El lunes fue la komemorasyon del varlik – una katastrofa ke afito a muestro puevlo. Esta ley dezgrasiada fue anulada en 15 marzo 1944, despues de kaji un anyo i medio. Durante este tiempo, las devdas fueron estimadas i los ke no puedian pagar fueron egzilados a lavoros forsados; la mayoriya en un kampo de lavoro forsado en el kazal Aşkale de Erzurum i endemas en Sivrihisar de Eskişehir, o otros kazales.
Por la memoria de este epizodio travmatiko, organizimos un panel online de dos keridos istoryanos de Avlaremoz. Ayşe Hür, una istoryana turka ke publiko munchos livros sovre ‘la otra istoria,’ fue la primera musafira. Eya ekspliko lo ke afito en 1942 asta 1944. Empeso en partajando munchos egzemplios del antisemitizmo en la prensa Istanbullia del enverano de 1942. El muevo primer ministro Saracoğlu era un gran rasisto i antisemito orguyozo.
Para el, la gerra mundial i la augmenta de sempatia por los nazis fueron buena okazyon por rovar los djudyos, gregos, i armenios de sus butikas, kazas, i realmente de todos sus bienes. En un sinyal importante de su nasyonalizmo de la sangre, la aplikasyon de ley inkluyo también los dönmes – los segidores de Sabetay Zvi, ke aviyan deshado el djudaizmo antes tres siglos. En su diskurso, Hür deskrivio la propaganda por la ley en la prensa Turka. Mientras ke los defendores de la ley estavan eskriviendo artikolos mentirozos, mas de vente personas se murieron en Aşkale.
Finalmente, las kritikas de un djurnalisto importante, Feridun Kandemir, i la retirada de los Nazis, konvensieron el governo de anular esta ley negra. Ma si en los anyos sinkuenta, Saracoğlu defendio su ley.
El segundo panelisto fue Ohannes Kılıçdağı, un istoriano armenio. En su diskurso, avlo de la memoria (o frankamente la dismemoria) del dezastre ke fue el Varlik. La kultura politika de la Turkiya no es una de enfrentar realidades de dezigualdad i violensia del estado ma una de inyorar i inyegar. Kılıçdağı pozo el Varlik komo solo uno de munchas illegalidades legales en muestro payis. No ay menester de dar egzemplos de la istoria o de oy: tenemos una montanya.
El disho ke munchas personas oy no tienen dinguna idea del Varlik, otras avian oyido ma no entienden la importansia, i un segmento de turkos saven el proseso i lo estan mirándo komo un afito pozitivo.
Tuvimos demandas despues de los diskursos i avlimos de las responsabilidades de aktores diferentes – personajes del governo, ombres de echo, negosyos – en los '40 i también oy en dia de avrir sus archivos. En la komunita djudia tenemos una tendensiya de maldizir solo El Sodro (İnönü) i alavar Atatürk i otros arkitektos de una mentalidad nasyonalista la ke eksluye los djudios.
En mi opinyon, este panel fue un sukseso i sirvio por akodrar a todos los Turkinos de muestra istoria i yene de muestro dia. Puedes verlo de este link: https://www.facebook.com/watch/live/?v=905642966920275&ref=search
Comentários