La revolusyon siriana despues de 8 anyos de gerras internas kayo en las manos de las grandes i medyas potensyas komo los Estados Unidos, la Rusia, el Iran i la Turkiya ke gerreyan entre eyas a traverso sus proksis arabos pormo de sus enteresos. En todo kavzo el sanginaryo Asad kedo en pueder bien entrankado en su kapitala Damas malgrado ke peryo el kontrol del 30 por siento del teritoryo de onde una grande partida aktualmente esta en mano de los kurdos sirianos.
Asad sin el ayudo de la Rusia, su aliada, oy por siguro devia tener la mizma fin semejante a la de Kadafi. La razon del apoyo de Putin se eksesplika fasilmente. Su payis mizmo durante el rejim komunisto se entereso i apoyo la famiya Asad i ansi mas de kuarenta anyos ke la Rusia tiene bazas militares al bodre de la Mediteranea . En la situasyon aktuala, en ayudando militarmente a Asad, se puede dizir ke la Rusia se establisyo kon su armada por siempre en este payis i ke sin su konsentimyento nada no se puede dechizar politikamente.
Los Estados Unidos establisidos diferamente ma kon fuerzas i bazas militares miraron por lo mas a arestar el Iran de establisirse en la Siria. Los iranyanos pretenden ke fueron invitados por el rejim aktual a ayudar la minorita alaouita, koza ke no sera el buto final, porke los mollahes keren apuyar el Hezbollah en el Libano los kualos miran de apatronarse el poder en este payis i azer la gerra a Israel konsiderado komo el inimigo a destruyir. Los Estados Unidos una vez ariento de la Siria armaron los kurdes ke biven en las rejyones del norte del payis i grasias a la kapachidad de este puevlo non arabo, disiplinado i lutchador, los amerikanos en el tiempo de Obama les aprometieron si vensen el ISIS (Kalifa sunni) de obtenerles una forma de otonomia de los teritoryos onde biven, los kualos forman la frontiera kon la Turkiya. Koza ke fue realizada pokos anyos antes.
Los kurdes ansi de fakto kontrolan serka 480 kilometros de frontiera kon el vizino turko el kual se siente menasado por eyos. La Turkiya dezde 100 anyos ke tiene una minorita grande de kurdes al sud-este del payis. Se pensa ke el rejim republikano de Ataturk no fue kapache de asimilarlos, ansina eyos kedaron un puevlo aparte komo en el tiempo de los Otomanos. Imposivle de dar un shifro djusto de la povlasion ma se pretende ke egziste serka vente miliones de miembros donde una grande partida son sempatizantes del movimiento PKK ke gerreya kontra el governo de Ankara.
El prezidente Erdogan i su governo insisten ke el PKK teroristo i el SDF/ YPG Siriano son unidos i desharlos organizarsen en Siria en forma de governo otonomo es un grande perikolo para la Turkiya. El solo remedyo es de okupar la zona de la frontiera de parte de la Siria i krear un tampon kontra los kurdes ke seran arondjados de 30 kilometros verso el sud de una partida de esta frontiera. Ademas los turkos tienen la intisyon de mandar atras 2 miliones de arabos sirianos refujiados en Turkia, establisirlos en esta zona i krear ansi de fakto un” fait a compli” para apartar los kurdes turkos de los sirianos. Koza ke parese lojik en los serklos diplomatikos i la prensa turka,ma difisil a realizar.
Todos mos demandimos de ke Trump en esta aktual situasyon supito tomo la desizion de travar atras sus fuerzas espesialmente de la frontiera turka, koza ke fue kritikada kon indinyasion kaji por el mundo oksidental i mizmo por el senato amerikano. Trump peryo ansina la konfiensa de todos sus aliados de la rejion, ke lo kritikaron de deshar kayer en manos de inimigos a los kurdes, a los israelianos, a los libanezos, a los saudianos i mas. Ma en realita Trump egzekuto una desizion tomada por Obama i nada mas.
A mozotros de ver i entender kualo es el buto verdadero de esta aksyon? La politika estranjera de los Estados Unidos malgro todo modo de akordo firmado es bazada sovre las teorías filozofikas de Thomas Hobbes ,`el kual mos ambeza ke el egoizmo deve ser la baza de la politika de kada payis independiente i de su politika ajena. Las politikas estranjeras tienen por buto de ayudarse asi mizmo, lo ke kere dizir ke kada payis deve saver defenderse i guadrar su independensia. La egzistensia de chikos payizes es partikularmente difisil. El mijor egzemplo ke se puede dar en el Medyo Oriente es la kondukta de la Siria enverso el Libano i la del Irak enverso el Kuwait.
La otonomia mueva kurda en el norte de la Siria es el resultado de la flakeza del rejim i del ‘vakum’ de las fuersas de Damas . I los turkos okuparon kantones al bodre de la frontiera grasias a esta flakeza. En kurto vos dire de mi punto de vista, ke apuyarse i azer konfiensa a los akordos kon las grandes potensyas no abasta para sovrebivir en este mundo. Kada nasyon deve saver defenderse i guadrar su independensya sovre el konteksto rijido de las teorias de Hobbes.
El izolasyonizmo de Trump no es un fenomeno muevo, el proviene de la mentalidad profonda de los amerikanos i reflekta los sentimientos de la sosiedad amerikana de oy. Los amerikanos ya se enfasyaron de mandar sus ijos gerreyar en el Medyo Oriente dezde 40 anyos. Trump no aze ke responder a esta demanda de trayerlos atras. Israel siguro no puede ser kontente de esta situayon, ma el avantaje ke tiene es ke se save defender i esto lo pruvo. Ademas el deve tener una politika mas realista en sus relasyones kon Washington.
De otra parte no podemos saver si amanya despues de la eleksyones del anyo vinidero si Trump reuche a ser elijido de no akodrarse de la promesa ke se izo a los kurdes. No mos enkantaremos si Trump desida supito de rekonoser un estado kurdo independiente a la frontiera del Iran. Ademas el no kere del todo bien a Erdogan i a los turkos, ma malgrado esto les permetyo de okupar una banda de tierra en la Siria en dandoles lo ke keriyan i agora deke no kontentar a los kurdes ke gerreyaron kon los amerikanos!!!