Kualo de mas nesesita el governo de Israel para azer achetar Yehuda i Shomron komo proprieta del puevlo djudio a los negasyonistos evropeos?
Durante los días pasados amigos i lektores me preguntaron mas informasyones i eksplikasyones a este sujeto, ke avia analizado en estas kolonas en mi artikolo de Novembre pasado. Esta semana sinti el menester de tratar el sujeto de muevo, para aklarar mas faktores esensyales.
La konferensya de Paris de 1919 i la de San Remo de 1920 establisyo en el Medyo Oriente los payizes siguentes a saver: La Siria, el Lebano, el Irak, la Jordaniya i Israel. En mizmo tiempo se desidyo de las frontieras de estas antitades por las kualas la konumidad internasyonala i los sitadinos de estos payizes las achetaron ken kon disatisfaksion, ma malgrado esto komo final a la eksepsyon de las de Israel. Ansi fue kreado el ‘Mandat Inglez’ onde su ovligasyon komo prometido durante la konferensya, era de permeter a los djudios de vinir establisirse en sus ‘Kaza Nasyonal’. Todo el territoryo palestiniano inkluendo Yehuda i Shomron devia azer parte de este establesimyento.
Ma malorozamento todas las desiziones tomadas en San Remo no fueron aplikadas durante munchos anyos. Una de eyas fue la proprieta de Yehuda i Shomron. El prezidente Trump dalkavomente demando a ke se aplike el derecho de la apartenesya de estos territoryos a Israel. En los anyos del Mandat en frente de la ksenofobia araba el derecho para los djudios de vinir i morar en Palestina no fue aplikado tal i kual del todo komo espesifiado en el mandat. A la fin los djudios de la Palestina guerreyaron i fondaron Israel en 1948, ansi obteniendo el derecho internasyonal de establisir sus Kaza Nasyonal . En la lucha de indepensia los hashemites jordanianos okuparon los lugares sakros del djudaizmo i Yehuda i Shomron. La primera koza ke izieron es de aronjar de estos lugares a todos los djudios i esto turo fin 1967 data a la kuala Israel konkisto los territoryos i permetyo a la povlasyon djudia de pueder establisirse libramente sin ninguna intervansion de su governo. La mayoriya de la komunidad internasyonala no acheto esta mueva situasion i deklaro ke los akordos viejos son kaduk i ke los djudios no tienen derecho de vinir establisirse en estas tyerras achetadas komo ‘konkistadas’. Tuvieron i tienen dainda la ozadia de demandar del governo israeliano a ke no ayga infiltrasion ebraika en esta parte de Israel!
Kon un retardo de 100 anyos salyo un lider oksidental, el prezidente Trump, ke desidyo de dar razon a los israelianos en demandado a ke las desiziones finales tomadas en San Remo i supozadas aplikables por la Liga de Nasyones sean respektadas oy en dia. Trump en rekonosiendo Yerushalayim komo kapitala de Israel i su sekretaryo Pompeo deklarando ke las lokalidades djudias de Yehuda i Shomron no son illegalas reprezentan un entendimiento legal del mandat dado a la Liga de la Nasyones. Trump fue el primer lider oksidental a salir kontra el chantaj de los arabos i a no sotometerse en las Nasyones Unidas a sus demandas injustas. De la deklarasyon del sekretaryo Pompeo sovresale klaramente ke Yehuda i Shomron pueden ser morados por los djudios sin ninguna limit.
Keda de demonstrarles a los septikos evropeos ke el memo juridiko del amerikano Hansell de 1978, en el kual Israel es akuzado de ser un okupante de tyerras palestinianas, ke magrado ke no fueron nunka apartenido a una antitad palestiniana i ke no fueron konkistadas de un payis independiente . Lavoro bien difisil. Ajustaremos ke la Jordaniya okupo en 1949 esta partida de la Palestina ke nunka izo partida de su territoryo transjordaniano i ke kon el akordo de 1994 kon Israel este payis acheto de fakto ke Yehuda i Shomron azen parte de Israel. La juridiksyon del mandat de la Liga de Nasyones dunke prevale.
En una sigunda akuzasyon Hansell en su memo azyendo referensia a la kuatrena konvansyon de Jenevra deklaro ke Israel aze transfer de povlasiones en Yehuda i Shomron. I esto no ez verda porke los 300.000 arabos biviendo en estos territoryos en ninguna manera no fueron aronjados. Tambien Israel payis demokratiko no forsa a ningunos de sus rezidentes a ir a bivir en Yehuda i Shomron, eyos se aresentan aya de sus propyas inisyativas, lo mas, idealistos sionistos, ke nada los empide de bivir ande les gusta. No se puede dunke de avlar de un transfer forsado de personas komo era el kavzo en el Imperio Otomano onde los sultanes para povlar los payizes konkistados ovligavan a kazales enteros de musulmanos komo de minoritaryos kristianos o djudios de ir a bivir ande desidavan los vizires. En despartes de esto, ningunos de los payizes evropeos protestaron el transfer de turkos ke se establisieron i se establisen en el norte de Chypro akuzando la Turkia de kontravenir a la konvasyon de Jenevra, visto ke eyos son liberos de sus aksyones.
Espero ke un dia esta kestyon de Yehuda i Shomron va topar su solusyon definitiva en favor de Israel porke la rejyon es muy stratejika de punta de vista de defensia de Israel.