La komunidad djudía de Bukarest, despues de 63 anyos, avyo sus archivos i enkontro fotografíyas de sus myembros djudyos, ke fueron matados en Estambol. Estas fotografiyas fueron enbiyadas a Turkiya a un miembro de la komunidad djudiya.
Cino Winter era un komersyante de samarras en Konstanta, Romaniya.
Este ofisyo de padre kon tyempo, lo engrandesyo i empeso a eksportar su byenes a los Estados Unidos, a Japon i a Turkiya.
En la primavera del anyo 1942, el tyempo de la sigunda gerra mondial, 22 soldados nazis, entraron a la sivdad Konstanta.
Munchos djudyos fueron enbiyados a los kampos de konsantrasyon de Terezin en Chekoslovakya.
La famiya Winter, fue eskondida por un papaz, kon la ayuda de la Eglisya.
La famiya Winter, alkilaron una barka i salyeron de Konstanta. Dospues de dos diyas i de un viyaje muy difisil, arivaron al porto Karaköy de Estambol i se enstalaron al otel “Pera Palas”.
Kuando fuyeron de sus sivdad, vinyeron kon munchas djoyas presyozas. De sorte para bivir empesaron a venderlas i kontinuar sus vidas.
Kon la ayuda de merkaderes Djudyos i Ermenis, vendyeron los oros en el gran bazar Kapalıçarşı.
Ma eyos teniyan espanto de Hitler ke ya estava pronto para entrar a Estanbol.
El servisyo sekreto Alman “ABWEHR”, ya aviya empesado a bushkar adresos de los djudyos ke biven en Turkiya, porke el protokol de Wannsee, adoptado por los nazis en Berlin, topo 11 milyones de djudyos ke biven en paizes de la Evropa i 55.500 djudyos en Turkiya.
Una demanyana, Suzan, Helena, Cino i Klara Winter salyeron a kaminar, ma malorozamente no tornaron al otel Pera Palas. Nunka se supo ande estavan.
En mezmo tyempo ke fuyeron de Romaniya, Jossi, Elesa i Jakob Goldberg no se toparon i en mezmo tyempo Simon Stern, Benjamin Morgenstern i Marek Morgenstern de Bulgariya no se toparon i no uvo dingun haber de eyos.
En estos tyempos, komo estos, munchos djudyos, desparesyeron misteryozamente en Estanbol. Nunka se toparon i dingunos no supyeron ken los mato.
Un myembro de la komunidad djudiya Turka, vido tombas misteryozas en la guerta del konsolato Alman en el sentro Tarabya. En la investigasyon ke izyeron, se noto ke tanbyen aviya un krematoryo en la guerta ke paresiya a los krematoryos de kampos de konsantrasyon de Dahau i Buchenwald.
Esta manera salyo a luz, despues de 63 anyos, ke los djudyos perdidos de Estanbol, fueron kemados u matados. El ambasador de Almanya en Turkiya VON PAPEN, fue djuzgado en el tribunal de kriminales de gerra en Nuremberg.
Los myembros de la komunidad djudia Turka, no kijeron akavar este sujeto i no se okuparon muncho. Ma los djudyos de Romaniya i Bulgariya estavan mas enteresados en este sujeto. 100.000 djudyos ke fuyeron de los Balkanes, biviyan en Trakya i Estanbol, la mayoriya de eyos fuyeron a Palestina (agora İsrael).
En las investigasyones toparon ornos para kemar djudyos i fotografiyas de estas famiyas i mezmo de djudyos ke fuyeron de Romaniya i desparesyeron. Ma las otoridades Almanas no dyeron dinguna eksplikasyon sovre este sujeto.
Digo komo syempre “NUNKA MAS”
Vos oguro una anyada buena kon pas i kon alegriya
SHANA TOVA U METUKA.
Forti BAROKAS
Comments