(Yazarı sesli dinlemek için tıklayınız)
Munças personas kuando diskuten por un sujeto, u enterpretan la koza, se konsienten en diferente sentimyentos. Kada persona tyene un dutrino de su famiya, por esto ke kada persona se komporta a su uzo. Kuando se rompe el korason, no se puede sentir komo antes, ala persona ke le rompyo el korason. No puede tornar a la situasyon de antes. No se puede aserkar a la persona ke se aravyo, komo antes.
Esta persona puede ser un sensero amigo, un paryente muy serkano, afilu entre los ermanos, u su ijo propyo. Unas personas, asperan la primera aksiyon ke venga de el de efrente. Para ampesar a las relasyones de nuevo, aspera en primer paso del de efrente.
Una mujer ke la konosko de munços anyos antes, me konto ke esta aravyada kon su ijo. Yo le demandi; “Deke?”. Me disho ke teniya problemas kon su elmuera, por este kavzo, el ijo se peleo kon su madre. Eya tanto se rompyo kon el, aviya tres anyos ke no se viyan i avlavan. Eya me disho, si su ijo no le demanda pardon, i se no se ekskuza kon eya, nunka va avlar kon el, asta la muerte.
Kuando yo le dishe a eya “Bushkalo tu a el. El es tu ijiko. Deke estas asperando para ke se ekskuze el? El meoyo ke venga de ti”. Ma eya preferada de murir, i no avlar kon el.
En fin, yo parveni para ke le lo bushke a su ijo. Eya kuando avyo el telefon i lo bushko al ijo , el mansevo se alegro muncho i ampeso a yorar. Le demando mil pardones de su madre, para ke lo pardone a el.
Este exemplo es,ke una persona,si alarga la mano por pas,a la fin de este jesto,nase solo una ganansya maraviosa.
Si la persona keda kon su furia, i asko, i no puede pardonar al de enfrente, las” chikas kesyones” se engrandesen munchamente a”grandes kesyones”.El kapricho le parese ke es una viktorya, para el ke se aravya, i se konsiente muy orozo. Ma esto no es justo totalmente. Se deve de saver ke el kapricho, no es el kamino de la felisidad.
El kamino de la felisidad, es deshar de juzgar al de enfrente, i alargar la mano por pas i amor.
Deshalo a el ke se alegre. Esto no kijo dizir ke tu sos incorrecto. Si das tu mano a el, todo se va entrar en su regla, i tu vas a tener la alegria de no pensar asko i vengansa. Kuando se alarga la mano de pas, la persona ke te rompites, se va konsentir de su yerro, i te va respektar a ti mas muncho.
Si esto no se puede realizar, deshad de enkonar. Porke tu ya izites el dover ke se deve de azer. Entontes te vas a estar mas trankilo i repozado.
Comments