Pokos son en muestros tiempos los ke investigan sovre el antisemitizmo de los islamistos, los kualos son nombrozos en los payizes arabos, en el Iran i mizmo en Turkiya, donde siertos de eyos enkavesan la administrasyon de estos payizes. Malorozamente kon los dalkavos evenementos entre Israel i el Hamas, el Hezbollah i el poder fundamentalisto de los mollah del Iran se remarka ke el vino a un nivel semejante de akel del nazizmo de los anyos 1930. Fuerza de establisir, ke el puevlo de Israel en este momento gerreya kon el Hamas, el Hezbollah i mizmo kon el Iran para defender su patria i el judaizmo mundial de una agresyon asasina de la parte de los muzulmanos dirijados por estos islamistos fanatikos, donde el buto es la eksterminasyon de la uma djudia.
En estudiando el sujeto vide ke istorikamente el anti-judaizmo no era del todo grande en los payizes arabos i mizmo en los muzulmanos i ke el djudyo konsiderado dimni devia ser protejado todo en siendo menospresyado. Ma kon el poder nazisto establisido en Alemanya i las konsikuensas del hitlerizmo, la Evropa dezvelopo a partir de la anyada 1930 un antisemitizmo de masakro kontra los djudyos. El antisemitizmo tomo el lugar del anti-judaizmo komo lo deskrivyo Friedrich Marr ke dyo a entender ke el anti-judaizmo, basado sovre la polemika relijioza ve ke todos los djudyos son ‘guerkos’, ma ke el antisemitizmo ve a ke todos los guerkos son djudyos. Estas ideas dezveloparon la Shoa i por esta razón oy el mundo sivilizado devra luchar para ke eya no se repete.
Se topan en Alemanya genizas yena de dokumentos konsernando las relasyones de la administarsyon nazista kon los lideres arabos de Palestina, Ayifto, Seudi Arabia, Iran i la Turkiya sovre la organizasyon komo likidar las komunidades djudias del Medyo Oriente, ke demostran klaramente komo el antisemitizmo nazisto influenso los dirijentes, la prensa i los medyos finansaryos de estos payizes. Poko son los ke se interesan a estos dokumentos i envestigan las reaksyones de los dijientes muzulmanos de la epoka sovre todo las del Mufti de Yerushalayim El Huseyini de negra memoria, del espanto de ser taksados de ‘islamofobia’. Ma la realita se esta viendo en muestros tiempos kon los diktatores shiitos ke djuran fina la muerte ser prontos a eliminar el djudaizmo del mundo. Imajinavos ke ay ke dizen si el atako del 11/9 sovre las torres de Nueva York fue echo es achakes ke los del Kaida la konsideravan komo ‘sivdad djudiya’.
Oy en dia el antisemitizmo evropeo i arabo es bien mesklado, uno de los lideres del Hamas Fathi Hamad avia dicho ay poko tiempo “devemos atakar a todos los djudyos del mundo espedasarlos kon el ayudo de Allah”. Esto no es dimilitud ke ordona de protejarlos i no es lo ke el Koran dize, sinon lo ke se ambezaron de las ideas nazistas a traverso la propaganda de la ermanda de los Ermanos Muzulmanos. Komo los nazistos munchos islamistos dizen ke kale eliminar los djudyos esta ves para poder salvar el islam de una destruisyon. El fondador del djihadizmo Salafi, Sayyid Qutb dishiplo de Hassan Al-Banna ke fue el fundador de la ermanda de los Ermanos Muzulmanos fue el ke enkulko en las kavezas de los mansevos arabos esta manera de pensimiento paranoyak dezde el empesijo del anyo 1951, ke seve oy en dia en Gaza, en el Libano, en el Iran i en siertos otros payizes muzulmanos. Mizmo antes ke Qutb ampese su lavoro, en el anyo 1937 fue publikado un foleto titolado ‘Djudaizmo i Islam’ onde se melda ke los djudyos miran de destruyir el Islam i ke esta echa deve ser empidida kon lucha si se kere ke el biva.
El tema del foleto prova klaramente el paralelizmo entre el antisemitizmo evropeo i islamiko. El foleto fue publikado sekretamente en el Agusto de 1937 para poder impedir a ke la komisyon Peel tome todo modo de dechizyon sovre la solusyon de 2 estados en Palestina. Komo se save la idea del partaje de la Palestina fue negosyada i achetada por los dirijentes sionistos de la epoka kon el Emir Abdullah i sus haveres. De su parte el Huseyini muftí de Yerushalayim lucho kon todas sus fuerzas kontra esta idea i el fue apuyado por el rejimen nazisto el kual era kontra el establesimiento de un payis para los djudyos lo ke yamavan el chiko ‘Vatikano Djudyo’. Mizmo en akeya peryoda sovre la influensa alemanda los antisemites arabos avian propajado la idea ke los djudyos kijeron matar a Mohammed el profeta.
Vinyendo a la retorika del Hamas, mos rendemos kuento ke siendo el ramo en Gaza de Los Ermanos Muzulmanos el no es diferente de la ke fue deskrivida aki ariva. En la Deklarasyon de su establisimiento, esta organizsyon terrorista bazandose sovre la tradisyon islamika deklara ke los arabos kombateran los djudyos in fine por la sovguardia del islam. Ademas es dicho en la Deklarasyon komo en el diskorso antisemito evropeo ke los djudyos todo en siendo espantozos son responsavles de todas las revolusyones del mundo, koza ke de una parte rende el djudyo fuerte, ma de la otra flako, lo ke mos aze pensar ke el antisemitizmo siempre foksyona en ekivoko.
Malgrado todo, mozos djudyos devemos ser optimistos i de mirar kon los arabos moderados de metermos de akordo i de purfiyar a ke los akordos de Avraam se renforsen. Mirar a ke en primero pas sea echa kon la Arabia Seudita, una vez el perikolo iranyano alechado. Tener esperensa para ke los arevatos retornenon a Israel i ke un muevo establisimiente palestiniano sea kreado kon el apoyo de todos los vizinos de Israel.
Dr. Selim Salti
Comentarios