No se si vitej el filmo, o si meldatesh el livro ‘The Boy with the striped pyjamas’. La estorya es sovre el Olokosto, ma kontada de una forma muy diferente.
Bruno es un ijiko de mueve anyos ke se engrandesyo durante la Segunda Gerra Mondyal en Berlin. Segun el orden de Hitler, el padre de Bruno se ize komandante, i la famiya enterase van a bivir a "Out-With’’.
De la kaza de Out-With, Bruno esta vyendo un kampo ande ay ombres i mujeres kon pijamas reyes. Un diya, Bruno se desida de ver el kampo de serka. Se va fin al kampo ke esta anturado kon una baryera. En la otra parte de la baryera, rankontra un ijiko de su edad, ke se yama Shmuel. Bruno i Shmuel se izen amigos.
Kaje kada diya, Bruno se va a ver a su amigo i le yeva komida de kaza.
Un diya Shmuel le dize a Bruno ke su padre disparesyo, i no lo esta topando.
Bruno i Shmuel azen un plano para ke Bruno pueda entrar al kampo i ke puedan bushkarlo endjuntos. Shmuel le traye una pijama reye, i Bruno se kita los vistidos, se viste la pijama i entra al kampo. Duspues los dos, kon un grupo de prizioneros, empesan a kaminar. El grupo se esta indo a la kamara de gaz. Bruno supsona ke es semplemente un refujyo de la tormenta de afuera. En la kamara de gaz, Bruno le dize a Shmuel ke esta triste ke no lo puedyeron topar a su padre, i le dize ke el va ser su mijor amigo por la vida entera.
Unos kuantos diyas duspues, un soldado topa los vistidos de Bruno. El padre de Bruno se asenta allado de los vistidos i empesa a yorar.
Duspues de unos kuantos mezes, las tropas aliadas empesan a apanyar a los nazis. El padre de Bruno, sintyendose kulpozo, no se fuye, i se desha ke lo apanyen.
‘Todos mos paresemos, i no somos diferentes’ es el mesaje moral de la estorya. Un mansevo aleman se esta azyendo amigo entim kon un prizonyero judyo ke esta bivyendo en el orivle kampo de konsantrasyon de Auschwitz. Mezmo ke son de diferentes kreensyas relijyozas, i de tan diferentes sirkonstansyas, Bruno i Shmuel se azen amigos entimos. La baryera ke los esta separando es el sembol de los obstaklos relijyozos, sosyales i politikos ke estan divizando las personas en el mundo entero.
La baryera, la ambiyansa danjeroza del kampo de konsantrasyon, la diferensya entre los dos ijikos no son obstaklos por eyos. Una amistad inosante enflorese entre los dos.
La amistad de Bruno i Shmuel ke enflorensyo en medyo de un senaryo tan orivle, es el mesaje del ekrivano ke kere amostrar ke los obstaklos no son emportantes si ay kerensya i amigavle. Mezmo ke estan en una atmosfera tan negra, i mezmo ke estan vyendo la grande diferensya entre los dos, Bruno i Shmuel, de parte a parte, reushen a topar kalidades pozitivas ke los aze aserkar, i se konverten en amigos entimos.
El akto de Bruno, (vistirse la pijama reye i entrar al kampo de konsantrasyon), esta amostrando el kontrasto kon el mesaje de superyoridad rasyal i etnika propagada de los los nazis. Este akto kere amostrar ke dingunos no somos superyor de los otros..
Comments