Deshando de pensar por el maldicho virus "korona" (leshos de mozotros ke este i al dip de la mar ke se vayga) ke ya mos troko la vida de todos, mos akodraremos agora un episodio de muestra istorya sefaradi, i un teksto ke se espandio unos anyos atras komo "La Repuesta de Abravanel", komo ya vo lo vo eksplikar.
Estos dias markamos el aniversaryo de un dia trajiko en muestra istoria: la ekspulsion de los djudios de Espanya kon el infame Dekreto de Alhambra (o Edikto de Ekspulsion de los Djudios) ke fue sinyado el 31 Marso, 1492, por "yo el Rey Fernando" ,"yo la Reyna Isabela," i "yo, Juan de Coloma, sekretario del Rey i la Reyna, ke lo eskrivi al nombre de muestras Majestades" (en mi traduksion al djudeoespnayol.) Si vos enteresa ver el teksto del Edikto en espanyol/kastiliano, anda a
https://www.ecured.cu/Edicto_de_Granada#Documento, i para su traduksion en inglez a http://www.sephardicstudies.org/decree.html .
El mes pasado (13 fevrero, 2020) muryo en Israel el doktor sefaradi-amerikano David Raphael[1], z"l, autor del livro (en inglez) "The Alhambra Decree" (1988) el primer romanso istoriko sovre la Ekspulsion de 1492, ke mos trusho a muestra imajinasion los dias i los personajes de este triste episodio.
El kapitolo 8 del The Alhambra Decree mos konta partikolarmente el dia ke se deklaro el Edikto de la Ekspulsion. Don Isaac (Yitzhak ben Yehuda) Abravanel, el bien estimado trezorero de los reyes, djuntos kon Abraham Senior el granrabino de kastilya, avian perkurado a konvenser a la reyna Isabela i el rey Fernando de dezvachearsen de arondjar a los djudios de sus reynado. Ma, komo ya savemos, no parvinyeron. En este dia del 31 Marso, fueron yamados al palasio de l'Alhambra en Granada, a sintir la la lektura del teksto del Dekreto, ya sinyado. Despues de esta larga lektura (el livro mos da la traduksion en inglez) se
alevanta Don Isaac Abravanel a dar su repuesta (pajinas 153-156.)
Yo le avia mandado el livro de David Raphael a mi ermano Selim enIsrael, i el traduizio la ermoza "repuesta de Abravanel" al djudeoespanyol i la mando a Ladinokomunita (la tenemos ayi en muestros archivos.) Vo la kopyo aki mas abasho a si keresh guadrarla en vuestros archivos personales. Solo vos rogo de markar los nombres de su autor i su traduktor.
Vos digo esto porke esta repuesta eloquente, ovra de la imajinasion i del lapis de David Raphael, se espandyo en varias linguas por Internet en los anyos pasados komo si fuera algun teksto autentiko del sinyor (o Don) Yitzhak Abravanel, sin dinguna mensiona de su verdadero autor. Tanto ke el artikolo sovre Isaac Abravanel en Wikipedia en inglez adjusto la sigyente fraza ke aviza el autor verdadero: The widely circulating Abarbanel's response to the Alhambra Decree is a literary invention in a fictional work The Alhambra Decree by David Raphael; it bears no relation to Abarbanel's actual thoughts and ideas.
Ma, aun kon esto, dainda ay munchos sitios ke lo tiene el teksto sin mensionar ni el autor ni el livro de ande aparese. Basta bushkar en Google "Repuesta de Abravanel" o "Abravanel's response" i veresh.
Aki la traduksion al djudeoespanyol de Selim Amado, z"l, de la repuesta de Abravanel a los "reyes katolikos" Isabela i Ferdinand (Fernando) por sus maldicho Edikto de ekspulsar los djudios, d el livro "The Alhambra Decree por David Raphael, z"l.
Sus Madjestades,
Avraham Senyor i yo vos rengrasyamos por la posibilidad ke mos es dada, de azer nuestra ultima deklarasyon despues del dekreto de ekspulsion , i esto lo azemos al nombre de las komunidades Djudias ke reprezentamos.
