Kuando se trata de la konkista de las alturas del Golan, de antes mas de sinkuenta anyos, munchos de mozotros mos demandamos, despues de averlas rijidas komo tyerra djudia, deke kontinuaremos a tener duvdas sovre el derecho de sovranidad de Israel enverso este teritoryo stratejiko importante para la defensa de muestro payis.
Estas tyerras yenas de arkeolojiya djudia onde se deskuvrio mas de 30 sinagogas, siendo el emblema de la revolta djudia ke data de 2000 anyos kontra el okupante Romano , istorikamente avlando eran i seran la proprieta del puevlo djudio, no ay mas de preokuparse.
Por razones i interesos politikos el Imperio Britaniko i el Imperio Fransez despues de la Primera Gerra Mondiala en okupando el Medyo Oriente dechizaron sin ninguna konsiderasyon istorika i unilateralmente de atar el Golan a la Republika Siriana ke yego a su independensia en el 1945. Durante la gerra de defensa de 1967 Israel lo okupo i dezde de akel tiempo el esta debasho de la sovranidad israeliana. Ademas en 1981 el governo Begin izo votar en la Kenesset una ley sovre la aplikasion de la juridiksion israeliana en este territoryo. Koza ke no fue achetada, komo se asperava, por los payizes arabos, la Administrasyon Palestiniana i el Oksidente en jeneral. Despues del akordo de amnistisya de 1973 una partida del Hermon i la sivdad chika de Kunetra fueron dadas atrás i dezde de akel tiempo egziste un silensyo internasyonal a este sujeto, lo ke kere dizir de mi punta de vista, ‘la kestyon por las oras no esta en los kalandaryos de las potensyas mondialas. ’
Ma este kuento salyo yerrado porke la Administrasyon Amerikana troko de idea antes poko tiempo i deklaro ke el Golan aze partida de Israel. Dechizyon importante a la kuala los pasados presidentes amerikanos se opozaron.
Ven tu, Donald Trump, supito antes las eleksyones israelianas del 9 Avril 2019 i despues de aver tomado la dechizyon de travar las trupas armadas amerikanas de la Siria, de azer una proklamasyon eskrita en la Kaza Blanka delantre del Primer Ministro Natanyahu para anonsar ke los Estados Unidos rekonosen ofisyalmente la aneksyon de las alturas del Golan por Israel i ke su juridiksyon prevale. Ansina los payizes miembros del Konsilyo de Seguritad espesialmente la Rusia i la China se deklararon kontra este rekonosimiento. Situasyon burleska kuando la Rusia okupa una partida de la Ukranya i la China el Tibet. Para mi pardon no ay mandon se dizia en la kaza de mi chikes.
Los evropeos de sus partes akuzan Israel de no respektar las leyes internasyonalas sovre las kualas es defendido de aneksar tyerras okupadas, todo en inyorando ke el Golan fue tomado por Israel para pueder defenderse de los atakos de los sirianos durante 19 anyos kontra los peshkadores del Kineret i de los kibutses del derredor, ke estavan dia i noche bombardados de las montanias del Golan. La ley internasyonala stipula ke si una tyerra es konkistada para defenderse de la inimista del payis vizino, tanto ke la inimista egziste no se deve dar atras. Es lo ke aze Israel kon razon porke el Golan proteja Israel i no la Siria. Ajustaremos a este djuzgamyento ke los israelianos durante los konfliktios del Golan peryeron munchos de sus ijos i ke la tyerra de estas alturas es arozada de sus sangre. Personalmente en peryendo mi kunyado en la gerra de 1973 vos dire la pena grande ke tuvimos en mi kaza durante anyos i anyos. Enfin dire si los arabos ayudados politikamente de los evropeos pensan ke deven tomar atras este lugar kon fuersa, ke aproven si pueden.
De otra parte en estos dias en analizando la situasyon en Siria mos rendemos kuento de una situayon totalmente diferente de akeya ke egzistia en los anyos 60/70. Israel a una epoka miro de negosyar el Golan kontra una paz entre los dos payizes, koza ke no kamino, porke la opozisyon al seno de la elit israeliana tenia duvdas ke se konfirmaron mas tadre, ke un dia si Assad kaye, el akto de pas kon un payis onde no egziste una baza de nasyon era nulo.
Ademas una klika alauita debasho de Asad dirijo i mira de dirijar el payis onde no egziste la idea de nasyon porke la Siria es kompozada de minoritadas alaouitas, sunnitas, kristyanas, kurdas , turkmenas i mas ke nunka fueron atadas entre eyas. No egzistiendo una omojeneitad nasyonala la Siria fue durante anyos en manos de djente diktatoriala ke no izo otro ke matar en masa a sus sivdadinos..Los dezmazalados de kurdes konsiderados istorikamente avlando komo sivdadinos de sigundo rango, fueron mizmo gazados. Esto provoko la revolta sivil i 8 anyos de gerra kavzo medyo milyon de muertos i diez milyones de refujiados. El payis esta espedasado i okupado oy en dia por la Rusia , la Turkiya, la organizasyon terorista Hezbollah i el Iran. Solo Israel malgrado el estado de gerra miro de ayudar a los sirianos firidos i hazinos en establisiento ospitales de kampanya.
Los diplomates sirianos azen el torno del mundo para mirar de konvenser las kanchelerias diplomatikas ke la gerra interna ya se eskapo i ke el poder alouit kontinua a sovreguardar la direksion del payis, falsa informasyon, porke aktualmente el patron del lugar es la Rusia. Ken i ken ke tiene entereso en la Siria toma el kamino de Moskova. Los turkos, los iranyanos, los israelianos, los seudianos, los ejiptianos i otros payizes azen la kola. Putin de la flakeza i la enkapachidad de Obama sin ke le koste nada metyo su mano sovre Asad i se apatrono de la Siria. Nada no se puede desidar i azer en este momento en este payis sin su konsentimiento. El muevo imperializmo ruso se aze sintir i mozotros teniendo buenas relasyones kon la Rusia miramos de kontinuar a dezvelopar el Golan onde biven sikuenta mil almas la meta djudios i la otra meta druzos ke azen kreser produktos agrikolos i buenos vinos pastosos de kalita.