En uno de los numerozos livros del istoriador Prof. Avraam Galante sovre el djudaizmo de Turkia, "Turkler ve Yahudiler " ,se topa, entre munchos otros, un artikolo dedikado a los djudios ke fueron persigidos en Anatolia por los kristianos i ke en fin de kuento munchos de entre eyos duvieron konvertirsen al kristianismo para salvar sus vidas.
Aki, algunas trasas de los uzos i kustumbres de akeyos djudios konversos, ke pasaron de jenerasion en jenerasion, i fueron uzadas asta diezenas de anyos atras i puede ser ke son uzadas, en siertos lugaresasta oy dia.
Siglos atras, en el Oriente Medio el nombre"kristiano" era dado, jeneralmente, a los gregos o ermenis, mientres ke los kristianos orijinarios de Evropa eran konosidos komo"frankos"
Los djudios konversos de los kualos trataremos en este arikolo, son akeyos ke bivieron, en sus mayoria, al seno de komunidades gregas o ermenias adoptando los elementos relijozos de estas komunidades.
Djudios konversos basho la enfluensa grega
Segun un lavoro de Acta S. Thedoti, en el sinken siglo de muestra era, munchos de los djudios ke bivian en la sivdad de Ankara avian akseptado la konversion al kristianismo durante la dominasion del Imperio Romano.
En Karaman, sivdad en el Sud de Turkia, ke azia parte de la Antigua Silicia, se enkontran nombres komo Avram, Isac, Yaakov, Shimon, Refael i mas.. i nombres de mujeres djudias komo Rahil, Rebeka, Lea, Hana i otros mas. Estos nombres eran komunes tambien al seno de los gregos, orijinarios de Karaman i Nigde, ke bivian en Estambol.
Djudios konversos basho la enfluensa ermenia
En tanto ke profesor de Istoria de los puevlos antiguos en el Oriente, Avraam Galante se avia enkontrado kon el Sr. Toros Israilian, profesor de istoria de orijin ermenia, ke le ayudo en sus investigasiones. El konto ke konosia una sekta ermenia ke sus miembros puedian ser rekonosidos por sus fizionomia, avlando erminesko i profesando elkristianimo, ma ke tenian algunos uzos ke no eran konosidos por los ermenis. Por exemplo, en kavzo de muerte eyos vaziavan las aguas ke avia en kaza i no lavoravan durante siete dias de dolio. Segun ya lo savemos este uzo se topa entre los kustumbres de dolio de los djudios tambien.
Entre las mujeres ermenias de orijin djudia, munchas son las ke no komen karne de puerko; otras observan el repozo de dia Shabaten siertas semanas del anyo; ay los ke preferan kazarsen kon miembros dela mizma sekta afin de kontinuar i mantener los uzos i kustumbres. Entre estos djudios/ermenis munchos son los ke beven vino produsido solamente por los miembros de sus sekta, o sea vino “kasher”, en terminos de muestros dias.
El Prof. Israilian, ke su nombre indika sus rayizes tambien, adjusto ke estos uzos i kustumbres no son konosidos al seno de los ermenis en jeneral sino ke observados solo por famiyas de djudios konvertidos, ke kedaron fideles a sus tradision.
I aki unos kuantos uzos i kustumbres mas de estos ermenis, ke asemejan a uzos de los djudios:
Munchos de entre eyos no se kazan entre las fiestas de Pesah i Shavuot; demanyana no avlan kon dinguno sin lavarsen la kara; en las iglezias ermeniasno ay instrumentos muzikales komo org, por exemplo; kuando un ermeni se suisida lo enterran afuera del simeterio; kuando una novia se desparte de su madre i padre para ir a bivir en la kaza de su marido le echan moneda para buen mazal.
El Prof. Halladjian, ke fue direktor de la eskola ermenia en Kinaliada, en Estambol, avia kontado al Prof. Galante ke su madre tenia el uzo de estar en piez i restiar una orasion kuando aparesia la luna mueva, komo en la “Birkat Halevana" (La bendision de la Luna) de los djudios. Kuando mensionan el deluvio (mabul), los ermenis tienen el uzo de azer bolar alientro de la iglezia una palomba blanka, ke simboliza la palomba de la Biblia.
Los ermenis en jeneral, konsideran a los ermenis de la sivdad Van, al Este de Turkia, komo desenddientes de djudios por sus kalidades: tienen grandeza i son muy orgoliozos, kaprichiozos i independientes en sus echos.
Segun una tradision, el biervo "Amelek" seria una palavra ermenia si mos bazamos sovre alkunyas komo Melik o Melikyan.
Una lejenda djudia konta ke en el pasado muy leshano los ermenis pasavan la noche de Purim en la oskuridad para konmemorar la trajika fin de Aman ke era konsiderado ermeni.