Ke es la lisyon de la fiesta de Sukot?
Las personas se sienten en sekuridad kuando biven en la komodidad de sus kazas. Kuando viene Sukot, salimos de las paredes de muestras kazas i mos asentamos debasho de las estreyas. Kada vez ke entramos ariento de la suka, deklaramos muestra konfiensia al Kreador. Deshamos todas muestras uzansas, todo lo ke es muestro, i bivimos una semana en la Suka.
Deke azemos esto?
Esto lo azemos para ke no seamos arogantes, i ke no mos paraeska ke muestra alegria viene solo de muestras posesiones materiales. Kuando entramos a la suka, mos sintimos protejados en la prezensia del Kreador.
La prezensia del Kreador es una seguridad verdadera. La rikeza, los premios, la teknolojia, todo lo deshamos en kaza. Todo lo ke es emportante en la vida esta aki, en muestra suka debasho del sielo avierto. Muestras famiyas, muestros keridos, el tiempo ke vamos a pasar endjuntos, todo esta entre las paredes de la suka.
La suka mos permete de transmeter esta kreensia a las jenerasiones muevas. Deshamos todo lo ke es material, i eksperimantamos una alegria mas profonda. Realizamos ke mezmo si azemos esfuersos mas duros para obtener mas munchas kozas, para ser mas reushidos, no se puede garantizar nada en la vida.
En un mundo ande las kreaturas estan dezeando obtener mas, ande en lugar de pensar a los otros, todos estan pensando a si, Sukot mos da la oportunidad de konektar kon la espiritualidad, kon el Kreador, i kon la seguridad verdadera. Ansi, amostramos a muestras kreaturas, la alegria ke la persona toma da la espiritualidad.