La erensia sefaradi ke tomaron kon si los djudios ekspulsados de Espanya no konsistia en tierras, edifisios o bienes finansiarios. Los ekspulsados duvieron deshar todo esto antes de salir al exilo. Lo ke tomaron los djudios fueron sus kultura i sus livros santos; sus tradisiones literarias, relijiozas i liturjikas; el Nusah Sefarad (tradision de Espanya) kreado i dezvelopado durante mas de 1000 anyos, kuando los djudios koexistieron en la Peninsula Iberika, kon paganos, kristianos i muzulmanos interkambiando kon eyos saviduria i valores kulturales.
Los djudios yevaron kon si sus uzos i kostumbres, sus manera de vistir i sus gizado tradisional ansi ke los reglamientos kon los kualos rijian sus komunidades. Mas ke todo apresiavan sus lengua, el espanyol avlado en Espanya a la fin de siglo XV i ke kon el tiempo se dezvelopo en el ladino del Imperio Otomano i los Balkanes i en el haketia de Afrika del Norte.
Los djudios ekspulsados se dispersaron en toda la rejion del Mediterraneo. Munchos se dirijeron por tierra a Portugal i a Navarra mientres ke otros eskojeron el kamino de mar a Afrika del Norte, Italia o el Imperio Otomano ke los resivio i les dio azilo.
Una parte de entre eyos yegaron a Saloniko onde se aresentaron, formaron muevas famiyas en lugar de las ke avian pedrido en kamino, renovaron sus vida komunala i sus aktividades relijiozas i kulturales. Sus komunidades fueron organizadas segun la lengua i el lugar de orijin de los miembros. Frente a las komunidades djudias romanyotas, ke ya bivian de antes en estos lugares desdel tiempo del Imperio Bizantino, los djudios sefaradis sovresalieron por sus superioridad kulturala i sus kapachdades en el kampo ekonomiko tambien. Este senso de superioridad, enfuertesido por la metalidad espanyola de grandeza, determinaron la direksion ke tomaria sus istoria en el futuro.
Una de las figuras mas importantes de esta epoka en la komunidad djudia de Saloniko fue Rabi Moshe Almoslino, ke nasio en Saloniko en 1518, una jenerasion despues de la Ekspulsion. Sus djenitores avian nasido eyos tambien en Saloniko i vinian de una famiya djudia aragoneza, de las sivdades de Jaca i Huesca.
Pushado por su padre, Moshe Almoslino resivio una buena edukasion relijioza i yego a ser el marbitz Tora (maestro de relijion) de unos kuantos kales en Saloniko: Gerush Katalan, Neve Shalom, i Liviat Hen. El era tambien miembro del Vaad Metaknei aAskamot (Komite de los lejisladores de la komunidad) ke era la mas alta institusion del djudaizmo de Saloniko.
En dekretando muevas Takanot los rabinos de Saloniko de mizmo ke los rabinos de otros paizes en los Balkanes i en el Adriatiko se bazavan sovre las Takanot i las repuestas de hahamim de la Peninsula Iberika, ke sus sentensias i desiziones eran akseptadas por todos.
En la tradision latino-kristiana de la Edad Media el estado era formado por tres grupos, en latino oratores, bellatores i aratores (governadores, kombatientes i lavoradores). La komunidad djudia de Saloniko, sigiendo mas o menos esta konsepsion akseptava el espartimineto de la komunidad en tres grupos: los gevirim (rikos), los medianos i los
proves. Sus dirijentes eran komersantes, djuezes i los ke eran aserkados al governador lokal. Los hahamim se konsideravan por ensima de estos grupos sosiales, ma aun kon esto, en sus ovras literarias Ribi Moshe Almoslino insistio sovre la ovligasion de los hahamim de ser aktivos en la adminsitrasion publika. Sigiendo la klasifikasion de Aristoteles, Rabi Moshe Almoslino izo sovresalir la disiplina menesteroza, de parte de kada uno de los grupos sosiales djudios para una buena administrasion de la vida publika: los proves deven siempre ovedeser a los rikos ma estos devian ser responsables por el bienestar de los proves.
Rabi Moshe apoyava tambien una monarkia fuerte, sentralista i estable. En la Peninsula Iberika sea los djudios komo los konversos dependian del apoyo real para sus vida de kada dia. En segito a la falta de seguridad ke karakterizava sus vida i sus pozisiones politikas, eyos bushkavan el apoyo del rey kontra los nobles i las autoridades munisipales. En el Imperio Otomano tambien el bienestar de las komunidades djudias, i entre eyas la de Saloniko, dependia de la buena voluntad del sultan. De este punto de vista era muy importante el ayudo i la intervension de akeyos djudios ke tenian buenos kontaktos kon el governo otomano, komo por enshemplo Don Yosef Nasi i los medikos del sultan, Yeuda de Segura i Yosef Amon.
A lo largo del siglo XVI uvo una emigrasion kontinuala de anusim al Imperio Otomano i sovretodo a Saloniko. Kuando estos emigrantes yegavan de manera individuala, eyos se djuntavan a uno de los kales existientes; ma despues ke empesaron a arivar en grandes grupos, eyos formaron muevos kales, komo el kal Liviat Hen, al nombre de Dona Grasia Mendez (Hen en ebreo es grasia) ke ayudo muncho a los anusim.
Rabi Moshe eskrivio unas kuantas ovras literarias para la edukasion de estos anusim. De intereso partikular es su komentario sovre el livro de Job, kon las sufriensas del kual eyos podian identifikarsen.
La audiensia de Rabi Moshe Almoslino era formada por djudios ke no avian nunka abandonado sus relijion i por otros ke avian sido anusim i de una manera o otra avian tornado a la relijion djudia. Almoslino reusho a manovrar entre estos dos ekstremos. El se bazava sovre los prinsipios de Arambam, ke bushko a lograr un ekilibro entre la Alaha djudia i la filozofia de Aristoteles, aun ke el por su parte rempushava kategorikamente la interpretasion ekstremista de este filozofo grego. Almoslino sitava a Arambam, ma en sus sermones ansi ke en sus livros el metia el aksento sovre el Maase, la praktika kotidiana de la vida djudia.
Almoslino eskrivio tambienotrunos kuantos livros, el mas konosido de los kualos es “Kronika de los reyes Otomanos”, de los kualos podemos ver ke el fue verdaderamente una de las figuras sentrales del djudaizmo de su epoka, un intelektual de alta estatura ke tuvo una grande influensa sovre la vida de las komunidades sefaradis en jeneral i la de Saloniko de manera mas partikulara.