Un Riko Manadero Dokumentario
sovre la Istoria de los Djudios de Amsterdam
Kuando duvieron salir de Espanya los djudios ke no akseptaron de konvertirsen a la relijion kristiana, sigun avia sido desidido en el Edikto de Ekspulsion de 1492, munchos de entre eyos eskojeron de tomar el kamino mas kurto i mas seguro; bushkaron azilo en Portugal, ke su rey Joao 2, avia akseptado de resivirlos, kontra pagamiento de una sierta suma por kada refujiado.
Ma esta solusion, no turo muncho tiempo. 2 anyos despues el rey Joao murio i al trono en Lisbona suvio el rey Manuel I, ke al preinsipio paresio ke estava pronto a kumplir la prometa de su predesesor i permeter a los refujiados djudios de kontinuar a bivir en paz,
La stuasion troko kuando Manuel kijo kazarse kon la ija de los Reyes Katolikos, Fernando i Isabela, i para esto duvo prometerles ke al yegar a Portugal su mueva mujer, no avria ayi ningun djudio. El proklamo un edikto ordenando a los djudios de konvertirsen o salir de Portugal en el korso de los 6 sigientes mezes. Los ke no akseptarian la konvertirsen devrian salir, por via de mar, del porto de Lisbon.
Ma en realidad el rey Manuel, ke ya savia muy bien en ke mizura los djudios son un manadero de rikeza para el paiz onde biven, no tenia ninguna intension de permeter la salida de los ke refuzarian de konvertirsem.
Al yegar la data en la kuala estos djudios devian embarkarsen para ir a otro paiz, el serro al porto de Lisbon i no desho entrar ayi ninguna nave. Al dia mizmo despues de la data fiksada, los djudios ke se avian arekojido en Lisbon para salir de Portuugal, fueron arekojidos en una de las plasas de la sivdad, onde les fueron echadas uns kuantas gotas de agua bendicha, i fueron ansi konvertidos en masa.
Es klaro ke una tala konversion no podia ser verdadera i munchos de entre los muevos konversos kontinuaron a kumplir, en el sekreto de sus kazas, los mandamientos de la relijion djudia;. i apenas se krearon kondisiones adekuadas, munchos de eyos salieron de Portugal, i toparon refujio prinsipalmente en Amsterdam, en Holanda, ke su povlasion era protestante.
Grasias a la toleransia relijioza de las autoridades ‘holandezas, de una parte, i de la otra, a las relasiones familiales i komersiales ke los djudios de Amsterdam tenian kon los djudios i anusim ke se avian aresentado en las izlas del Caribe, la komunidad sefaradi-portugeza de Amsterdam yego a ser el sentro de la Diaspora de los anusim ke avian tornado aviertamente a la relijion djudia.
Esto puede ser visto, entre otras, de la korespondensia, bastante intensiva para su epoka, entre las komunidades de esta Diaspora i la de Amsterdam. Por muestra buena suerte, aun ke las letras ke forman esta korespondensia no yegaron asta muestros dias, podemos saver lo ke fue eskrito en eyas (o a lo menos en munchas de entre eyas), grasias al ekselente manadero dokumentario ke es el “Kopiador de Kartas” de Amsterdam - una seria de rejistros en los kualos, a partir del anyo 1702 i asta la fin de los anyos 1770, fueron kopiadas las letras embiadas de Amsterdam a komunidades djudias o a personas diversas, en otros paizes.
Segun el investigador de istoria sefaradi, el Prof. Gerard Nahon ke izo un estudio en el kual examino 771 de entre las mas de 5000 letras ke se topan en estos rejistros, 197 fueron embiadas a Londra, onde eran echas numerozas tranzaksiones finansiarias al kuento de Amsterdam, i 131 a Hag, onde estava el governo ‘holandez i onde avia otra importante komunidad djudia. La korespondensia kon otras sivdades es mas modesta: a Venezia fueron embiadas 51 letra; a Bayonne i Curacao – 44 a kada una; despues vienen Yerushalayim kon 27 letras; Livorno, kon 26; Estambol – 23… etc. etc.
En lo ke toka la lengua de las letras, eyas son eskritas en sus mayoria en portugez o espanyol. El ‘holandez es uzado para letras adresadas a personas non-djudias. Letras en italiano ay muy pokas. El fransez es uzado en letras a personas non-djudias en Venezia o en Paris.
La mayoria de las letras resividas vienen de parte de komunidades djudias en la Diaspora ke tienen menester del ayudo material de Amsterdam. Otras demandas, de komunidades en diversas partes del mundo, eksplikan en sus letras ke tienen menester de un Sefer-Tora, o de un rabino o hazan, o del ayudo politiko de la komunidad de Amsterdam para obtener algun privilejio, o para reglar konfliktos internos etc.
En desparte del ayudo finansiario ke dio en repuesta a estas demandas, la komunidad de Amsterdam kanalizo tambien los donos i subsidios de otras komunidades a los djudios de Erets Israel. Eya resivia estas sumas i despues organizava sus transfero por kaminos ke podian ser diferentes, sigun las sirkonstansias. Estos donos ayudaron al mantenimiento de algunas yeshivot en las sivdades santas: Safed, Tiberia i sovre todo Yerushalayim.
El ayudo de la komunidad de Amsterdam a otras komunidades sefaradis en el mundo no se limito al aspekto finansiario solamente. En Amsterdam eran formados, en efekto, un grande numero de rabinos, munchos de entre los kualos fueron embiados a las muevas komunidades ke ivan kreandosen en la rejion de los Caribes, tresdovlando ansi la importansia del rolo djugado por los djudios de Amsterdam en el dezvelopamiento i enfuertesimiento de las komunidades sefaradis en diversas partes del mundo. \