Estos tres kalifikativos rezumen i dan a konoser la paz entre el Ejipto i Israel. No keriendo ser pesimisto, devo dizir ke la paz sinyada en el 26 Marso 1979 entre Begin i Sadat kontinuo malgrado las gerras, las revolusyones quarenta anyos i la situasyon aktuala lo prova ke eya kontinuara malgrado la delikatesa de las relasyones entre las sosietades de las dos partes i el komporto negativo de la prensa ejipsiana .
Esperavamos muncho de este akordo sinyado entre Israel i el Ejipto el mas grande payis arabo del Medyo Oriente, ma por razones diferentes esto no fue el kavzo. Las relasyones de puevlo a puevlo kedaron yeladas, la intelijensia ejiptsiana, la prensa i los sendikos, todos unidos detras la lucha de la kavza de los arabos palestinianos se dezovedyeron a la rekonosensia de Israel i de ninguna manera no kijeron achetar su egzistensia. La razon de la matansina de Sadat se entiende bien sovre esta inimista ke kontinuo malgrado la politika pozitiva del governo ejiptiano de Mubarak i de Morsi, el reprezantante de Los Ermanos Musulmanos, inimigos de siempre del estado djudio.
La razon fue simple, el intereso ekonomiko en jeneral i el apoyo ekonomiko del oksidente al Ejipto para ke sovreguarde el akordo de paz. Ma el turizmo, los kontaktos akademikos no fueron nunka dezvelopados. Los ejipsianos permetieron a ke los israelianos vijiten sus payis ma eyos no pudieron vinir por la razon ke eran i son ovligados de demandar una manera de permision para viajar. Ninguna universitad israeliana tiene kontakto kon su kolega ejipsiano; pekado porke el sistema edukativo ejiptiano divulga,espande todo modo de inimista sovre el djudaizmo i el sionizmo. La prensa durante el ramadán no se aresta de gumitar mintiras i dichas falsas sovre los djudios.
Kon la vinida del jeneral Sissi las kozas trokan en partida, por ke el, visto el entereso ekonomiko ke traye la paz entre Israel i su payis sovre todo la ayudo de miliardas de dolares ke los Estados Unidos le dan, kontinua las relasyones amikavles de estado a estado . Kon el akordo sinyado sovre la vendida del gaz israeliano al Ejipto, se pensa ke las relasyones atabafadas del komersyo entre los dos payizes se arrebivran. Este akordo avryo la puerta a un otro akordo echo entre la Jordania i Israel al mizmo sujeto. Bien entendido no es menester de mensyonar el nombre de miliardas de dolares ke entraran en las kashas de Israel en los diez anyos vinideros achakes de estas vendidas..
Ademas el Ejipto visto la kuantitad muy grande de reservas de gaz del Mediteraneo oryantal se izo el líder del Forum ke ajunto a Israel kon la Gresia, el Shipro, la Italia, la Otoridad Palestiniana i el Libano. Ansi se tomaran de los pozos de gaz de la mar kuantitades grandes de gaz ke servirán a los menesteres de la los payizes enumerados i mizmo eksportado a la Evropa a traverso un pipeline o likuefiado en las fabrikas del Ejipto para poder mandarlo kon naves a payizes mas leshanos. Egzistera lo oguramos, una esperansa de paz entre los payizes del deredor del mediteraneo oryental i ke la Turkia i la Siria se ajuntaran un dia a este akordo.
En despartes de esto, Israel kon la sinyatura de pas kon el Ejipto i mas despues kon la Jordania se eskabuyo de las gerras kon los payizes vizinos, porke sin el Ejipto, la nasyon la mas nombroza del mundo arabo , ningunos de los arabos inimigos no tenian i no tienen el koraje de atakar de fronte a Israel. La inimista aktuala kontra Israel se transformo en lucha de terrorizmo organizado en el sud, en la banda de Gaza por el Hamas (emanasyon de los Ermanos Muzulmanos) i en el norte por el Hezbollah (emanasyon shiita kreada por el Iran). Dunke se puede dizir ke Israel deve luchar konta organizasyones terroristas ma no kontra governos arabos. El risko de gerra jeneral desparesyo de la jeografia de la rejion.
A Israel le kaye agora de mirar de reglar el problema palestiniano. Komo, es difisil de propozar solusyones muevas, porke en dando atras el Sinay al Ejipto, el konsepto‘pas konta tierra’ se inkulko en los tinos del mundo politiko i los akordos malorozos de Oslo konfirmaron este fakto, ke no se trokara de vista. No va aver paz sin ke no daremos tierras a los palestinianos. Kualas seran las surprizas ke Trump, el presidente korajozo amigo de Israel, ke acheto Yesushalayim komo kapitala unifiada de Israel i ke el Golan aze parte de muestro payis, son kestyones por las oras sin repuesta.
Los payizes arabos del golfo i los saudianos no asperan ke esta kestyon tope un modo de kompromizo para achetar Israel i rekonoserlo de’ yure’. Las relasyones sekretas ke empesaron dezde un tiempo entre los governos arabos i Israel son bien remarkados ; ma tanto ke la kestyon palestineza no se atakanara los puevlos arabos kedaran siempre inimigos de Israel, dunke difisil de tener relasyones normalas, mizmo yeladas. Ma el solo aspekto favorable a Israel es ke el boykot komersial i sportivo fue alevantado.
En konkluzion dire ke 40 anyos de paz yelada malgrado su negativizmo sirvyo a tener relasyones ofisialas kon el Ejipto, i ke ayudo a una kolaborasion sostenida en kestiyones de intelijensia sekreta, de libre sirkulasyon por ayre i mar. En pasadas en selebrando el aniversario del akordo mos rendimos kuento ke bivimos mas muncho en paz ke de en gerra kon el Ejipto