El reusho a dar una baza mas rezia i serioza a su koleksion, metiendola a la dispozision de institusiones diversas ke son aktivas en el kampo de la dokumentasion de muestra kultura. Su primer akordo fue kon el Muzeo de Arte i Istoria del Djudaizmo, en Paris, al kual se djuntaron mas tadre el CDJC, Sentro de Dokumentasion Djudio Kontemporaneo, en Fransia, i en Israel el Muzeo de la Diaspora (Bet Atefutsot), la Asosiasion Sefarad i la Autoridad Nasionala del Ladino. De esta manera, adjusto el, se aseguro ke todo el lavoro ke izo para krear esta koleksion no desparesera kon el, sino ke puedra ser aprovechada por todos los ke se interesan en esta kestion. Mizmo un examen superficial de la koleksion Enrico Isacco, ke pudimos azer despues ke fue metida a muestra dispozision, ya mos dio una idea muy impresionante de su importansia.
(El bedahem e Karnobat)
Topimos ayi, en efekto, diezenas de fotografias sovre los bedahemes sefaradis en Turkia, Gresia i Bulgaria; de sinagogas en estos tres paizes i otros mas, ansi ke diezenas i mizmo sienes de fotografias de personas diversas ke ilustran muy bien, segun lo dishimos, la vistimienta, los lavoros i mizmo algunos uzos i kostumbres de los sefaradis.
A titolo de ilustrasion estamos trayendo aki una foto de tombas del bedahem de Karnobat ke fueron tomadas en el kuadro de un poyekto para la dokumentasion de los simeterios en Bulgaria, munchos de los kualos kedaron abandonados, despues ke los djudios ke bivian ayi emigraron kaje todos a Israel. En estos bedahemes pueden ser vistas ainda tombas ke datan de sienes de anyos atras, i en las kualas se reflektan aspektos importantes de muestra kultura.
Tambien pueden ser topadas, en esta koleksion, fotografias de kales famozos ke oy ya no existen mas o estan en ruinas, komo el Kal Vidin, en Bulgaria El Kal derrokado de Vidin
Otros enshemplos de lo ke podemos topar en esta koleksion, son las fotografias de personas ke tienen lavoros i ufisios diferentes - komo la de un grupo de hamales djudios en Saloniko, i de otra parte, la de un mediko militar kon uniforma de ofisier de alto grado, el Dr Isak Pasha Hadjes (1840-1903), ke fue shefe mediko de la armada otomana i partisipo en la gerra de la armada otomana.
(Hammales djudios de Saloniko)
(Dr. Isak Pasha Hadjes)
Todos estos no son ke unos kuantos de las diezenas i mizmo sienes de temas sovre los kualos podemos topar, en esta koleksion, fotografias ke pueden darmos una informasion a vezes muncho mas interesante i provechoza ke en livros o artikolos enteros. Ma los enshemplos ke vimos ya bastan, kreo, para konvensermos de la grande importansia de este aspekto de la dokumentasion de muestra istoria i kultura, i del menester de aprovechar esta teknolojia en una mizura muncho mas grande ke asta agora afin de intensifikar i profondizar muncho mas muestro lavoro en este kampo.