La semana pasada kuando eskrivi mi artikolo kreo ke estava yeno de emosyon porke me olvidi de eskrivir un alay de kozas.De ke me olvidi? Kreo ke la primera razon es el nombre de byervos ke devo de eskrivir. Si eskapi STOP porke tenemos despues problemes. Ke devemos de azer para publikar la oja kon todos sus artikolos? Paso una semana; ma no vemos syertas kozas ke se estan amejoreando. La mizma koza en la China. I desgrasyas en syertos payizes Evropeos. Mi opinion es ke los payizes Evropeos ke tyenen una situasyon mas mijor ke los otros payizes deven de tomar mas importantes prekosyones para impedir esta edpidemia. Kreo ke no ay munchos paizes ke keren el mal de la Italia. Ma el payiz ke tyene mas munchos problemas en este kampo en la Evropa es la Italya. La koza la mas desgrasyada fue ke el Papa fue atakado por este virus. Komo es posivle una koza asemejante? Un personaje tan emportante devia de ser protejado i no devia de tener kontaktos kon la djente i devia de azer su echo en la ventana de su posto ke ve la Plasa San Pietro. Ke echo tenia de saludar la djente tomando sus manos?
I malorozamente buen karar de elevos ke meldan en las universidades de la Italia tornaron a Turkiya. I agora al lugar de kedarsen en sus kazas, estan sorreteando por aki por aya. Serraron las eskolas fina el 15 de Marso.
El segundo problem es en la Persia. El ayudante del ministro de la Sanedad en una reunion de prensa estava sarnudando i kon su rida se estava alimpyando su sudor kada dos puntos. El diya sigiente se echo al ospital porke estava atakado por el Virus Corona. El no era el solo. Savemos ke dos ministros i mas de sinko deputados Persianos estan en el ospital. Los responsavles Persyanos dizen ke los Amerikanos los atakaron kon este virus. Es djusto o no, no lo se ma es una posibilidad.
Ay munchas teorias ke dizen ke los Amerikanos izyeron esto toda para dar danyo a los Chinezos. I meldamos en syertas revistas ke los Chinezos estan aparejando un plano para atakar los Estados Unidos. No mos plaze las gerras porke syenes i miles de soldados son matados kon las armas ke son fabrikadas oy en diya. Esto es klaro. Ma si las otoritades ke dirijan los payizes empesan a azer las gerras kon Viruses asemejantes kreo ke va ser una desgrasya.
Se esta avlando ke en munchos kampos la sola produksyon se realiza en China i no en otros payizes. Ke desgrasya. La moneda i la ganansya no deve de ser el solo buto en el mundo. Si una koza emportante esta solo en la mano de una nasyon, esto es una desgrasya. Si es los Chinesos ke kultivan todas las frangulas (frezas) del mundo, no es una desgrasya. No vamos a komer dos mezes o tres anyos frangulas. Ma si no vamos a pueder topar uno o dos pedasos de una araba i si devemos fraguar una mueva fabrika para estos dos elementos guay de las fabrikas de arabas! Esto se deve programar.
Ya kero eskapar mi artikolo en dandovos un buen haber. En primero estan dizyendo ke los Israelyanos toparon el vaksino de este virus ma estan lavorando ensima. El sigundo haber es ke estan dizyendo ke este virus no puede mas bivir despues del mez de avril; kon la pujita de temperatura. Ma no se si es el empesijo o la fin. El mas grande danyo va ser por las firmas de aviones, de kruzes ke me estan embiyando tures kada diya, no a un presyo rezonable ma muy barato, i de los oteles. La djente no estan viyajando mizmo por echo si no es una koza muy importante. Espero ke vos va eskrivir un otro artikolo sovre este sujeto kuando no vamos a tener mas menazas de este Virus.
Kaynak: Silvyo OVADYA/Şalom