La egzistensia umana sinko mil anyos i puede ser mas, fue en su mayoriya debasho de la egemonia de imperios. Los mas importantes imperios de la istoria umana son el Egiptiano , el Romano, el Grego de Aleksandro, el Kinezo, el Asiatiko. Al empesijo de la Edad Medya vemos ke se forman muevos imperios ke sovrebivieron fin a la fin de la Primera Gerra Mondial komo el Britaniko, el Espanyol. El Fransez, el Austriako, el Otomano i mas en el Oksidente i en el Medio Oriente.
Se konta ke el sol nunka tramontava tanto era espasyozo el Imperio Britaniko. La istoria mos ambeza .ke en el 20en sieklo despues de la Sigunda Gerra Mondial los ke kedaron eran dos, el imperio amerikano i el sovietiko. Si yo los yamo imperios todo en no siendo formalmente, eyos diktaron al mundo entero durante kaji kuarenta i sinko anyos la politika a segir para pueder guadrar la paz, malgrado los konfliktos rejonales ke no se terminan mizmo oy en diya.
Kon la kayida del komunizmo en Russia i sus payizes satelites el imperio sovietiko disparesio para deshar atrás un muevo establisimiento politiko en Asia Sentral i en la Grande Russia. De fakto el imperio amerikano kedo i dainda keda komo el solo patrón del mundo, malgrado ke la China se aze sintir kada dia mas i mas en el leshano Oriente. Los Amerikanos de los kualos la mayoriya son desendientes de egzilados evropeos tienen en sus konsezyas la mala memorya del despotizmo sea de los reyes sea de los diktatores ke durante sieklos maltrataron a sus antepasados los kualos se fuyeron al muevo mundo para ser liberos, iguales i fraternizar en sus egzistensia demokratikas. Por esta razon este muevo imperio no deve ser inkluido en la kategoriya de los imperios viejos. Los Estados Unidos en esta pozision ,de fakto se izo el bektchi del mundo todo en estando kon la Russia de Putin en relasiones yeladas.
Los dirijentes amerikanos sea del partido republikano komo del partido demokratiko en los ultimos anyos se topan enfrente d’un muevo inimigo de la umanidad ke lo yamamos ‘el Islam politiko-relijiozo’ ke no permete en las tierras en las kualas los musulmanos biven a ke ayga pas , progreso kultural i demokrasia. Bien entendido ay eksepsiones ma son pokas i apartadas.
La fasha ke empesa del Afganistan, sovre el Pakistan, el Iran, los payizes arabos, i el norte de la Afrika esta en fuego dezde diez anyos i los konfliktos sunitos shiitos kontinuan sin arestarsen. En esta fasha se topa un tresoro de karvon likido ,el neft ke todo el mundo nesesita de merkar i por esto la zona es muy importante i kovdisada. Los Estados Unidos se sienten los bektchis de la zona i miran no solo de kontrolar el trafiko del neft ma a ke los payizes de la zona malgrado ke son dirijidos por despotes ke son leshos de kerer asimilar la demokrasia i la libertad de sus puevlos no se peleyen entre eyos a la manera trivolia .
Eske reushe? No lo pensó. Las inimistades kontinuan entre eyos i no están para kalmarse en serka tiempo. Esta situasyon pusha a ke los Arabos, Iranianos, Afganos , Pakistanos miran de armarse kon armas de gerra moderna i de tener mizmo la bomba atomika, lo ke es el kavzo aktual del Iran, governado kon una mano de fierro por los mollas. Si eyos posederan un dia esta arma, sus inimigos los arabos sunnitos miraran de tenerla igualmente. Koza ke la administrasion amerikana aktual no permetera avsolutamente. El sujeto krea un grande konflikto diplomatiko al seno de las nasiones i todos los akordos de ploriferasyon ke azeran a mi avizo son vanos. El Iran de los mollas es inimigo de los Estados Unidos, de Israel i de los arabos sunnitos. Los mollas i sus akolitos rogan en sus orasiones para la destruksion de Israel i de los Estados Unidos. Perkuran kon el ayudo de sus’ proksi ‘ Hezbollah i Hamas de atakar Israel kada ves ke tienen la oportunidad. Ademas organizan kolpos terroristos en los payizes sunnitos arabos vizinos,en Evropa i mismo en la Amerika del sud.
No mos olvidaremos ke despues de la Gerra del Golfo el Iran a traverso su ayudo a los trivos shiites del Irak miro de akapararlo i poner una administrasion shiita al poder del payis. El prezidente amerikano Bush supo al ultimo momento empedir esta aksion i salvar el Irak de ser arrevatado. Mizma situasion se ve dezde tres anyos en el Yemen i la Arabia Saudita kon el apoyo amerikano mira de luchar para salvarlo.
El prezidente Donald Trump sovre la opinyon de la kaye araba sunita es para eya el mijor prezidente amerikano de los ultimos vente anyos. Trump i su ekipo aktualmente son los ke konosen i entienden mijor de las administrasiones pasadas lo ke se pasa en el Medio Oriente, i ven en eyos un real amigo ke los guadrara del perikolo iraniano. Mizma opinión de konfiensa egziste en Israel, ke para este payis chiko el apoyo de los Estados Unidos es kapital.
Esto mos da a entender porke Bibi Natanyahu i el prens Salman empesaron a frekuentarse. La inimista del Iran sovre Israel i la Arabia Saudita i el komporto de los Estados Unidos para mirar de reglar kon urjensia la menasa iraniana en el Medio Oriente aserko los payizes arabos de Israel, por ke el inimigo komun menasa a todos en mizmo tiempo.
El embargo amerikano sovre el Iran si dara frutos malgrado las manovras diplomatiko-ekonomikas de una Evropa en dezunyon , se aspera ke el puevlo Iraniano entiendá en ke entrompesos los mollas los mete i mirara en serka de eskabuyirse de eyos. No puedemos ser muy siguros de esta kokluzion ma malgrado todo la esperamos. Una vez mas el imperio amerikano, si se puede yamar imperio djugara ansi su rolo de líder mundial.