KONSEJIKAS MUEVAS DE DJOHA .

La shans de Djohá

-Djohá i su amigo Bohor se hueron a los Estados Unidos.

En el aeroporto Bohor, okupándose él de las validjas, Djohá se metió a dar tornos para ver lo ke ay.

El ve una mákina kon vitrina yena de bokalikos de Kola, i empesa de vista a meter dinero en eya.

Entremientres Bohor ke eskapó su echo, ke mira? ke Djohá echa sin arrestarse parás a la mákina i arrekoje un alay de bokalikos vazíos.

Korre al lado de él i le pregunta “Ke estás aziendo?” . Bohor no eskapó su palavra ke Djohá le responde de vista “ No te meskles tú. Oy la shans está kon mí.”

Kontado por SELIM SALTI – 2018

Redaktado por MATILDA KOEN-SARANO

LA PSIKIATRIYA SIERVE

-Djohá se va al ospital kon una muy fuerte shushulera. En aparejando sus dokumentos, la resepsionista los meskló kon los de una otra persona i ansina a la fin lo yevan al servisio de psikiatriya .

Pasa 15 diyas, lo mandan a kaza i el amigo Bohor ke vino para yevarlo a kaza le pregunta "Komo se pasó, la shushulera, te se

kalmó ?"

-Djohá le responde: "No kerido, no me pasó enteramente, ma no m'emporta, no do mas metalik si me la ago enriva!!"

Kontado por SELIM SALTI -2018

Redaktado por MATILDA KOEN-SARANO

Todos son los mizmos!

El avión se mete apenas a bolar de Texas, ke el kapitano djudió ( Djohá), después de estarse kayado unos kuantos puntos, sin mirarlo en la kara le dize a su sigundo ke es chinezo:

-“Es la primera vez ke bolamos endjuntos. Sávelo, a mí no me gustan los chinezos”.

-Sovre esto el ofisial le responde “ Oooooh, no te gustan, porké?”

-Le responde Djohá :”Tu puevlo bombardó Pearl Harbur, el porto militar amerikano. Es la razón por la kuala no kero bien a los chinezos.”

-El ofisial :”Nooooo nooooo los chinezos no bombardaron Pearl Harbur” Son los japonezos, no los chinezos.”

-Djohá le responde “Chinezos, Japonezos, Vietnamezos no es importante porké todos se asemejan.”

Después de media ora de silensio, finalmente el ofisial chinezo dize : “No me gustan los djudiós.”

-Djohá le demanda:” No te gustan los djudiós, porké ?”

-El chinezo: “Los djudiós undieron al dip de la mar el Titanik.”

Djoha: “No no es verdá ke los djudiós undieron el Titanik, era un Iceberg”.

I el chinezo:”Iceberg, Goldberg, Indelberg, Greenberg no difera.Todos son los mizmos.”

Kontado por SELIM SALTI – 2018

Redaktado por MATILDA KOEN-SARANO