En uno de muestros ultimos programas, sovre los “kantes de askerkik, ke deskriven la sufriensa de los djudios ke azian sus servisio militar en el Imperio Otopmano, aviamos tokadoa uno de estos kantes kantado por los djudios de Saloniko.
Se trata de los djudios ke se avian enlistado komo volontarios a la armada turka afin de ayudar a reprimir la revolta ke avia esbrochado, en el 1908, kontra el governo formado en segito a la revolusion del, kontra el governo tiraniko de Abdl Hamid II.
Esta revolusion, enkavesada por el Komite de Union i Progreso, mas konosido komo el movimiento de los los Djovenes Turkos. metio fin al reyno despotiko del Sultan Abdul Hamit II i empeso en un proseso de demokratizasion i progresivizmo.
En Djulio 1908, basho la presion de los Djovenes Turkos apoyados por la armada, se avia konstituido un parlamento i un governo konstitusional. Ma este dezvelopamiento no trusho el ekilibro dezeado en la sena politika i sosiala. La atmosfera de libertad kreada por el muevo governo demokratiko, favorizo la ekspresion de un fanatizmo relijiozo islamiko, kontrario a la ideolojia progresista de la Revolusion. En este konteksto, en avril 1909 ezbrocho una sangriente rebelion de elementos mas islamikos i konservadores ke se opozavan al muevo rejim.Afin de reprimir a esta revolta fue kreada una fuersa militara yamada “Hareket Ordusu” (Armada de aksion) komandada por el jeneral Mahmud Shevket ke inkluiya tambien un batalyon djudio, yamado “Musevi Taburu”. Este batalyon, formado por volontarios de Saloniko i de kazales en Trakia i Makedonia, partisipo aktivamente a los kombates en las kayes de Estambol ke yevaron a la viktoria del governo demokratiko.El sultan Abdul Hamit II fue destituido i exilado a Saloniko onde fue internado en la Villa Alatini, ke avia apartenido a una de las famiyas djudias mas rikas de esta sivdad.
En un artikolo a este sujeto, el imvestigador del djudaizmo oriental, ke fue mas tadre prezidente del estado, el Sr. Yishak Ben Zvi sita las palavras de uno de los kombatientes de este batalyon, el Sr. Avraam Ben-Aroya:
“…Entrimos a la kapitala despues de unos kuantos kombates. El Batalyon Djudio ke kontava 700 soldados era komandado por Kazim Bey. Adelantimos verso Taksim por tres kaminos i mos enkontrimos kon el enimigo. Tuvimos 23 feridos i 21 de muestros soldados kayeron, entre eyos dos volontarios djudios, Termin i Beja.
En dos korespondensias publikadas en el jurnal Jewish Chronicle de Londra, se melda ke:
“ …En la parada organizada por el Klub Djudio de Saloniko, ofisieres de la armada turka rengrasiaron a los djudios al nombre de la armada, por sus ayudo en moneda i en sangre a la Revolusion ke libero a la nasion de la tirania…”
“…En la vijita del Gran Rabino al komandante de la Armada de Aksion, Mahmud Shevket Pasha, i al ministro de la gerra, Salih Pasha, los dos jenerales rengrasiaron al nombre de la armada a los djudios del Imperio i en partikular a los de Saloniko, por la parte ke tomaron en el Movimiento de Liberasion i por sus apoyo a la armada.
El batalyon djudio fue de kurta vida. El avia sido fondado para atabafar la rebelion de los fanatikos islamistos kontra el progreso i la libertad i para detronar el Sultan. Despues ke estos butos fueron alkansados el batalyon se disperso, ma unos kuantos de sus miembros entraron a la Akademia Militara i kontinuaron en sus kariera en el kuadro de la armada. Uno de eyos es el Sr. Shemtov Revah ke sus memorias kontribuyeron eyas tambien a la dokumentasion de este evenimiento.
La revolusion de los Djovenes Turkos es uno de los kapitolos mas importantes en la istoria de los Balkanes i del Oriente Medio. A su baza se topa la ideolojia del Komite de Union i Progreso, los “Djovenes Turkos”. Raros son en la istoria del Imperio Otomano, evenimientos komo esta revolusion sovre la kuala fueron metidas munchas esperansas i ke provokaron despues tantas desepsiones. El Progreso ya vino ma la Union se dezmembro en segito a las aspirasiones separatistas de diversas nasiones ke bivian entonses basho la supremasia otomana. Ansi empeso para la Turkia una epoka de gerras i dezgrasias ke se termino kon la fondasion por Kemal Ataturk de la Republika Turka.
Del punto de vista sionista el Batalyon Djudio fue el primer paso verso una fuersa militara djudia. Kale apuntar tambien ke una de las konsekuensas de la revolusion de los Djovenes Turkos fue el enfuertesimiento de la kolonizasion djudia en Erets Israel, motivada por la ideolojia sionista. Es de regretar ke la existensia del Batalyon Djudio i su rolo no toparon asta agora su ekspresion meresida en muestra istoria. Un testimonio konkreto de este evenimiento es la marcha militara kompozada a esta okazion, kantada por los volontarios del batalyon, i de la kuala trayemos aki el teksto de la primera strofa. Ansi empesa este kante:
Mansevos de los kazales/ I munchos de Salonik/ Nos izimos volontarios/ Nos fuimos al askerlik
O la libertad se va azer/ O muestra sangre va korrer/ Por amor de la Turkia.
El kante tiene otras strofas mas en las kualas se manifesta la alegria i el entuziazmo konsentidos en munchas partes del Imperio Otomano por la fin de rejim tiraniko de Abdul Hamid II i la viktoria de las fuersas demokraikas en el paiz.