(Teksto-Audio)
(Yazarı sesli dinlemek için tıklayınız)
Syempre la nombro, mi madre diziya “palavra grande no avles hanum” muy djusto.
El anyo pasado me yamaron a un rolo de granmama para un filmo de kurtometraje, unos kuantos mezes dospues me vino una propozisyon de ser konsultante en la seriya ke konosej muy byen KULÜP “EL KLOB” i dospues me propozaron un chiko rolo. Todos me disheron no seya ke te vayas, en esta pandemiya, kon tanta djente ke echo tyenes, mezmo mis ijos. Ma yo no oyi a dingunos. Porke dishe esta manera una okazyon, vyene una vez en la vida. Konosi un mundo diferente, es verda ke ay anyos ke djugo teatros ma travar filmo es otra koza.
Lo mas ermozo eran las karavanas. La primera karavan era ambulans mos estavan azyento pcr. Kuando salyo negatif mos estavan yevando a la karavan de makyaj, dospues a otra karavan, la de kostumes, aya todo ya estava pronto kon nombre i alkunya, ken kualo se van a vistir. Kuando estas pronta, te estavan travando la foto i la estavan mandando al direktor, si ya estas beseder te estavan mandando al set. El set era aryento de una eglisya, una kaza vyeja de un papaz. Ma mas de djugadores aviya lavorantes. Los artistos de primer rolo, kameramanes, direktores de luze, el produktor, rejisores i un alay de figuranes. Una shena se esta travando mil vezes. Por delantre, por detras, por un lado por el otro lado. Una shena de espozoryo sureyo de las sesh de la tadre fin las syete de la otra demanyana, en akea shena yo solo di palmas. Kurto un echo de lokos i muy apenado, ma atorgare ke me diverti muncho i dishe bueno ke me fui.
En el entervalo se avyeron las eskolas i yo de vista empesi al kurso de musika turka ke ay 6 anyos ke me vo. Estava dizyendo de mi para mi, yo en estos luguares si no me ize covid mas no me ago. Ma dishe palavra grande, en estando en las vakansas, ni set aviya, ni kurso, ni kon dingunos me vide, malgrado esto aferri el virüs.
Bendicho el dyo ya se avyo los kaminos i tomimos haberes ke İsrael ya la kito a la Turkiya del kolorado. Todos de vista empesaron a merkar bilyetos de aviyon.
İzak ke bive en Batyam, oye ke ya se avyo los kaminos, le telefona a la madre ke bive en Estambol
- aloooo
- mama tu sos?
- si ijo de la madre komo estas?
- muy bueno. Mama kero vinir a pasar unos kuantos diyas en Estambol
- enriva la kavesa presyado. Te aspero a ojos a ojos
- mama ande me va echar
- la kamareta tuya esta para ti pasha
- tu i el papa ande vos vaja a echar
- en muestra kamareta de echar
- mama kero vinir kon mi mujer ande mos vamos a echar
- ya vos do la kamareta miya
- tu i el papa ande vos vaja a echar
- mos echamos en la kamareta de asentar, no te merikiyes
- mama keremos vinir kon los ijos…
- atyo los inyetos keren vinir maraviya los echamos i a eyos en la kamareta de asentar
- tu i el papa ande vos vaja echar
- no te penses mos echamos en el salon
- mama kere vinir i mi esfuegra ay lugar?
- es kolay pacha la echamos en la kamaretika chika
- mama kere vinir i mi esfuegro
- i tu esfuegrooooo???? Se echa en el mupak
- beseder…. enfin tu i el papa ande vos vaja echar
- ijo de la madre el papa no se…. ma yo me va echar por la ventana.
Comments