100 anyos de konflikto entre Israel i los arabos turara eternelmente pretenden los politisyanos en el oksidente i en el mundo musulmano. La razon ,el deke i el porke se eksplika ke el mundo no se uzo dainda a ver Israel payis independiente de los djudios fondado kon la volonta de un puevlo antiko menospresiado a ser igual a los otros puevlos del mundo. El prejudisyo es inkreivle i la inimista enverso de el es imensa.
Todos los payizes ke azen parte de las Nasyones Unidas tienen el derecho de defender sus sitadinos ma Israel no. Kuando el se defende supito lo atakan en no rekonosyendole dingun derecho de defensia. Todo modo de juzgo es kontra el porke en la baza la inimistad verso la nasyon djudia mas o menos egziste en la konsensya de la mayoriya de los goyim.
Tomaremos en konsiderasyon los atakos kon roketas del Hamas i del Cihad Islamisto. Ke keraran o no keraran Israel es un payis independiente ke tiene el derecho de defenderse en sus tyerras onde biven los djudios. Estas organizasyones terroristas kada nada bombardan las lokalitades del sud de Israel, mandando sienes de roketas ke grasyas a su alta teknolojia militara Tsahal (armada nasyonala de defensia israeliana) las notraliza. Devez en kuando una de eyas se fuye i kavza danyo, fiere o mata personas , kreando panika i trauma en las kreaturas chikas. Ma esto no ez el resultado ke los terroristas asperan, el buto siendo de derrokar Israel, en matando lo mas de djudios posivle.
Ken rekonose este derecho al Hamas i al Cihad Islamisto en la chena internasyonal sin pensar dos vezes? Komo estas organizasyones terroristas pueden tener razon? Ke ekskuza valivle les permete de atakar Israel? Ande esta la lojika de los manaderos antisemitas ke dizen ke en estos atakos israelianos no fueron matados. No es justo, no es ke no fueron matados ma ke los inimigos arabos no fueron kapaches de matarlos. Ademas siempre ke unos dos israelianos fueron matados en Gazza se distribuyo dulsurya i se organizo fiestas de alegría.
Kualo es el buto de este jinero de komporto? Simplemente ke Israel achete sin responder a abokar kavesa i a no defenderse. Eske esto es posivle i achetavle? En jeneral por siguro ke no, ma kuando se trata de Israel si!! Basta meldar la prensa evropea para ke un djudio israeliano se revolte i demande justisya sovre los artikolos onde Israel es akuzado de todos los pekados de la tyerra!!
Dingunos no se enteresan al suerte de los arabos palestinianos ke biven en los payizes del dorredor de Israel . Eyos durante anyos fueron masakrados por sus ermanos arabos en la Jordania, Libano i Siria ke nunka no los kijeron en sus payizes. La kantitad de muertos palestinianos en estos payizes son tanto ke mos demandamos deke la umanita demokratika i pretendiendo ser justa no kritika la atitud de los arabos ke degoyan sin skrupulo mizmo a sus ermanos, komo lo ke se pasa dezde 9 anyos en Siria.
Un punyado de djudios ke transformaron el dizierto en un payis prospero i demokratiko en medyo de una mar de diktatores arabos sanginaryos, de miseria,de islamizmo i de korrupsyon, komo puede ser ke persiste su egzistensya, koza irreel? Para la mayoriya de los dirijantes i los intelektueles evropeos esto no es achetavle, ademas ke Israel no solo es una forte fuerza militar ma un elemento ekonomikamente adelantado ke se dezvelopa grasias a su technolojia. El selo i el dezeyo los kitan de sus kavezas i ansina gritan al ‘skandal’.Se alvidan ke la tyerra santa es tyerra de mirakolos i ke Israel es un mirakolo.
Kualo pensar i dizir kuando la novela de 100 kristyanos son espedasados en el Pakistan tiene manko popularita medyatika de un teroristo matado kuchiyo en su mano en Yerushalayim? Deke una injustisya echa a un palestiniano en Yehuda i Shomron resive vente vezes mas de eko en la prensa del oksidente sovre lo ke esgolma los tibetianos, los tamoules, los kristyanos del sud de Sudan, los indianos del Guatemala ke todos son masakrados sin pekado ?
Deke sin falta siempre Israel seya akuzado ¿ Eske esto es un paravan del viejo antisemitizmo evropeo? Sin duvda, sino 7 milyones de djudios israelianos no seran responsables de las sufriensas de los arabos en jeneral. Ma se alvidan ke 2 milyones de arabos israelianos biven en Israel, tienen derecho de votar i eskojen libremente sus deputados a la Keneset. Miles de palestinianos son melezinados en los ospitales israelianos. Sienes de mansevas kon velo estudian en la universita de Yerushalayim i tienen los mizmos derechos de la mansevas israelianas ke tienen la obligasyon de azer mas de 2 anyos de armada.
Si mos permetemos de dizir todas las verdades sovre Israel esto siguro ke mos trataran la mayoriya de los goyim antisemitas de ser miembros del Mosad o apartener a un lobi de una organizasyon sionista o de ser rasistos. .