Antes de nada kero rengrasiar al Sr. Yakup Barokas, presidente del konsilio konsejero de la Itahdut Yotsei Turkia (Asosiasion de Turkanos en Israel, IYT o "la Itahdut" en kurto) ke me invito a eskrivir en este valutozo sitio. Lo ago kon grande plazer, i por onorar la bendicha memoria de mi ermano, Selim Amado, ke eskriviya aki regolarmente, i era amigo i kolaborador del Sr. Barokas i todos en la Itahdut.
Konoser a mi ermano Selim kijo dizir kererlo bien. Munchos lo yoraron kuando muryo, el 6 Avril de 2018, i munchos onoraron su memoria al un anyo de su muerte (ke se observo, komo de uzo, asegun el kalandario djudio.) En mi kurto viaje a Israel del 27 Marso al 2 Avril, 2019, tuvi la onor i el plazer de asistir en tres de estas komemorasiones: el midrash (meldado) en kaza, el program de la IYT en Tel Aviv, i el del Salon de Ladino en Bet Avot Rekanati en Petah Tikva. Kada una de estas fue muy emosionante i akontentante para mi, i tambien una fuerte demonstrasion de lo bueno ke izo mi ermano en su vida.
La komemorasion organizada de "La Itahdut" (IYT), tuvo lugar el 30 Marso, 2019, a la salida de Shabat. El program konsistio de Prezentasion por Nelly Barokas, panel de 6 personas ande kada uno avlo 5 minutos por Selim, un video, i muzika sefaradi de Bilge Evrensel Rodrik i İdo Segal, sigida por refreskos. No vo repetar lo ke ya se publiko (en turko) sovre esta aktividad. Mezmo si no savesh en turko, ande podesh ver fotografias tambien:
I si vos enteresah, podesh tambien traduizir el teksto en Google a vuestra preferada lingua. En todo kavzo, aki yo solo vos adjusto unas kuantas obserasiones, pensamientos, i eksplikasiones sovre lo ke paso en akea maravioza tadrada.
En su prezentasion de aviertura, aparte de dar una kurta biografia de Selim (ke estava tambien projektada en el ekran) meldo el ermozo mesaje de saludos del sr. Namik Tan, ke fue el ambasador de Turkia en Israel de 2007 asta 2009 (i despues ambasador de Turkia en los Estados Unidos, 2110-2014) i muy amigo i grande admirador de Selim. En su mesaj, el inkluyo tambien una letra elokuente ke le avia eskrito Selim kuando ambasador se despartio de Israel. Nelly meldo i esta letra tambien, ke en mi opinion es un kapo lavoro literario en turko. (La konosko bien porke Selim, kuando la eskrivio, me avia mandado kopya a mi.)
Por el video, kreygo ke es enteresante saver no solo su tema, ma tambien lo ke paso para poder obtenerlo para akea noche. Fue mostrado aki por primera ves despues de 10 anyos de su enrejistrasion en la TRT (televizion nasionala de Turkia), a la okazion de la publikasion en Israel (en 2009) del livro bilingual (turko i ebreo) de poezias de Yunus Emre, poeta mistiko-Sufi turko del siglo 12. Esta primera (i kreygo asta agora unika) traduksion al ebreo de de Yunus Emre fue rezultado de un grande projekto de tres amigos turkanos: Selim Amado i Dr. Avram Mizrahi en Israel, i Denis Ojalvo en Turkia. En el video esta la entrevista kon sr. Ojalvo en Estambol, i la de Selim kon el korespondiente turko en Israel. Selim eksplika la razon i emportansa de este projekto, i tambien melda algunas poezias. Este video nunka se tenia visto despues de su emision en la TV turka en 2009. Denis Ojalvo keria muncho ke se suviera al Youtube antes de la komemorasion de Selim, i yo me entremeti a demandar al ambasador Tan ke lo demande de la TRT. El ambasador perkuro bastante, ma no reusho (por varias razones politikas!) Finalmente el sr. Ojalvo topo la DVD en su proprio archivo, i kon el ayudo de su amigo Rafael Sadi, jurnalisto korespondiente en Israel de un jurnal elektroniko turko (Odatv), se realizo i esto, djusto el dia de la komemorasion de Selim en la Itahdut! (El link direkto al video es: https://www.youtube.com/watch?v=VgQoN5d9Hos
"Rachel, kurto azelo!"
En el panel yo estava tan emosionada ke me olvidi de dizir la metad de lo ke keria dizir por mi ermano! No se si es ke me olvidi, o ke me akodri de lo ke me avia murmureado el una ves, anyos atras, kuando me alevanti a avlar por el: "Rachel, kurto azelo!" Selim, kon todo su talento, saviduria, i mas, era muy umilde, i no le agradava ke lo alavaran muncho. No se si inchi los 5 minutos ke me avian dado a avlar. Ma, espero ke de ves en kuando aki vo tener okazion de mensionar algunas memorias de mi ermano, i tambien transmeter otras de los amigos ke avlaron en el panel. La saviduria ancha ke partajo, el amor de pas entre personas, famiyas, i nasiones por al kual se dediko azen parte del valutozo legado de Selim. Esto es lo kurto por Selim.
I ke dezir de mi kerida kunyada Katia, kompanyera de vida i amor de Selim? Eya tuvo la mas grande valor del mundo en la estima de mi ermano, i kon eya sus ijos i 8 inyetos tambien. Todo lo bueno ke izo Selim en su vida fue grasias al amor, apoyo, i sostenimiento de Katia! Kreygo ke la plaketa ke la IYT presento a eya reprezenta el apresyamiento de esta realidad.
Selim ke deskanse en paz, vidas largas i buenas a sus keridos, i en okaziones de alegria mos reuneremos de agora endelantre, amen.