Eminente investigador
de las komunidades djudias de Espanya i
la Inkizision
El Prof. Haim Beinart, uno de los mas importantes investigadores del djudaizmo sefaradi en la Edad Media, nasio en 1917 en la sivdad de Paskov, en Rusia. En 1937, despues de aver terminado sus estudios en el liseo ebreo de Riga, el izo aliya a Erets Israel i kontinuo sus estudios en la Universidad Ebrea, en Yerushalayim.
El djoven Haim Beinart se djunto a los rangos de la organizasion “Etsel” i fue el enkargado de los servisios de informasion de esta organizasion en Yerushalayim. En el 8 de Enero 1945, en el kamino a su kaza, fue arrevatado por tres ombres, yevado kon otomobil a Emek Yizrael i investigado sovre los depozitos de armas del Etsel en Yerushalayim ansi ke sovre el adreso de la kaza de Menahem Begin. El respondio diziendo ke ya avia demisionado del Etsel un anyo atras i ke no tenia mas dinguna informasion a este sujeto. Tres semanas despues el fue liberado.
En 1955 el prezento su teza de doktorado al mas eminente investigador en el kampo del djudaizmo sefaradi en la Edad Media, Profesor Yitshak Baer, de la Universidad Ebrea en Yerushalayim, sovre “Los djuzgos de la Inkizision en Toledo kontra los djudaizantes, en la epoka de la ekspulsion.”
En sus investigasiones Beinart inkluyo las aktividades de los tribunales de la Inkizision en Cordoba,i en Toledo ande bivieron unos 6000 djudios asta sus konversion al kristianismo verso la fin del siglo XIV, en las Izlas Canarias i Extremadura, ansi ke otras sivdades i kazales mas. El izo grandes esforsos para revelar la erensia ke desharon sus korelijionarios medievales i las difikultades ke enfrentaron para mantener sus relijion.
“La importansia de la literatura djudia i del lavoro ke fue echo en la Eskola de Traduktores de Toledo, tradusiendo livros de autores arabos en primero en latin i despues al romanse espanyol; la kontribusion de los djudios al komersio i el rolo ke kumplieron komo rekavdadores de dasios son las trasas mas apresiables de la prezensia djudia en Espanya” avia dicho durante una entrevista.
El fue uno de los prinsipales i mas apresiados eskritores de la Ansiklopedia Biblika; de la Ansiklopedia Judaica en inglez i de la Ansiklopedia ‘Hebrea. Fue el inisiador de la seria de livros Hispanica, en el kuadro de la kuala fueron publikados unos volumes sovre la vida i la istoria de los djudios en la Peninsula Iberika.
El Prof. Haim Bienart resivio premios i onores en Israel i en diversos paizes del mundo, entre eyos el Premio al nombre Yitshak Ben Tsvi, en 1987; Premio de las Tres Kulturas, Espanya 1986; Titolo de Doctor ‘Honoris Causa de la Universidad Complutense de Madrid en 1989; Premio Israel i el Premio Rotschild en 2004. El fue miembro de la Akademia Nasionala de Sensias i en 1986 fue elijido komo miembro de la Asosiasion Amerikana de Estudios Medievales, en Wolfson College; miembro del Instituto para Estudios Adelantados en la Universidad de Princeton; miembro Onorario del Instituto Arias Montano en Madrid i reprezentante en Yerushalayim del Konsejo Supremo para Sensias, de Espanya. Entre los anyos 1969-1973 kumplio el posto de Dekano de la Fakultad de Umanidades i Sensias Sosiales en la Universidad Ben Gurion, en el Negev, ke fue uno de sus fondadores.
El Prof. Haim Beinart eskrivio munchos livros, de entre los kualos mensionamos aki los prinsipales de entre eyos:
Girush Sefarad (La Ekspulsion de Espanya)
Konversos en djuzgo : La Inkizision en Ciudad Real (ke fue trezladado al inglez)
Trujillo – a Jewish community in Extremadura on the Eve of the Expulsion from Spain
(Trujillo – una Komunidad Djudia en Extremadura a la Vilya de la Ekspulsion de Espanya)
4 Hayishuv ‘Hayehudi ‘Hahadash be Sefarad (El Muevo Aresentamiento Djudio en Espanya
Moreshset Sefarad (La Erensia Sefaradi)
El murio el 16 de Fevrero 2010, a la edad de 93 anyos.