke la doktrina de su partido kon la del Likud son kaji la mizma. Toda las dos formasyones son sionistas, liberalas, revizyonistas sovre los prensipyos de Jabotinsky, Begin, Sharon i mas ke dirijaron el payis estos dalkavos 35 anyos. BIBI por la primera ves en su kampanya de propaganda se aserko de los arabos israelianos i miro a konverserlos a ke voten por el Likud. Kualo será el resultado lo asperamos kon kuryozita.
De otro lado la siedra israeliana kompozada por los partidos Meretz i Avoda i en partida del partido unido arabo no reprezentan ke una chika opozisyon a la derecha al seno de la Kenesset. Eyos por seguro no azeran parte de un governo futuro porke sus ideales son kontraryos i diferentes de la derecha . Espesialmente el partido unido arabo, ke por seguro va kitar 11 deputados, es una mesklatina de diferentes opinyones sosyalas, komunistos, sosyal liberales, ultra relijiozos se topan unidos solo por 2 faktores komunos, los kualos son defender los enteresos de los palestinianos i ser antisionistos. Solo una minoridad araba israeliana en partida asimilada, ancheandose den dia en dia, no vota por este partido. El partido Avoda kreado por Ben Gurion, durante 30 anyos dirijo el payis; Ben Zvi, Eshkol, Dayan, Rabin, Perez i mas fueron sus lideres, ma aktualmente esta en perikolo de dispareser. Grasias a su muevo líder Merav Michaeli va poder tener, se aspera mas de 4 deputados i pasar la linya del 3.25 por sien de la totalidad de los votos ke la ley demanda komo mínimo de elijibilita a los partidos.
El shabat pasado BIBI incho los 15 anyos de servisyo komo primer ministro del estado. 11 anyos i 347 diyas durante la eskaensa aktuala i 3 anyos i 18 diyas durante su primera eskaensa ke ampeso en Mayo 1996 i se eskapo en 1999. Esto representa muncho tiempo i pratikamente un israeliano de 25 anyos no konosyo, kon un intervalo de 9 anyos, ke solo a el komo primer ministro. Dunke BIBI estuvo a la kavesa del governo kaji el 20.5 por cien de la egzistensya de Israel. Ser primer ministro en muestro payis demanda a ser muy espierto i pensar 3 pasos mas adelantre de los otros dirijantes del mundo, tener la amabilidad de diskutir i negosyar kon eyos de igual a igual. Ademas siguir la prensa, tomar dechiziones justas en su tiempo, de dezvelopar la ekonomia i azer avanzar el nivel de vida del sivdadino. Mirar de tener lo mas poko konflikto militar kon los palestinianos, luchar kon diplomasiya kon el prensipal inimigo el Iran i mas i mas.
BIBI en un anyo fue kapache de trayer las ashlamas demenesterozas kontra la korona para todo el payis antes de la mayoriya de los payizes oksidentales i vaksinarmos a todos mozotros. Mizmo acheto a dar ayudo al inimigo palestiniano kon el kual siendo vizino, para guadrarmos de ser kontaminados los vaksinamos. Es verda ke las amistades kreadas por BIBI kon los grandes lideres del mundo komo Trump, Putin, Modi i mas son por el intereso del payis, porke i eyos pensan i se komportan de la mizma manera. No ay duvda mizmo ansi, se kere kreyado dialekto direkto, koza ke le reuche. Ansi mas de la mita de los votantes no keren ke BIBI se vayga a kaza, por ke tienen el espanto ke el ke lo remplasara no podara ser a su nivel en estos momentos kritikos en los kualos bivimos i sovre tanto no olvidar la amista ke el kreyo en la povlasyon kon su karizmo.
Ma la realidad es ke dinguno no es irremplasavle, BIBI va tener 71 anyo, es tiempo de deshar kon onor su lugar a un mas mansevo. Ma al kontrario de esto, todos los ke se izieron remarkar en el partido Likud fueron likidados por BIBI. Dunke el se topa oy solo i mira de rezistir a kedar en el poder. No es el solo ke ovra ansi, por echemplo el líder del Shas Arie Deri fue munchos anyos ministro, por mo de rovo estuvo en prizyon, torno, dainda es ministro i no tiene la intisyon de travarse i de irse a kaza.
Kaji munchos otros lideres están en mizma situasyon. De otro lado los mansevos no keren entrar en politika i trayer sangre mueva ke manka en el sistem politiko del payis. Por esta razón la konfiensa del pueblo en frente de la Kenesset i de los politisyanos kada dia se amengua mas, i dire ke los sondajes por esta razón muncho tiempo son yerrados, por ke la djente no kere dizir la verdad, por ken votar. De mi parte, vos dire keridos lektores eskrivir politika es muncho mas fasil ke de azerla en siendo politisyano.
Comments