LOS DJUDIOS DE ESPANYA
KOMO ENSHEMPLO I MODELO
PARA EL DJUDAIZMO DE ALMANYA EN EL SIGLO 19
Verso la metad del siglo 19, la situasion de los djudios de Almanya se avia mijorado konsiderablamente, en konformidad kon la atmosfera de liberalizasion ke se avia espandido en Evropa. Una de las konsekuensas de este dezvelopamiento fue ke esta komunidad bushko a krearse una mueva identidad, mas konforme al esprito de akeya epoka.
Munchos de los eskritores, intelektuales i personalidades sentrales del djudaizmo alman de entonses empesaron a bushkar un muevo modelo sovre el kual podrian bazarsen, en sus esforsos para lograr esta mueva identidad. La konkluzion kaje jenerala fue ke no podia aver mijor modelo ke el de los djudios de Espanya, antes de sus ekspulsion.
Sovresalieron de entre los ke se dedikaron a esta tarea, de krear una mueva identidad komunitaria, los eskritores i eruditos Leopold Zunz i Graetz ke apartenian a la eskola liberala, ansi ke lideres del djudaizmo neo-ortodokso komo Phöbus Philippson i su ermano Ludwig.
Zunz i Graetz ke fueron de los lideres del “Wissenschaft der Judentum” (sensia del djudaizmo) dezeavan ke los djudios puedan bivir en Almanya en yena libertad, ma manteniendo sus kultura i relijion i kontribuyendo a la vida sosiala, politika i kulturala sin sentirsen ovligados a konvertirsen. El mijor enshemplo ke toparon, el modelo mas adekuado para esta identidad, era el de los djudios de Espanya asta la ekspulsion de 1492. E n efekto todo en siendo una minoria firmemente atada a su relijion, eyos reusheron a ser un faktor muy importante en la vida sosiala, poltika i kulturala de Espanya. No solo esto sino ke eyos lograron tambien alkanses impresionantes komo mediatores kulturales entre los arabos i los kristianos: eyos fueron un faktor desizivo en la transmision de las ovras sientifikas de los arabos de El Andaluz a la sosiedad kristiana de Espanya i a toda la Evropa, pozando ansi las bazas del Renasimiento ke vino despues.
A este sujeto fue eskrito en el livro Sephardim. Romanische Poesie der Juden in Spanien (1859)del investigador de la kultura sefaradi Moritz M. Kaiserling, ke la kolaborasion entre los djudios,arabos i kristianos de Espanya “…reusho a transformar a este paiz, ruinado por toda una seria de konfliktos internos, en un sentro de investigasiones seriozas i de pensamiento klaro i inspirado”. En baza de esta kolaborasion, adjusto el, se dezvelopo en Espanya una atmosfera kreativa ke permetio a la istoria djudia de devenir parte integrante de la kultura evropea.
Esta konsepsion sovre el djudaizmo de Espanya, komo modelo a imitar por los djudios de Almanya, no kedo en el sirkolo limitado de Zunz, Graetz i otros mas. Eya empeso a ser difundida por medio de ovras literarias tambien: romanes, kuentos kurtos, poezias i mas. Uno de los livros ke tuvieron mas difuzion i fueron mas populares al seno de los djudios de Almanya es el livro Die Marannen de Phöbus Philippson ke trata no tanto de los djudios de Espanya sino ke de los anusim, ke bushkan a fuir de este paiz i topar refujio en Italia, Holanda i otros lugares mas..
El apunta tambien, komo uno de los personajes sentrales de la komunidad en akeyos dias de apreto, al filozofo, lider politiko i komentador de la Biblia, Isaac Abrabanel. El aze sovresalir la ekstraordinaria personalidad de este ombre, atado a la relijion djudia i al mizmo tiempo bankero de reyes, ombre de las Kortes Reales, lider de la komunidad djudia i mas ke todo una persona ke pasa libremente de la korte del rey a la juderia i de la juderia a la korte, sirviendo komo mediator entre dos mundos diferentes.
La Espanya es prezentada komo la patria de los djudios, segun puede ser visto de lo ke es dicho, en este livro, por Abravanel, en su enkontro kon los Reyes Katolikos antes de la ekspulsion: ”Mozotros – dize el no semos ajenos aki sino ke semos ijos de Espanya.”
Para Philippson los djudios de Espanya reprezentan una epoka i una situasion sosiala en la kuala una minoria djudia no solo ke pudo bivir djuntos kon kristianos sin problemas, sino ke pudo tambien kontribuir de manera muy apresiable a la istoria i kultura de este paiz.
Philippson, Zunz, Graetz i otros eskritores ke bushkaron a identifikarsen kon el djudaizmo de Espanya eran de los lideres del djudaizmo liberal i reformista en Almanya; ma de entre los sirkolos neo-ortodoksos tambien uvo personalidades importantes ke, yenos de admirasion por los alkanses de los djudios de Espanya, bushkaron a aprovecharsen de sus eksperiensa para.la sosiedad ideala ke dezeavan krear. El mas importante de entre eyos es Marcus Lehman (1831-1890), autor de tres romanes i vente otros livros sovre temas djudios, entre eyos el livro Die Familie Aguilar, sovre los djudios ke se avian konvertido al krisitanismo.
Mientres ke el livro Die Marannen de Philippson trata de los anusim ke se fuyen de Espanya para poder kedar fideles a la relijion djudia, el livro de Lehman es una kritika muy dura a los djudios ke ya estavan muy asimilados i preferaron abandonar sus relijion afin de no tomar el kamino del exilo, sigun lo izieron munchos de sus ermanos. Lehman aze un paralelo entre akeyos djudios i los de Almanya en el siglo 19, para atakar a la asimilasion, muy populara entonses en siertas partes de la klasa djudia mediana en Almanya, i ke segun el amenaza la identidad djudia.
En konkluzion podemos dizir ke sea los djudios liberales ansi komo los neo-otodoksos de Almanya bushkaron en la istoria de los djudios de Espanya el modelo ideal para la mueva identidad del djudaizmo alman en el siglo 19, apuntando tambien la importansia ke tiene para esta identidad, la fiertad por los alkanses de esta komunidad en todos los aspektos de la vida – alkanses ke no tenian sus igual en dinguna otra komunidad djudia en akeya epoka.