Este anyo es el sukenta i segundo anyo del Masakro de los Olimpiates de Munich, del asesinato de onze atletes israelianos ke fueron tomados komo rehenes akeya noche. La polisia de Alemania Oksidental fue inkapache de savlar los rehenes.
El governo aleman realizo un servisio komemorativo en Munich, dias despues de ayegar a un akuerdo de kompensasion de 28 miliones de euros kon las famiyas de las viktimas i izieron una deklarasion rekonosiendo los yerros ke el "estado aleman" izo akel dia.
Durante anyos, las famiyas de las viktimas, endjuntos kon el governo israeliano, afirmaron ke Alemania no protejo los atletes israelianos.
A las 4 a.m. del 5 de Septembre, ocho miembros del grupo teroristo palestiniano saltaron a la villa olimpika ande estavan durmiendo los djugadores i entrenadores del ekipo israeliano. Mataron dos djugadores Moshe Weinberg i Yousef Romano porke estos dos atletes rezistieron a los teroristos. Los teroristos tomaron rehenes los mueve djugadores israelianos. Las prekosiones insufizyente de seguridad de Alemania permetieron a los teroristos de entrar fasilamente a los apartamentos de la villa olimpika. Tambien la komunikasion insufizyente i los polises sin eksperiensia kavzaron el kaos en la pista de aviones ke marko el final de la kriza.
Una deklarasion en el anyo 2012 afirmo ke Alemania fue enformada de un posivle ensidente teroristo semanas antes de los djugos. La deklarasion de Alemania amostro ke estos yerros izo pujar el shifro de kompansasion de 10 miliones a 28 miliones Euros duspues de entrevistas kon las famiyas.
El dia suivante, uvo una konfuzion entre los atletes no israelianos en el kampo. Los djugadores no supieron los detalios. Un miembro del grupo de teroristos ke tomaron a los israelianos komo rehenes aparesyo kon una maskara fasial en el balkon del apartamento. Durante oras, los detalios no se supo.
Los teroristos demandaron la liberasion de mas de 200 politikos palestinianos ke estavan emprizonados en Israel. Ma la primera ministra israeliana, Golda Meir, disho ke no va negosiar kon los teroristos.
Los teroristos demandaron de ser transferados a Kairo. Las otoridades alemanas peryeron munchas oportunidades para matar los teroristos o arestarlos en el kamino. Los otobuses yevaron los atakantes i los rehenes kon los ojos atados a varios helikopteres i duspues los yevaron a una baza aerea serka de Nato. Los tiradores sin eksperiensia se enstalaron en el lugar de akontisimiento ma no teniyan las korektas armas para tirar de larga distansia. Los vehikulos atados kon asistensia de apoyo kedaron atrapados en el trafiko en la baza; i los palestinianos deskuvrieron fasilamente ke el avion ke pensavan ke los iva yevar a Kairo aviya aparejado una trampa. Duspues de un kombate kon la polisia alemana, uno de los teroristos echo una bomba a uno de los helikopteres, matando a los israelienos ke estavan aryento; un otro teroristo tiro los israelianos ke estavan en el otro helikopter.
El prezidente del Komite Olimpiko Enternasional, Avery Brundage, desido de kontinuar kon el resto de los djugadores duspues de realizar un servisio komemorativo a la onor de las víktimas. El resto de la delegasion olimpika israeliana abandono Munich.
Dora NİYEGO
Comments