Kondes, dukados i markezes de la korte, kavalyeros i sinyoras…….no es grande onor kuando un djudio tiene ke tomar la defensia para la seguridad de su puevlo. Ma es una dezgrasia ayinda mas grande kuando el Rey i la Reyna de Kastilya i Aragon, en realidad de toda la Espanya, tienen ke bushkar sus gloria en arondjando del payis a un puevlo ke nunka le izo danyo.
Me es muy difisil de entender komo kada ombre Djudio, kada mujer Djudia i kada kriyatura Djudia pueden ser un menazo a la kreyensia Katolika. Esto es una akuzasyon muy muy grande.
Mozotros somos los ke vos estan destruyendo?
Es djustamente lo kontrario. Ya estash atorgando en el dekreto ke ovligatesh a todos los Djudios a bivir en kuartieres serrados, i ke nuestros derechos legales i sosiales fueron limitados, sin olvidar ke vozotros sosh los ke mos ovligatesh a tener ensima nuestros vestidos este sinyal de verguensa? Es ke no sosh vozotros los ke mos taksatesh de dasios ke mos ruinavan? Vozotros no sosh los ke moz terorizavan dias i noches kon vuestra inkizisyon diabolika? Ke me seyga permitido de dizirlo klaramente a los prezentes: Yo no vo deshar ke la boz de Israel seyga atabafada en este dia.
Por amor del Dio, Rey i Reyna de Espanya, vos demando ke me oygash a mi Yitshak Abravanel ke vos esta avlando! Yo i mi famiya somos desendientes direktamente del Rey David. Sangre de este Rey korajozo, sangre del Mashiah, esta koryendo en mis venas, i vo lo esto proklamando en este momento al nombre del Dio de Israel.
Al nombre de mi puevlo, ke es el puevlo de Israel, ke son los eskojidos del Dio, vos deklaro ke los Djudios son sin kulpa i son inosentes de todos estos krimenes eskritos en este dekreto de abominasyon i de desgusto.
El krimen, el pekado no son muestros, son vuestros, I sosh vozotros ke tenesh ke averguensarvos. Este dekreto ke estash deklarando oy va ser vuestra kayida i disparisyon. I este anyo, ke kreesh ke va ser el anyo de gloria la mas grande de la Espanya, va ser el anyo de su mas grande verguensa.
Segun ke la onor es la rekompensa de la virtud para una persona, para los Reyes I Reynas es la buena fama ke l
os azen meresidos de ser kualifikados de nobleza.
Kuando una persona aze aktos de averguensar i de malonestiya, el piedre su buena reputasyon. De mezmo, kuando Reyes i Reynas azen aktos insolentes i krueles ke son de averguensar, de eyos para eyos se kavzan el mas grande danyo. Segun es dicho, mas grande es la persona ke se yerra i ke kulpa, mas grande es el yerro i la kulpa.
Yerros i kulpas, si son rekonosidas sin tadrar, pueden ser korijidos. Akeya piedra ke se despego de una pared i amenaza la fragua , puede ser metida a su lugar i renfuersar la fragua. De mezmo, un dekreto ke fue anonsado por un grande yerro puede ser anulado si no se piedre tiempo. Ma la ambisyon relijyoza izo ke se piedra la razon, i el konsejo malo kavzo ke el djuzgamiento este tuerto i pervertido. Serkamente el yerro de este dekreto sera irreversible, no se podra tornar atras de las indjustisias ke el dekreto proklama de azer.
Si, Rey mio I Reyna mia, ke me oygash bueno: grande yerro, yerro vuestro, yerro profundo i sin ke se pueda adovar, yerro ke la Espanya no tiene visto asta oy. Vozotros, i solamente vozotros sosh responsables. Segun ke las armas mezuran la fuersa de una nasyon, ansi los artes i la literatura muestran la sensibilitad I la valor de un puevlo. Verdad, fuitesh kapaches de venser i arebashar al infidel Musulmano kon la fuersa de vuestra armada, i ansi provatesh vuestra kapachedad en el arte de la gerra.
Ma kualo se esta pasando en vuestras kavesas? En vuestra manera de pensar? Kon ke derecho van vuestros Inkuizitores a kada kazal aleshado i keman miles de livros en las flamas delantre del publiko? Ken es ke les esta dando el poder a los papazes vuestros ke keren agora kemar la imensa biblioteka Araba en este grande palasyo de los Moros kon los manuskriptos de la mas grande valor? Kon ke derecho, kon ke autoridad? Por ke? Es por ke vozotros les datesh esta autoridad, Rey mio I Reyna mia.
