Kuando vyene la fin del mez de Mayo, ya empesamos a azer planos de ir a la kampanya i vakansas.
Este anyo, el mez de Mayo esta pasando byen yelado, fin oy en diya esta kemando los kaloriferes. Ma psikolojikamente empesamos a demandar kuando te vas a ir a la ada, ya alimpyates, este anyo no te vas a ir a Bodrum, a Çeşme, estas demandas no trokan.
Enverano veyo muncha djente ke no vide invyerno entero. De sorte veyo i karakteres diferentes.
Por siguro kada uno tyene una manya i yo a dingunos no tengo la ozadiya de trokarlos i de darles lisyon. Todos kesten sanos i rezyos ke bivan munchos anyos ma kuando ay personas muy kuryozas i empesan a demandar demandas absurdas no puedo suportar.
Ay anyos ke kontinuo a syertos kursos. Unos kuantos anyos antes me eskrivi a un kurso de “komunukasyon” (iletişim).
Kuando me eskrivi a este kurso (es ke no topi otro por pasar la ora) dishe kualo sera.
No vos vash a kreyer lo poko ke me fui lo muncho ke me ambezi.
Por emepsar me ambezi a sintir al denfrente, esto kale ke se ambezen munchas personas de mi puevlo, porke veramente no savemos oyir al denfrente. Por egzemplo empesates a kontar un sujeto de avion, ya te kortan la palavra, empesan a kontar un viyaje ke se fueron ventes anyos antes, kuando eskapan de kontar, ya te olvidas lo ke ivas a kontar.
Lo mas ermozo ke me ambezi, si no keres dar repuesta a una demanda, respondele kon una demanda. Esto me valyo muncho i lo empleyo syempre.
Por egzempyo te demando
“Ande testas indo”
no, le keres dizir, le vas a responder kon una demanda.
“Deke me demandates hanum”
No te puede responder porke no save dekes te demando, esta manera le das repuesta sin romperla i no le dizes ande te vas a ir.
Las lisyones estavan muy enteresantes ma komo aviya poka djente en medyo el invyerno el kurso se anulo.
Ay personas demaziya de kuryozas kuando empesan a demandar no vyene la fin de de las demandas. Tanto tyempo ke le das repuesta una demanda suiva la otra.
Agora riyeremos un poko.
El otro diya rankontri una konosida ke ay anyos ke no mos vemos. Ke haber komo estas ke desho ke tomo empeso a demandarme
-En la ada estas??
-Si
-En el otel??
-No
-Ande moras??
-En kaza!
-Tu kaza es??
-No
-Kon kira???
-Si
-Kuanto la tomates???
-Deke me demandates hanum?
Repuesta no ay.
-Tu ijo ke aze
-Kual ijo tengo dos ijos
-El kantador el ke esta en bodrum
(dande save ke esta en Bodrum si lo ve en la kaye no lo konose)
-Muy bueno
-No te vas a ir a bodrum
-No se
-No te vas???
-Ya me vo
-Tu ermuera no te yama??
-Deke me demandates hanum?
Repuesta no ay
-Invyerno ande moras? El ijo chiko kazado es? Tyene kriaturas? No vyene a la ada? Ken es tu ermuera? Tu ermuera lavora? Oy no tyenes djugo? Kualo djugas? Kon ken djugas?
A mi a poko a poko ya me vinyeron, le dishe kon una boz un poko ağra
STOPPP! Aspera un punto!
De vista kiti un papel i un kalem de la chanta
-Eskrivir vas? Kualo vas a eskrivir?
-Te dire kualo va eskrivir hanum, kualo keres saver, tu demandame a uno a uno, yo va eskrivir tus demandas, porke no esto puedyendo alkansar a darte repuesta.
Ayer la rankontri de muevo no me saludo.
Kedavos en las buenas oras.
Comments