Komo deskrivir el sionizmo, esto fue la importante kestyon en el empesijo del ventien siglo, ke el judaizmo mundial biviendo en la diáspora, se demando. En muestra epoka kon la kreasyon del estado djudio en tierra de Israel, esta kestyon se aklara bien entendido diferamente. Kon el tiempo todas las maneras de dar a konoser este movimyento se resume komo el nasyonalizmo djudyo. Ma en realita este nasyonalizmo es bastantemente diferente de los otros movimyentos nasyonalistos del dizmueven siglo porke fue pensado i aplikado diferamente.
El movimyento nasyonalista klasiko es bazado sovre 2 faktores prinsipales, la nasyon i la tierra en la kuala esta nasyon bive. Portanto el sionizmo fue pensado i dezvelopado ahuera de la tierra onde los djudios devian bivir. Durante 2000 anyos de galut los djudyos se dispersaron en los 5 kontinentes i formaron komunidades distinktas las unas de las otras, todo en no alvidadondese el ebreo, lingua de la Tora a la kuala kedaron atados. Eyos avlaron linguas diferentes i asimiláron usanzas diferentes.
La istoria mos ambeza , ke el antisimitizmo i sus malas konsekuensas i mizmo destruktivas de los djudios, los kualos grasias a la Tora asperavan el arivo del mashiah ke viniera a salvarlos de sus sufriensas i ke los ayudo a suportarlas durante siglos,ke es un egzemplo uniko entre las nasyones ansyanas. . Ma malorozamente el mashiah nunka vino i todos los mashiah ke se presentaron delantre el puevlo fueron falsos. El sionizmo dunke se dezvelopo kon la idea de remplasar al mashiah entre los djudios ke se esforsaron a asimilar la kultura oksidentala moderna. Ansina el buto del nasyonalizmo djudio fue de formar un nido para los djudyos en Eretz Yisrael, pensado por los djudios laikos. Fenomeno uniko, en poko tiempo, malgrado sus atadijos biblikos los djudyos relijyozos todo en kedando leal a la venida del mashiah se ajuntaron al movimyento. El gano kon tiempo una fuerza inegualada en el mundo, el fue el instrumento para arekojer los diferentes djudios del mundo en yevandolos a Eterz Yisrael i ansi arebiviento la transformasyon de la nasyon djudia. Oy lo mas de djudios del mundo biven en Israel, i kon la ayuda del sionizmo avlan en ebreo sekular, otro fenómeno kreardo por el ke establesyo los prensipyos de ser una nasyon i tener una tierra i una lingua .
Los istorianos tienen difikultades a definir el sionizmo porke komo lo dishe mas ariva el es diferente del nasyonalizmo del dizmueven siglo .La razon prinsipala es ke el akodra el mesianismo del pueblo djudyo, dunke no se baza solo sovre la idea de un pueblo para una tierra. El kontiene la idea mesianika de la Biblia ,el sonyo utopiko del egzilio i del retorno a la tierra natal de su orijin, eskrito i repetado por los profetas Ebreos. En fakto munchos akademikos deklaran ke los primeros sionistos emplearon la lingua mesianika en sus libros , lavoros i diskorsos para impresionar el puevlo i arezyar la idea de la legitimidad del movimyento. (Sorkin, Between Messianism and Survival, 2004). Sin duvda relijiozos i non relijiozos se ajuntan sovre la inkarnasyon del mesianismo moderno en el sionizmo, munchos de eyos lo ven komo una forma de relijion, malgrado ke el fue strukturado por djudios profanos. . La lingua los ayudo sovre todo para ke el Yishuv (organizasion otonoma djudia) se dezvelope i apareje la fundasyon del estado, malgrado la inimista de los arabos biviendo debasho del kontrol del mandato Inglez.
Sin duvda dainda oy en dia relijizos i non relijiozos se adjuntan a achetar la inkarnasyon del mesianizmo moderno en el sionizmo, munchos de eyos lo ven komo una forma de relijion malgrado ke eya fue strukturado por djudios profanos sin pensar mizmo al mashiah tanto asperado..Es dunke el sionizmo ke reuna a todos los djudios i les da la oportunidad de jugar un rolo en la istoria umana en azyendosen israelianos.