EL LUGAR DE LAS MUJERES
EN EL MUNDO DE LOS ANUSIM
Los aunisim (los konversos) de Espanya i Portugal son un ramo muy importante en el djudaizmo i son un exemplo ekstraordinario del rolo de la mujer en el mantenimiento de las tradisiones al seno de la famiya i mizmo al seno de grupos de anusim ke yegaron asta muestros dias, komo por exemplo los anusim de Belmonte en Portugal ke tornaron al djudaizmo.
Ya savemos ke una grande parte de los djudios de Espanya ke avian refuzado de konvertirsen al kristianizmo avian pasado a Portugal, pagando una sierta suma de moneda por persona i tambien reisiviendo la prometa ke eyos podran bivir komo djudios en sus muevo paiz i ke podran salir de ayi kon naves ke yegaran de Lisbon. Ma la realidad fue muy diferente: dinguna nave no los asperava en el porto segun les fue prometido por los portugezes, i eyos fueron ovligados a konvertirsen al kristianizmo komo la unika solusion para kedar en vida i no ser kemados bivos.
Aun kon esto munchos fueron los ke kontinuaron, a mentener en sekreto, la relijion djudia i realizer las mitsvot, los preseptos de la Tora segun manda el Dio. Eyos metieron sus alma en la palma, saviendo ke si serian aferrados por la Inkizision, kuala seria sus fin.
Siendo ke era defendido estriktamente, de tener en sus poder livros de relijion, sifrei Tora, o todo otro objeto ke los daria en mano, todos estos simbolos djudios avian desparesido a lo largo de los anyos. Las sinagogas ke eran el lugar de enkontro de estos djudios fueron serradas una detras de la otra i remplasadas por
chikas kamaretas. Los lideres de la komunidad abandoran avagar avagar sus postos i de mizmo ke el rijimiento de la famiya,i el mantenimiento de la relijion paso en manos de las mujeres. Eyas kontinuaron a mantener el kashrut en el gizado, kon grande akavidamiento, se okuparon de la shehita, i ambezaron a sus ijas a ser komadres. Siendo ke ya no tenian mas en sus poder livros de ley, eyas resitavan las orasiones de kavesa.
En siertos kavzos, las tefilot ke eran resitadas oralmente, fueron eskritas por estas mujeres en defteres (kuadernos) ke fueron topados anyos despues en Brazil.
Justa Mendez es un buen exemplo del koraje i devosion ke tuvieron estas mujeres, ke malgrado las amenazas i los peligros de la Inkizision kontinuaron a mantener los preseptos de la ley djudia sekretamente.
Justa Mendez, yamada tambien “Justa la Ermoza”, nasio en 1576 en Sevilla. Kuatro anyos mas tadre, eya djuntos kon su padre i madre i un grupo de 100 personas, entre eyos, kritpdjudios, marranos i djudios sekretos, pasaron a bivir a Mexico. Justa ke era muy estimada por su ermozura, era yamada tambien “Justa la Ermoza”.
En 1595, a la edad de 18 anyos, Justa Mendez fue arestada por las guardias de la Inkizision, djuntos kon su madre Clara Enriquez i su tia Beatriz Enriquez de la Paiba. Eyas fueron djuzgadas komo djudaizantes por aver observado sekretamente le Ley de Moshe. Eys fue liberada de prezo en el 8 de Disiembre 1596.
Despues de aver kumplido su pena eya se kazo kon Francisco Nunez , eduko a sus ijos komo djudios i ayudo a djudios ke fueron
aprezados por el Santo Oficio, embiandoles informasion de komo rijirsen en la prizion i de komo responder kuando seran interrogados por inkizitores.
En 1644 eya eskontro una hazinura ke no fue identifikada, teniendo grandes difikultades a avlar. En su kama de muerte, un vizino kristiano vino a su kaza, i por la fuersa kijo meterle una kruz entre sus manos. Kon lo poko de fuersa ke tenia eya lo arondjo, abolto su kara a la pared i dio su ultimo reflo.
Un otro exemplo a la devosion de la mujer sefaradi es el de Juana Enriquez, eya tambien de Mexico, ke fue djuzgada komo kripto djudia i por aver ayudado a otros a mantener sus fe.
De mizmo ke los djudios de Espanya ke avian sido ekspulsados, en 1492, los djudios de Portugal tambien, ke fueron ekspulsados de este paiz sinko anyos mas tadre, se yevandosen kon si sus rika kultura, sus lengua, uzos i kustumbres i un riko folklor. Eyos kontinuaron a mantener este patrimonio en los paizes en los kualos se aresentaron. No ay duda ke esto es devido, en una muy grande mizura, a las mujeres, ke se okuparon de la edukasion de la famiya i transmetieron oralmente, de una jenerasion a la otra, las tradisiones atadas a las fiestas komo Rosh Ashana, Kipur, Pesah i otras mas ansi ke de komo guadrar el Shabat i de ke manera rijirsen en todos los kampos del siklo de la vida: boda, paridura, muerte i dolio.