En estos dias, aserkandomos a Rosh Ashana, siempre me viene al tino los uzos ke teniamos en Izmir, ke me inchen dainda kon nostaljia i deskarinyo. A esta okazyon vos prezento este eskrito de mis rekuerdos para ogurarvos vos anyada buena a todos.
“Bonne fête!” i mas saludos
Era kon la fraza “Bonne fête" en fransez (en chika a mi me paresia ke era un biervo en espanyol – bonfet) ke mos saludavamos de parte a parte en las fiestas djudias. Solo los ombres, en saliendo de la keila, se saludavan kon “Moadim lesimha” i respondian “hagim uzmanim lesason.” En Roshashana (o “roshana asigun lo pronunsavamos) los ombres se saludavan kon “Tizku leshanim Rabot” i respondian kon “Tizke ve-Tihye” ( En Ladinokomunita, Yehuda Hatsvi – sano ke este – unos anyos atras mos eskrivio los saludos tradisionales i sus sinyifikasiones. Tizku leshanim Rabot” kijo dezir: ke tengas el zehut de munchos anyos, I “Tizke ve-Tihye” es: ke tengas el zehut i bivas. Yehuda disho ke la dicha (repuesta) kompleta es: Tizke ve-Tihye ve-taarih Yamim ve-Shanim" = "Ke tengas el zehut i bivas, i tengas lonjevidad (vidas largas)". Ke ermozos suetos!)
Ma los ombres tambien saludavan kon “Bonne fête” a las mujeres i las kriyaturas kuando venian a vijitar en las kazas.
Vijitas de Roshashana
En la shena de mi memoria, tengo 10 anyos i esto asentada kon mi mama en el balkoniko de muestra kaza en 287 Inonu Caddesi, “a dos pasos” de la keila Bet Israel. El tiempo esta klaro i ermozo, I yo mezmo me siento ermoza (no me emporta ke dizen ke se godrika), kon mi fostan muevo i chapines i soketes muevos a kavod de moed, i ke mi mama me peyno kon buklas (alugar de kolas, komo kada dia para la eskola) i me metio un fyongo grande de kurdela de tafta. La kaza briya de limpieza, las mezas i las kamas estan kuvridas kon lo muncho i bueno brodado a mano, del anshugar de la mama.
A mi me agrada mirar del balkon a ver los ombres saliendo de la keila despues de la tefila (orasion de demanyana.) Normalmente, en los dias de Shabat, mis tios Leon i Albert (ermanos de mi mama) vienen a dezayunar en muestra kaza a la salida de la keila, ayi verso las 10 de demanyana. Dizen ke es porke moran leshos, i no keren asperar asta ke yegan a sus kazas. Ma yo kreygo ke es porke los boyos, las roskas, i las burekas de mi mama son los mijores de Izmir entero. Ma oy, Roshana, salen mas tadre de la keila, i no vienen mis tios a dezayunar. Se van a sus kazas, porke despues tienen ke salir a azer las vijitas.
Mi papa i Selim mi ermano (z"l), salieron a azer vijitas tambien, en sus vestidos muevos i kamiza kon kravata, aun ke esta bastante kalor. I no se olvidaron de tomar kada uno su rizá (ridá, asegun los Estambullis) grande blanka i limpya, dada uti i duvlada, en sus aldikeras. Kuando van a aboltar, las rizas van estar yenas de marunchinos i mogados. Van a empesar las vijitas kon ir a bezar la mano del granpapa I granmama, ke moran en Karantina (en la mizma kaleja, ma un poko mas al oeste),i avagar avagar van a vijitar todos los paryentes i vezinos djudios ke moran entre Karantina i Karatash, kedando de 10 a15 minutos en kada kaza. En kada kaza los van a adulsar en primero kon tavlá (kon dos dulses: uno sharope blanko - para ke la anyada mueva seyga blanka i alegre - i el otro dulse de kayisi o shiftili.) Servir dulse en tavlá es amostrar kavod (onor) grande al musafir – no solo en fiestas, ma en kualker dia. Ma en las vijitas de Roshana, depues de 5 minutos se sirve tambien maronchinos i mogados, i konfites blankos.
A mi me agrada muncho los dulses, ma kuantos dulses puede komer la persona en un dia? Por esto es ke los ombres se yevan las rizas limpias para trayer a kaza los mogados o marunchinos ke no pueden komer, i no es djusto refuzar.
Roshashana en la Amerika
En 1958 yegi a la Amerika djusto antes de Roshashana. Aki topi otro mundo, ke merese un livro entero para kontar!
Komo ya savemos, la grande majoridad de los djudios amerikanos son Ashkenazim. Agora, despues de tantos anyos de bivir aki, ya me akostumbri a munchas kozas. Ma dainda no me agrada las diviziones de la komunidad entre ortodokses, konservativos, i reformistas, i varias divisiones mas entre estos tres. Ma lo bueno es ke aki, komo en el mundo entero i en toda la istoria djudia, Roshashana es el tiempo ke los djudios se saludan de parte a parte kon ogurios buenos. Un tiempo todos dizian "Gut Yontif" ("buena fiesta" en Yiddish), ma agora se siente esto un poko menos. Shana Tova uMetuka, anyada buena i dulse en ebreo, es agora el saludo de Roshashana mas komun aki, komo en Israel i kaje todo el mundo.
I a vozotros todos para este Roshashana vos saludo kon la fraza ke a mi me plaze mas ke todas: Tizku leshanim Rabot.
---------------
(Una version de este eskrito mio se avia publikado sesh anyos atras, en el numero 28 de DiyalOg, akel maraviyozo jurnal elektroniko ke teniamos los Izmirlis asta el anyo 2016.)