(Teksto-Audio)
Por el Dr. Selim Salti
En la agada de pesah inchimos los vazos de vino i dizimos:” Este es el pan de la afriyision, ke komyeron muestros padres en tyerra de Ayifto” i kontinuamos a meldar el pasuk en dizyendo: ”al anyo el vinien en tyerra de Israel, este anyo aki siervos a Paro, al anyo el vinien en tyerra de Israel ijos foros”.
Imajinavos kediros lektores, ke dezde 20 anyos mi mujer me refuzava de vijitar el Ejipto tyerra araba en la kuala, pretendiya no sintirse byen. Enfin achakes ke amigos kerian vijitar este payis, eyos fueron kapaches de konverserla i es ansi ke mi eshuenyo se pudo realizar. Muy kontente, durante 10 diyas estuvimos kon kuryozita grande a ver los templos, las piramidas, las tombas de los paros i reyes de la epoka ansyana i vijitar el Kayro muzulmano kreado por los Fatimitos aryento de su fortifikasyon egzistente dainda.
El Ejipto aktual
Sovre mi perspektiva personal seve 2 Ejiptos, el riko ansyano i el povre de oy. 105 milyones de sivdadinos biven solo sovre el 6.5 % del territoryo total ke son los 2 lados del Nil i su delta vedre ke permete una agrikultura, siendo ansi el sentro de la vida umana. El resto del imensyo payis es arena i piedras. Bien entendido el dizyerto seko fue el lugar onde los ansyanos ejipsyanos mos decharon un trezoro arkeolojiko a la humanidad, sin igual. El payis aktualmente se mantiene por lo mas de las entradas del kanal de Suez i del turizmo. Egziste una industriya del koton i de metalurjiya ma por lo mas el payis importa su trigo i sus ekipamientos modernos.
La mayoriya de la povlasyon kaji el 70% es povre i mal edukada, del 30 % ke keda kaji el 10 % son los koptes kristyanos relativamente bien edukados ke representan la klasa borgeze del payis. La klasa dirijente a traverso la administrasyon nasyonala son los verdaderos patrones ke biven relativamente en byenser.
El Ejipto ansyano
Vinyendo al ansyano Ejipto vijitimos en primero las piramidas de Giza un diya entero i el muevo museo arkeolojiko del Kayro onde se ve objetos de kaji todas las dinastiyas, 34 ke bivieron i fraguaron templos majestuozos. Ademas se ve la ifluensa elenika i romana ke konkesto el payis ma ke respekto las tradisyones ejipsyanas del puevlo. Enfin kon la vinida del kristyanizmo en primero i del islam en segundo las kozas trokaron, la vida se izo diferente i los dyos antigus i las tombas de los paros fueron abandonadas. Las arenas mas de miles de anyos kuvyeron estos sityos ke en partida fueron sakeados (yagma) de sus valores, lo mas oro i piedras presiozas, ma malgrado los terremotos i las inondasyones siertos templos, obeliskes, las grandes kolonas kedaron enfuyidos fina el siglo 19. 100 anyos duro el lavoro arkeolojiko para redeskuvrir los templos i las tombas, i dainda este lavoro no se eskapo. Koza ke me paresyo estrano, fue de ver los templos de los paros, sus tombas, ma ni una de sus moradas. Entendemos ansina ke los ejipsyanos no davan muncha emportansa a fraguar moradas o mizmo palasyos.
Mas despues mos fuimos kon avión al sud del payis, serka del Sudan, a Asuan para ver los templos de la rejyon i mos kedimos en el palasyo ke el rey Fuad, fraguo serka de las ruinas, ke oy en dia es un otel a mil maraviyas al bodre del Nil. Naser kon el ayudo de los sovietikos dezvelopo el baraj de Asuan i ansi miles de kazalinos nubyanos fueron aronjados de sus lugares para engrandeser el lago ke yeva su nombre. Miles de nubyanos dainda se akodran del diktator kon dedenyo porke los desho sin tyerra fértil, los mando al dizyerto i no los ayudo a aresentarse komo se devia.
De poko de eyos ke renkontri me kontaron las sufriyensas de sus padres i la inimista ke egziste dainda kontra el Reis. Vimos en Asuan el templo de ‘Philae’, immensyo, konstruizido en la epoka elenistika ke el Unesco finanso su transfero de la rejyon del lago a una isla del lago, lavoro ke duro 20 anyos. Al diya siguente mos kaminaron kon una feluka a vela en el Nil onde vimos la isla onde esta enterrado el Aga Han i su mujer. Mas despues vijitimos el templo ‘Kom Ombo’ kitado del fondo del lago Naser i transferado sovre una otra isla, ovra de influensa romana. La Alemanya Federala finanso los gastes para salvarlo.
