En la fiesta de Shavuot se melda el Livro de Rut. En este livro, Rut le dize a Naomi: “Onde te vas yo ire,onde te arresentas yo me arresentare. Tu pueblo será mi pueblo i tu D. será mi D.”Los savyos del Talmud entendieron ke esto kere dizir ke Rut se abolto al djudezmo i es ansi ke eyos dezveloparon los prensipyos de la konversyon komo los entendemos i pratikamos oy, en muestro tiempo (Yevamot 47-a-b).
Durante milanyos los rabinos bazandosen sovre estos prensipyos ke fueron dezvelopados por Maymonid i el Shulhan Aruh, achetaron kon difikulta (lekabel) a ser djudio los ke lo kijeron ser. I mizmo eyos se dekretaron el derecho de anular rektoaktivmente la konversyon si la persona no se komportava en su mueva vida rigorozamente sovre las mitzvot i la halaha. Koza ke es difisil de achetarla en esta manera, porke un’djudio siempre kedara djudio’. Ademas los rabinos no achetan a aboltar al djuzemo achakes de kazamientos miktsos i esto es un otro entrompeso a la goya ke kerara tener desendesya djudia. Otra difikulta es el tiempo largo ke un kandidato a la konversyon meterá a ambezarse los mitzvot i las orasyones, lo ke deskoraja a munchos de entre eyos.
Aktualmente las konversyones por lo mas se azen en Israel i esto es el sujeto ke enteresa espesialmente los israelianos, por ke ay primura de remerdiar a la situasyon de los 400.000 israelianos, por lo mas nasidos en Sion, ma no rekonosidos komo djudyos por no tener madres djudias. Estos ermanos , miembros de la sosieta israeliana engrandesidos komo djudios,azen sus servisyo militar, biven al seno de la nasyon i dezde de la edad de 15 anyos son kandidatos a la konversyon. Porke inyegar i no dar el derecho a ser djudio a un joven ke es ijo de un padre djudio? Deke azer deperder jenerasyones de israelianos sin kulpa por ser desendientes de una madre goya? No mos olvidaremos ke ajuntarse a la relijion djudia es en mizmo tiempo ajuntarsen a la nasyon djudia. Muestra relijion es unikamente nasyonala.
La karakteristika de la Ley del Retorno es de dar derecho mizmo a siertos goyim ke tuvieron en sus famiyas un pariente serkano djudio de ser ole. Es ansina ke sin ser djudios siertos de los oles ke vinieron de la Union Sovietika se establisieron en Israel. La imigrasyon sovietika kaji de mas de un milyon de djente kontinua a engrandeserse a una kadensia sostenida i kada anyo 10.000. muevos ole goyim se ajuntan a los ke ya están en el payis. El fakto ke el estado los klasifika komo goy krea una situasyon muy difisil. Una ves kazados kon israelianos un jenero de trivya aparte se dezvelopa al seno de la komunidad israeliana ke no es achetada komo djudia todo en siendo israeliana. Sin duvda un grande nombre de mansevos djudios por razon de relijion no kereran kazarse kon estos ‘goyes israelianos’amenos ke se abolten al djudezmo. La foya es grande i ay urjensya a topar remedios en ayudando a estos sivdadinos a aboltarse kon mas de fasilidad al djudezmo.
La prosedura de konversyon esta dirijida i kontrolada por los rabinos lo mas haredis miembros de la Korte Rabinika del Gran Rabinato de Israel. La superfisia de la konversyon relijioza vista de ahuera no parese komplikada ma en realita la attitud egzijivle de los rabinos sovre la manera de vida relijioza deskoraja a miles de djente. Es ansi ke fin oy en dia solo serka 7 por siento de los goyim israelianos se izieron djudios. El porsentaze es tan flako ke no se save komo topar remedio a este fenómeno grave de la sosietad djudia. Kon razon los kandidatos no keren trokar siertos de sus uzos i bivir una vida muy relijioza kuando la mayoriya de los israelianos no la pratikan del todo. Komo topar el justo medyo para kontentar de una parte los rabinos i de otra a estos muevos djudios? Esto será la una de las luchas de la sosietad moderna israeliana en los anyos vinideros.
Penso ke sera un grande pekado de deshar a las futuras jenerasyones djudias de Israel el ovligo de remediar a esta anomalia, kuando savemos ke en la diáspora el kazamiento miksto es grande i ke los rabinos topan formulas afin de mirar a satisfazer akeyos ke se keren aboltarsen i salvar ansi la kontinuasyon del djudezmo en avryendo las puertas.