En pasadas meldatesh mi eskrito sovre el enkontro de las dos ermanas - madre i tia de Itzhak Roditi de Israel, ke se reunieron despues de 65 anyos. La tia avia kedado en Turkia despues de kazarse kon muslumano i konvertirse al islam, mientres ke su famiya izo aliya a Israel. Era Itzhak ke avia entrado en bushkeda de su tia kon un mesaje a Ladinokomunita.
Agora tenemos otrun kavzo de bushkeda semejante, un esforso ekivalente al de Itzhak, esta ves viniendo de Turkia. Lo topi en Facebook, en un grupo kon el ermozo nombre "Israel Türkiye Dostluk Köprüsü"(Ponte de amistad entre Israel i Turkia) ande eskrivyo el ijo de una djudia ke se avia kazado kon muslumano, i kedado en Turkia mientres ke su famiya - padre, madre, i dos ermanos - izieron aliya a Israel en 1950.
El ijo se yama Selim Öner (esta en FB kon el nombre Acem Acem Öner ) eskrivyo ke su mama murio kon el deskarinyo ("hasret" en turko, ke es tristeza de deskarinyo) de su famiya i ke su kavo dezeo era ke el ijo tope a la famiya en Israel. La famiya es de la sivdad de Diyarbakir i tenia la alkunya Acem, ma en Israel trokaron sus alkunya. Selim no save ke nombre tomaron. Solo mos dize ke el nombre de su madre era Ferha Acem, i despues ke se kazo se izo Fahriye Öner.
Vos puede venir kuriozo de saver ke avia djudios en Diyarbakir, una sivdad ke se topa en el sudeste de Turkia kon povlasion de Kurtes (Kurds) en majorida. En realidad esta sivdad tenia una komunidad djudia muy antigua, puesde ser de mas de 2000 anyos. Ma en los anyos de 1950 los djudios izieron aliya a Israel, i la kehila (sinagoga) kedo abandonada, i finalmente fue destruyida en la gerra kon el PKK en 2015-16. Un artikolo de 2018 en el Jewish Chronicle mos aze saver ke algunos sivdadinos la keren rekonstruirla, i kreyen ke Eliyahu Anavi es ayi ke se izo profeta.
(Podesh meldar sovre esto:
Tornanodo a la bushkeda de la famiya en Israel, Selim, el ijo de Ferha/Fahriye, eskrivyo una letra al Hahambashi de Estambol demandando ayudo, i adjusta ayi ke en Israel la famiya fondo una sinagoga de Diyarbakirlis en Rehov Besalel en Yerushalayim. Moshe Gormez , mi kolaborador en Ladinokomunita, me mando la foto de la dicha kehila, ke se yama Tiferet Israel i se topa en la kyoshe de las kalejas Betsalel i Korazin. (Adreso: Rehov Korazin, no. 5, Yerushalayim.) Aki en adjunto vos do la foto de la sinagoga ke me mando Moshe, ansi ke dos otras ke tomi de Facebook: la letra (en turko) ke Selim eskrivyo al Hahambashi, i la foto de Ferha/Fahriye kon su marido i ijiko. Este ijiko, Selim, de madre djudia es djudio asegun la Alaha. I en su letra al Hahambashi dize ke el fiestava las fiestas djudias kon su madre (a las eskondidas de su papa muslumano) i ke kere apropriarse de su identidad djudia.
Komo podemos kedar sin perkurar de ayudar a reunir a este djudio, probablemente el uniko en Diarbakir, kon su famiya djudia en Israel? Ke alegria ke fue para todos ver la reunion de las dos ermanas, i de los primos ermanos, en la famiya de Itzhak Roditi! Itzhak avia empesado su bushkeda en Ladinokomunita. Espero ke esta ves sera la Itahdut Yotsei Turkia (Asosiasion de Turkanos en Israel) ke va tener el zehud de ayudar a reunir a esta famiya djudia.
El ke tiene informasion sovre la famiya, o alguna otra idea ke puede ayudar, puede eskrivirme a mi (bortnickra@sbcglobal.net), en la IYT, o direktamente (en turko) al grupo de "Israel Türkiye Dostluk Köprüsü."
Dezeo una buena rezolusion a esta estoria, kon azlaha i beraha.