Viaje en el Nil
Salyendo de Asuan kon la nave Sonesta Star Goddess viajimos 5 diyas en el Nil, el tiempo estava fresko. Mos akostimos el primer diya en Edfu i vimos una maraviya de templo de la peryoda romana kaji en takto, sus torres de la entrada azyendo mas de 15 metros de altor kon una baza piramidala de 12 metros. En su tiempo, egzistiya una enorme puerta echa de sedre importado de la sivdad de Sidon en el Libano. Los templos jeneralmente fueron fraguados en forma klasik, en primero el sanktuaryo, onde solo los paros o los reyes entravan a azer sus orasyones, en sigundo la partida rezervada a los hahamim i a los miembros de la elit i enfin la tiersa partida ke es la mas ancha para el puevlo. Paro tomava su netila antes de entrar al sanktuaryo. Todas las paredes sea del sanktuaryo sea de los otros lugares i mizmo las kolonas fueron dekordas de los dyos de la epoka i eskritas sovre el paro ke fraguo el templo. Miles de paros reynaron en el alto Ejipto i reyes en en el payis entero durante la peryoda elenistika i romana. En la istorya se konta 7 Kleopatras i 6 Ramseses. El mas malo i sanguinaryo fue Ramses 3. Bivyo munchos anyos i no se eskanso de azer gerras. El azia kortar las manos i el seks de los kativos. Para poder kedar esklavo i no ser infirmo los ejipsyanos se azian berit, akto ke los protejava de ser ofrisidos a los dyos komo los kativos.
Despues de un dia de navigasyon arivimos a Luxor. Ayi estuvimos 2 diyas a vijitar los templos de Karnak i de Luxor. Diferentes de los templos del sud, estos fueron fraguados por los diferentes paros durante miles de anyos de stil diferente de los del sud kon sobryedad i simplisita. Las kolonas de los doredores son diferentes de las kolonas romanas i gotikas ke se ven en el sud del payis i ke fueron echas en forma de la flor lotus, simbol del Ejipto ansyano. Karnak es el templo dedikado al dyo ombre ‘Amon-Ra’, el mas grande del payis i kaji del mundo, kon una superfisiya de mas de 100 ektares, mizmo un chiko lago fue echo para poder tomar netila. Fueron fruagados munchos templos de padre paro para ijo paro, por lo mas oy en ruvinas. Entre eyos el de Ramses 3 esta dainda en buen estado. Ademas Ramses izo azer kolonas de 18 metros kon una baza de 4 metros de diámetro, inegualadas, en el templo de Amon-Ra, en la sala hipostil aryento de una chara de kolonas altas en forma de papirus. Karnak i Luxor son a 3 kilometros de distensya el uno del otro, egziste un kamino ke nomaron ‘la avenida del Sfinks’ yeno de estatuas.
Al diya fuimos a vijitar las tombas de las muevas dinastiyas en la vaye de los Reyes. Munchos de los paros i reyes arepetiendose de fraguar piramidas preferaron aparejar sus tombas al seno de las montañyas, lugar seko i mas guadrado. Es ansi ke en el empesijo de siglo 20 se topo un mabul de tombas, komo las de los Ramseses, de Tutankamun i mas. Vijitimos en 3 oras el de Ramses primer, del sejen i el del mas famoso, el treser.
La kuryozita la mas grande fue el ‘musoleo i el templo de la reyna Hatchesput’, ke fue fraguado ariento de la montañya. Eya fue la sola mujer ke dirijo el Ejipto durante 20 anyos, koza eksepsyonala, porke las mujeres no podiyan ser paro i para guadrar su sekso se metiya una barva pustiza i era vistida de ombre. Eya fue kapache de azerse enterrarse entre los ombres kuando la vaye para las reynas era en un lugar diferente. La tradisyon keriya, ke un paro del dia ke se suvyo al trono se ampesava a aparejar su tomba, es ansi los ke kedaron largo en el poder tuvieron mas grandes musoleos. Sin poder ver mas tombas desidimos visto la kanserya de tornar al otel Winter Palace de Luxor para reposarmos kaji 24 oras. La guerta de este otel fraguado en 1865 es una maraviya de ver. De los kuatros kantones del mundo trucheron i plantaron arvoles, flores, kaktuses de una ermuzura ke enkanta. No fuimos a la vaye de las reynas a ver las tombas de las reynas porke eramos muy kansados i el tiempo muy kayente.
Kairo
En tornando al Kairo kon avyon mos topimos en medyo de un trafiko imposivle. Oras tomo para yegar al otel Meridien del aeroporto. El diya de departo vijitimos el Kairo muzulmano aryento de una fortifikasyon echa por los Fatemitos shiites, bien konservada, onde se ve la influensa otomano en las fraguas i en las mishkitas ke vimos, ma la provedad de la djente era grande. El charshi era una kaleja larga de 16 kilometros yeno de djente. Merkimos suvenires para la famiya i tornimos la mizma tadre a Israel. Bendizeremos de tener Israel, de sentir su liberdad, su modernizmo i su rikeza, esto fue muestra impresyon del retorno.
Comments