En la semana de Shavuot ke pasimos, mi amiga Sara Kohen Yanarocak eskrivyo un artikolo (en turko) en parte titolado en espanyol: EL PAN DE LOS SYETE SİELOS (7 Kat Gökyüzünün Ekmeği) en el sitio de la Itahdut.
Iva eskrivir mi repuesta a este artikolo, i kontar por la deskusion ke tuvimos en Ladinokomunita 4 anyos antes sovre el sujeto del dicho pan, ma despues desidi ke mas emportante agora es darvos a konoser a Sara Yanarocak, si en kavzo no la konosesh, i notar mi apresyo de las kozas maraviyozas ke esta aziendo en estos dias ke estamos en kaza achakes de la maldicha pandemia.
Sara es talentuoza, savida, luzya, i de todo bueno, komo dizimos. (Guadrada de aynarah!) Eya i su marido David izieron aliya de Estambol a Israel si no me yerro kuatro anyos atras. Sus dos ijos, Soni i Hay Eytan, ya se avian enstalados en “la medina” de antes, i ya tenian sus famiyas ayi. Kada miembro de esta ermoza famiya sovresale en su talento, i tiene dono de muzika, i tienen ancho konosimiento en Israel i afuera. En 1993 Sara i David djuntos kon sus amigo Gerson Erdemanar formaron el grupo muzikal Erensya Sefaradi, kon Sara la vokalista, de kantikas en ladino. Lo mas de las kantikas de E.S. eran muevas kompozadas, kon biervos de Yusuf Altintas i muzika de David Yanarocak. Izieron munchas enrejistrasyones en audiokasetas i Cds, i agora podesh topar munchos de estas en Youtube. El grupo tiene dado konsertos en varios paises de Evropa i en Israel tambien.
Sara es tambien eskritora i autora en turko, i aze kozas de arte a mano. Por munchos anyos eskrivyo (i eskrive dainda) artikolos en el jurnal Şalom de Estambol. Tambien tiene publikado livros sovre la relijion i istoria djudia, i sovre mujeres djudias. El ke save turko, puede topar munchos mas detalios sovre su vida i sus lavoros en su blog Sarayanarocak.com.
Ma, komo dishe, lo ke vos kero kontar mas muncho es los maraviozos videos ke estuvo aziendo durante estos dias de “Korona” (para no dizir mas.) Munchos de estos son en turko, malorozamente para los ke no saven esta lengua. Por egzemplo, eya kontava la estorya detras de una o mas kantka antes de kantarla. Otra ves, eya djuntos kon su ijo Soni, i David akompanyando en la gitara, mos kantaron kantikas relijiozas en ebreo. Koza de tresalir! Ma ke no vos pareska ke no save espanyol! La entrevista – organizada por la Itahdut – ke izo kon Kobi Zarco fue sigida por mas de 7 mil personas! Dainda se puede ver en:
Si ya vitesh esta entrevista, ya entenditesh deke me agrada sintirla avlar, en kualkera llingua!
I esta semana, djugeves el 11 de djunio, demuevo vamos a tener este plazer, i mas, porke Sara i otras kuatro mujeres igualmente simpatikas i enteresantes, van a tener un SOHBET en djudeoespanyol en la pajina de la Itahdut de Facebook (Facebook.com/itahdut). Esto va ser a las oras 21:00 de Israel - azed el kuento de la ora ande vos topash. I si lo pedresh, espero ke despues el video va kedar en el sitio de la Itahdut.
Por “el pan de los syete sielos” vos eskrivo otra vez! Entre mientres, profito de esta okazion a rengrasyar a la Itahdut tambien por la buena idea de tener programas en djudeoespanyol. Dias buenos ke tengamos todos.