En las onduras de vuestros korasones, se ve ke no tenesh konfiensa en el poder de la saveduriya, de la konosensia. Tenesh konfiensa solamente en el poder de la fuersa.Ande mozotros Djudios, las kozas son diferentes: Mozotros Djudios respektamos i amamos imensamente la sensia, la konosensia. En nuestras kazas i en nuestros lugares de orasyon, el limud, el embezo, la instruksion, es nuestra pasion de vida entera, es el korason de nuestra ekzistensia, I segun nuestros hahamim, es la razon por la kuala fuimos kriados. Nuestro imenso amor por el embezo, por la konosensia, podrian ekilibrar vuestro amor egzajerado por la fuersa. Mozotros uvyeramos profitado de la proteksion ke mos ofresen vuestras armas realas, i vozotros podriash ayinda mas profitar del progreso de nuestra komunidad i del ekskambio de konosensias kon mozotros. Vo lo esto dizyendo: podriyamos ayudarmos uno al otro.
Segun ke vozotros mos akodratesh kuanto mozotros Djudios somos sin el poder de la fuersa, ansi vuestra nasyon va sufriir del dezekuilibro de las fuersas ke estash metyendo en aksion.. En los sieklos ke van a vinir, vuestras jenerasyones futuras van a estar pagando karamente vuestro yerro del prezente. Porke es el poder de las armas ke admirash lo mas muncho, podresh ser una nasyon de konkerores, koryendo detras del oro i podresh arevatar munchas rikezas, una nasyon ke bive sovre su espada i ke domina kon su punyo.
Ma en mezmo tiempo vash a devinir una nasyon de inyorantes, vuestras eskolas i lugares de ensenyamiento, kon el espanto de ser kontaminados por las ideas de otros payises i otros puevlos, refuzan de saver lo ke se pasa, i ansina no seran mas respektados. Kon el tiempo, akeya grande fama de la Espanya se trokara en un payis sin fama i ke entre las nasyones diran: Espanya, este payis ke devino un povre inyorente, Espanya ke prometyo tanto ma ke izo tan poko.
I kuando un dia la Espanya se va demandar: ke es lo ke mos akontesio? Porke las otras nasyones se riyen de mozotros? I los Espanyoles de akel diya van a mirar a sus pasado i se van a demandar: porke esto mos arivo? I akeyos ke son onestos van a apuntar a este diya i a este anyo komo el empesijo de la kayida de sus nasyon. I ke la kavza de la kayida son no otros ke sus reyes Katolikos Fernando kon Isabella, los konkistadores de los Moros, los ke ekspulsaron I arondjaron a los Djudios, los ke fundaron la Inkuizisyon, i los ke destruyeron el dezeyo de saver de la nasyon Espanyola.
Este dekreto es el testimonio de la flakeza del Kristyanizmo. El amostra ke mozotros Djudios somos kapaches de venser a los siglos, segun es dicho en las dos relijyones. El dekreto eksplika por ke razon ekzisten "Kristyanos falsos" , kere dizir Kristyanos ke sintyeron ke sus kreyensia esta sakudida por los argumentos del Djudio ke save muncho mas ke el. El dekreto eksplika tambyen por ke la nasyon Kristyana se siente tan firida, segun esta dicho. Keryendo azer kayar a la opozisyon Djudia, la mayoridad Kristyana desidyo de no diskutir mas, i le fue mas fasil de eliminar este manadero de kontra-argumentos Djudios ke aflakavan la kreyensia Kristyana.
Esta es la ultima okazyon en tierra de Espanya de bien eksplikar nuestra kavza. En estos pokos i ultimos momentos de libertad ke me fueron akordados por el Rey I la Reyna, I en mi kualidad de portaboz del Djudaizmo de Espanya, vo insistir sovre un punto de nuestra diskusion teolodjika. Me vo apartar de vozotros kon un mesaje , mezmo ke no vos va plazer. Este mesaje es muy simple: el puevlo historiko de Israel, segun se konstituo tradisyonalmente, es el solo ke puede djuzgar a Jesus-Yeoshua, i su pretension de ser el Mashiah. El Mashiah es el ke tiene la funksion de salvar al puevlo de Israel, i es al puevlo de Israel de desidir si ya esta salvado o no. Nuestra repuesta, la sola repuesta ke podemos dar es la sigyente: Jesus fue un Mashiah falso.
