Las yaves ke algunos sefaradis puedrian ainda tener, de las kazas onde moravan sus antepasados, asta sus ekspulsion de Espanya, son un tema ke aparese frekuentemente en konversasiones i publikasiones en Espanya, i al deredor del kual ay toda una polemika, entre personas ke kreen ke estas yaves existen i los ke niegan esta posibilidad kategorikamente.
Mi primer enkontro kon este tema fue en un kongreso ke tuvo lugar en Zamora en 1981, sovre “La Espanya olvidada – los Judios”. El logo ke avia sido aprontado para este kongreso i se topava en el poster i el foyeto kon el programa, konsistia djustamente en una ermoza i grande yave ke simbolizava, sigun los ke organizaron este kongreso, el atadijo entre Espanya i los desendientes de los djudios ekspuksados en 1492.
Ay otra imajen de yaves ke simbolizan eyas tambien este atadijo entre Espanya i los djudios. Son las yaves kon las palavras “Dios avrira – Rey entrara”, ke fueron entregadas por los djudios de Sevilla al rey Fernando VI, en la seremonia kon la kuala fue resivido, siglos atra, a su entrada a esta sivdad ke avia konkistado de los arabos.
Es klaro entonses ke las yaves, komo simbolo del atadijo ke existe entre Espanya i los djudios tienen una larga istoria, ma las yaves de las kualas tratamos agora son atadas a sirkonstansias muy diferentes. Se trata de las yaves de las kazas ke los djudios duvieron abandonar, al ser ekspulsados de Espanya en 1492. Es posible ke eyos guadraron estas yaves, o a lo menos algunas de eyas, en la esperansa ke el Edikto de Ekspulsion sera anulado i ke entonses podran tornar a sus kazas; I kuando esto no akontesio, eyas fueron pasadas de una jenerasion a la otra, kaje asta muestros dias?
Ay ken pensa ke si, i ay tambien munchos ke rempushan esta kreensia komo un simple mito ke tiene sus rayizes en la pura fantazia, sin ninguna prova konkreta. Ma, malgrado esto, el tema de estas yaves es una kestion ke kontinua a interesar muncha djente i es solevantada, kon bastante frekuensia, entre otras en munchas entrevistas ke me fueron echas ansi ke en konversasiones ke tuvi kon amigos espanyoles.
Avlando frankamente devo dizir ke en mi kaza no teniamos ninguna yave antigua, i onde mis parientes i amigos tambien no vidi nunka una yave semejante; ma la kestion no es si yo peronsalmente vidi o no una de estas yaves. Lo importante es de saver si ay personas ke las vieron o ke tienen provas konkretas de sus existensia.
A lo ke yo sepa no fue echo ningun estudio, dokumentado kon provas seriozas, ke permeta de dar una repuesta klara i objektiva a este sujeto.
De mi punto de vista, mas ke una realidad istorika, ke de toda manera no pudo ser provada, estas yaves son un simbolo de los atadijos ke atan los sefaradis de muestros dias a la tierra onde bivieron sus antepasados; atadijo ke una de sus mijores ekspresiones es tambien la lengua ke avlamos los sefaradis: el ladino, o djudezmo, djudeoesoanyol o sefaradi segun es tambien yamado. Una lengua ke sin ser exaktamente el kastiliano puede ser entendida por los espanyoles, i es rekonosida oy komo la lengua ke los sefaradis krearon, en los paizes onde se aresentaron despues de sus ekspulsion, en baza de las lenguas ke avlavan en Espanya antes del 1492.
Esta lengua es la ke mos permete, a los sefaradis ladinoavlantes, de sentirmos “en muestra propia kaza” kada vez ke vijitamos en Espanya; de komunikarmos kon los espanyoles i estableser relasiones de amistad bazadas sovre los rekuerdos de un pasado komun, i esto malgrado ke no estudyimos el espanyol de manera formala, en una eskola, sino ke lo ke savemos es la lengua ke oyimos en kaza de muestros padres i madres.
Esta es tambien una lengua ke sorprende muy agradablamente, i a vezes kavza una fuerte emosion, a los espayoles i latinoamerikanos ke vijitan en la rejion i ven en sopito ke pueden entender i darsen a entender kon sefaradis ke enkontran en Estambol, Sofia o Saloniko i aun mas i mas en Israel, onde bive oy la mayoria de los sefaradis ladinoavlantes.
Esta lengua, ke es komo un ponte ke permete el entendimiento i la amistad entre espanyoles i sefaradis, es a mi opinion la verdadera yave ke muestros padres i madres yevaron kon si, a sus salir de Espanya en 1492. Una yave, no para avrir las kazas ke eyos desharon, en Toledo o Gerona o kualker otra sivdad de Espanya, sino ke una yave ke mos avre el korason de los espanyoles ke mos oyen avlar en esta lengua.
4490