Los ke se estan okupando de jenealojia sefaradi estan deskuvriendo, ultimamente, munchas kuriozidades inesperadas. Aki vamos mensionar algunas, ke al mizmo tiempo amostran la grande diversita de las alkunyas djudeo-espanyolas.
En Israel es konosida desde munchos anyos, i muy estimada, la alkunya de Abulafia. Fue traida de Sefarad, probablamente por los desendientes del famozo ministro de finansas del rey Pedro el Primo, Samuel Levi Abulafia, ke fraguo en Toledo una manyifika sinagoga, konosida aktualmente komo la sinagoga del Transito i Muzeo Sefaradi de Toledo.
Esta alkunya ke ya existia ainda antes del siglo XIV sinyifika en arabo "el padre de la medikeria". No es solo en muestros dias ke ay munchos doktores djidios; esta fue una profesion muy kultivada por muestro puevlo en todos los paizes. Esto eksplika porke tenemos, en desparte de Abulafia, munchas alkunyas ke keren dezir "kurador de hazinos". En Espanya mizmo uvo Alfakim o Hakim i Altabib. La aslkunya Alfakim existia asta ultimamente en Kavala, Gresia. Akodraremos en pasando ke alguna mujer ke estudio esta sensia dio probablemente lugar a la alkunya de Fakima, ke se uzava en Turkia asta el empesijo del siglo 20.
En kuanto a Altabib, kon los anyos i las prononsiasiones lokalasesta alkunya se transformo en Altabef, Altabev i Altabe. Se topa prinsipalmente en Chanakkale i otras sivdades de Turkia. En la Italia, un korelijionario desendiente de Don Isaac Abravanel, ke era tambien mediko, troko su alkunya en "Del Medigo". Sien anyos despues vemos en la izla de Kreta, un savio komentarista de la Biblia kon el mizmo nombre. El istoriano Mihael Molho, de bendicha memoria, kopio en Selanik la "masava" de un sinyor ke se yamava "Dotor". Posivlamente era un trezlado de la alkunya ebrea "Rofe", muy popular en kada epoka i en todas muestras komunidades.
En Estados Unidos, ay munchos ashkenazim ke se yaman Brown, ma aunke es difisil de kreerlo, el primero de todos fue un sefaradi. Komo es posible esto? Avresh de saver ke al siglo XVII fuyeron de la Inkizision del Brasil un grupo de sefaradis ke desbarkaron en la Mueva Amsterdam, la aktuala New York. Entre eyos avia uno ke tenia la alkunya Pardo. En espanyol este biervo kere dizir "kolor kafe", o sea brown en inglez. No savemos por ke razon, este sinyor desido de amerikanizar su alkunya i se izo yamar Brown. Esto no se iva a saver nunka, si el eminente rabino David de Sola Pool, de bendicha memoria, no avia estudiado las piedras del antiguo Bet Ahayim de New York, komparandolas kon los viejos rejistros i dokumentos de la keila, i ansi salio todo en medio. Se pudo ver ke el ke estava enterrado kon el nombre de Brown, avia nasido komo Pardo.
Algunos de los djudios ekspulsados de Espanya arivaron tambien a la Siria. Los djidios de ayi avlavan arabo desde munchas jenerasiones. Los muevos venidos tuvieron ke embezar esta lengua i munchos de eyos arabizaron sus alkunyas, komo p.e. Blanco ke se konvertio en Abiad. Ma una famiya Abiad ke en el siglo 20 emigro de Siria a la Arjentina, torno a la alkunya Blanco. Es ansina komo se repeta la istoria. Ma en Damasco uvo tambien algunos sefaradis ke mantuvieron sus alkunyas espanyoles, por enshemplo, Alegria, Romano, Silvera i otras.
Una famiya ke se fue a las Amerikas de Izmir, es la de Umano, una alkunya ke no se konose en la komunidad djudia de esta sivdad. En el livro de telefono de New York ay komo media dozena de famiyas kon esta aalkunya, ma la mas parte son ashkenazim. En la Rusia sus nonos eran Umansky, i en Amerika trokaron sus alkunya a Umano. Solo una persona rekomosio ser sefaradi, desendiente de un djudio de Saloniko kon alkunya Mano, ke emigro a Amerika anyos atras. En la eskola onde fue a estudiar su ijo, el maestro disho ke la alkunya Mano no le esta plaziendo; este miembro del kuerpo ke aze kozas buenas i malas, algunas limpias i otras suzias, no konviene komo alkunya. Le adjusto una "U" al empesijo, transformandola en Umano. I ansina nasio una mueva alkunya.
Munchosde los djudios ekspulsados de Sefarad ke se aresentaron en Afrika del Norte, konservaron sus alkunyas espanyolas. En Israel ay miles de olim ke yegaron de Maroko i tienen alkunyas komo Bensinyor, Toledano, Valensi, etc. ke topamos tambien entre los djudios de Balkanes; ma ay munchos kon alkunyas no tan konosidas, komo Abergel, Anahory, Gabizon, Marsiano, Teruel i mas. I ay tambien munchos ke tienen nombres arabos o berberes., komo Alfasi, Djerbi, Shitrit, Tandjir, i mas. Ma lo ke ninguno puedia imajinarse es ke ay alkunyas djudias arabizadas ke son yevadas por muzulmanos, por enshemplo Torres, Shentuf (de Shemtov), Bensalom, Kouhen (de Kohen) i mas. Es posible ke sean desendientes de djudios konvertidos al Islam.
Finalmente se prezentan alkunyas difisiles de lokalizar, saver de onde vienen. Algunos Bessanchis, por exemplo, kreen ke sus avuelos moravan en la sivdad franseza Besançon. Ma es un yerro. Si meldamos el nombre tal i kual se eskrivio sienes de anyos en Rashi, topamos Ben Sanchi, en dos palavras. "Ben" es naturalmente "ijo"; djuntos kon Sanchi, la alkunya kere dizir ijo de Sancho, nombre muy komun en Espanya.
Aparte de sorprezas komo estas, la bushkida de muestras alkunyas ayuda a salvarlas del ulvido. Malorozamente mos vamos apokando los sefaradis i muestras alkunyas se van modifikando o desparesiendo en Israel, en Evropa Oksidental i en la Amerika ingleza i latina. Ay entonses ke azer todo lo posible para salvar del ulvido otro de los valores de muestra kultura.