Todo tiempo ke el puevlo de Israel bive, todo tiempo ke el puevlo Djudio lo refuza de akseptarlo a Jesus-Kristo , vuestra relijyon nunka puede ser akseptada komo verdad. Podesh konvertir a todos los puevlos I a los salvadjes del mundo, ma todo tiempo ke no reushitesh a konvertir al Judio, no provatesh nada, lo ke supitesh azer es konvenser a los ke no saven ni konosen nada.
Mozotros vos vamos a deshar kon nuestra konosensia, vozotros podresh a kontinuar kon vuestra fuersa, mozotros somos los ke estamos mas serka de la verdad. Vozotros podesh azer de las personas djudias lo ke keresh, lo ke no podesh azer es trokarmos nuestras santas almas i alesharmos de la verdad historika ke solo mozotros la konosimos.Ke oygash, Rey i Reyna de Espanya, de este dia en delantre azesh partida de la lista de los ke pekaron kon los desendientes de la kaza de Israel. Si es ke keresh destruyirmos, vash a kedar kon vuestro dezeyo, por ke reyes I imperadores muncho mas poderozos miraron de dar fin a mozotros, i ninguno de eyos reusho. I ke sepash ke mozotros vamos enfloreser en otras tierras leshanas de aki. Ande vamos a ir, el Dio de Israel va estar kon mozotros. I kuando a vozotros, Rey Fernando I Reyna Isabelle, la mano del Dio vos va alkansar i vos va kastigar por vuestra arogansia I por la duresa de vuestro korason.
Vozotros tenesh ke pagar muy karo por este pekado grande. De jenerasyon en jenerasyon se va kontar i repetir I kontar komo vuestra kreyensia estuvo sin respekto I kuanto vuestra vizyon estuvo siega. Muncho mas de vuestros aktos de aboresimiento i de fanatizmo, el mundo se va akodrar del koraje del puevlo Djudio ke estuvo kon su onor enfrente del poder del Imperio de Espanya, tomando su fuersa de la fey ke eyos herityeron de sus padres, ke rezistyeron a vuestros menazos I a vuestras mentiras.
Mos estash arondjando, ekspulsando de esta tierra ke amamos no manko ke vozotros. Ma ke sepash ke mos vamos akodrar de vozotros, Rey i Reyna de Espanya, segun nuestros livros santos se akodran de todos los ke kijeron nuestro mal. Mozotros Djudios siempre vamos a mirar kualo es ke la Espanya estuvo aziendo en las ojas de la historia, i la memoria de nuestras sufriensas va ser muncho mas danyoza para vozotros ke del danyo ke keresh azermos a mozotros.
Mos vamos akodrar de vozotros i de vuestro malorozo dekreto de ekspulsion siempre i siempre.
---
Dedikado a la bendicha memoria de mi ermano Selim Amado, z"l, i a la del Dr. David Raphael, z"l, dos ombres intelektuales sefaradis ke trusheron onor a muestro puevlo.
[1] David T. Raphael era doktor radiologo, graduado de la Universidad de Washington en Seattle, i aktivo en la vida sefaradi de la sivdad. Se dediko tambien a la investigasion de de la istoria sefaradi, eskrivio i publiko 4 livros en inglez en este sujeto, i produsio un filmo yamado "Song of the Sepharadi." El livro The Alhambra Decree fue traduizido tambien al espanyol. Detalyos en: http://www.carmihouse.com/
[1] David T. Raphael era doktor radiologo, graduado de la Universidad de Washington en Seattle, i aktivo en la vida sefaradi de la sivdad. Se dediko tambien a la investigasion de de la istoria sefaradi, eskrivio i publiko 4 livros en inglez en este sujeto, i produsio un filmo yamado "Song of the Sepharadi." El livro The Alhambra Decree fue traduizido tambien al espanyol. Detalyos en: