Kualo afita si un kardinal deskuvre ke su madre era judia? Segun la ley judia, el ke tiene madre judiya, se konsidera komo judio. La ermana chika del viejo Kardinal de New York, John Joseph O’Connor, en aparejando el arvole jenetiko de su famiya, deskuvriyo ke su madre era judia. ‘Bueno ke mi ermano no esta biviendo. Esta realidad lo iva dezrepozar muncho’ esta diziendo Mary O’connor Ward-Donegan. El Kardinal John Joseph O’Connor fue el arkobishopo de New York, desde el anyo 1984, asta su muerte en el anyo 2000. Su madre Dorothy muryo en el anyo 1971. Los O’Connors ya saviyan ke Dorothy se aviya konvertido al katolisizmo en el anyo 1908. Dorothy (Deborah Gumpel) era la ija de Gustavo Gumpel, un kasap kosher i rabino de la Kongregasion B’nai İsrael en Bridgeport. ‘En su korason, mi ermano teniya un amor grande por el puevlo judio’ esta diziendo la ermana del kardinal. ‘El teniya un respekto i fidelidad por los judios’. El Kardinal O’Connor era konosido komo un amigo de los judios de New York. El estuvo ariento del ekipo ofisial en el establisimiento de relasiones diplomatikas entre los dos paizes. ‘Kada vez ke mi ermano avlava del Olokosto, se le lagrimeyavan los ojos. Se sintio muy dezrepozado durante un viaje al kampo de konsantrasion de Dachau’ disho la ermana O’Connor. Mary O’Connor se enkanto muncho kuando rankontro la alkunya de la famiya de su madre en un simeterio judio en Fairfield, Connecticut, la propriedad de la Kongresion B’nai İsrael de Bridgeport. ‘No se deke mi madre no mos avlo de su pasado. Eya avlava muy ralo sovre si i su famiya. Tambien eya era una de las mas fidelas katolikas ke konosi yo. Se kazo kon mi padre duspues de dos anyos de su baptizmo. Su kamino a la eglizia katolika va kedar un sekreto en su korason’ esta diziendo Mary O’Connor. Duspues ke Mary O’Connor publiko este sekreto en un artikolo, la jenolojista deskuvrio mas muncha enformasion sovre la famiya del Kardinal O’Connor. El nono del kardinal, Gustave Gumpel, nasido en Prusia, emigro a los Estados Unidos. Deborah Gumpel era la mas chika de sus kreaturas. Las tres kreaturas de Gumpel desharon el judaizmo. Los desendientes de Gumpel estan kontentes ke este sekreto salyo en medio.
Comments