El 1 de Avril, el kavo dia ke estava yo en Israel, tuve el grande plazer de asistir en el program del Salon de Ladino ke tuvo lugar en Bet Avot (kaza de aedados) Rekanati en Petah Tikva. I este fue dedikado a la memoria de mi deskansado ermano, Selim Amado, z"l, ke era miembro aktivo del dicho Salon. Fue un ermozo, kalorozo, i enteresante program, kon prezensia de amigos, amigas i konosidos mios, i sovre todo de Selim.
Antes de deskrivir lo ke paso, eksplikare (a los ke no konosen) lo ke es el Salon de Ladino. Es un grupo fondado en en 2006 kon la inisativa de Matilda Kohen Sarano i Selim Salti (fondador del Instituto Salti en la Universidad de Bar Ilan) para uzar el espanyol muestro en un nivel akademiko. Se reune una ves al mez, jeneralmente los Lunes, un miembro (o dos) da una konferensia sovre algun sujeto de su opsion, i en sigida ay diskusion, i siguro tambien "refreskos" sefaradis.
No fue por azardo ke me topi presente en el Salon del mez pasado. Do mis grasias aki a Yehuda Hatsvi, Yaffa Shuhami, i Roni Aranya (Prezidente del Sentro de la erensia de los judios de Salonik, bazado en el Bet Avot) ke lo organizaron espesialmente durante mi kurta estada en Israel. Mezmo fue de ayi, despues del program, ke me fui direktamente al aeroporto Ben Gurion para mi viaje de buelta a la Amerika, enkargada de un paketo de "komanyas" para el kamino de burekitas, guevos haminados i dulserias ke me aparejo Roni. (Grasias, Roni. Me sovro tambien para kaza!) Tambien kero rengrasyar a Moshico Cohen, ke no solo onoro a Selim kon sus amistozos biervos, tambien trusho alegria a la reunion, i a mi en partikolar, kon sus kantes iermoza boz. I ke onor de tener las profesoras Nivi Gomel i Ora Scwarzwald en la odiensa tambien!