La asosiasyon de los Turkanos en Israel (Itahdut Yotsei Turkia) enpasadas, organizo en la sivdad de Raanana, lugar muy en vog de los olim de Turkia, un konserto de kantikas en ladino ke aze partida de las aktividades kulturales importantes de esta istitusyon renomada en Israel. El konserto inkluo diferentes ceneros de muzika djudeo-espanyola i fue una okazyon de sintir todas sus variantes en la mizma tadrada en 3 diferentes prezantasyones. El konserto duro kaji dos oras i media en la sala del Sentro de Musika de la munisipalidad de Ranaana, kompletamente yena. Mizmo ke topar lugar para toda la djentambre fue difisil mas de trezyentas personas pasaron una tadrada maraviyoza kon la prezensya de los dirijentes de la asosiasyon i de la munisipalidad de la sivdad.
En la primera partida, Yosi Cozi Geron i Suzi Uziel kantaron en solo i enjuntos en forma de duet kantikas klasikas en muestra lingua, alegres i tristas, kon la partisipasyon de la sala, ke no manko su aplozo grande. Los mansevos presentes de sintir sus abuelos kantar en mizmo tiempo de los kantadores se enkantaron de ver la atmosfera.
En la sigunda partida Sara i David Kohen Yanarocak ke forman el grupo Erensya Sefaradi, kantaron kantikas diferentes, especialmente kantikas ke fueron eskritas por Yusuf Altintas, amigo personal de muncho tiempo, ombre de valor, sekretaryo del Grand Rabino de Turkia. Es ansina ke presentaron un repertuar enteramente muevo i moderno, donde la musika fue kompozada por David i kantada por Sara. El kuple fue akompanyado kon su violon por una ole hadasha ukranyana, la sinyora Maria en solidaridad de la apartenensya al mizmo ulpan de los Yanarocak. Miraklo de la muzika, sin konoser ebreo o una otra lingua komuna, estas personas se dieron a entender muy bueno. Verso la fin de sus program Soni Yanarocak el ijo grande de la famiya se ajunto a su madre i ansina kantaron madre i ijo dos kantikas ‘Kuando esto en tus brasos’ i una kantika de Canakkale ‘La eskala de Maydos’,aplozada kaji en pyes. Ke ermozo de ver ke un miembro de la jenerasyon mueva se enteresa a esta kultura i amostra ke eya no va despareser nunka.
En la dalkavo partida del konserto oyimos al grupo de 12 kantadores , ombres i mujeres, onde Soni Yanarocak aze parte, el koro yamado Kolot Hamoshava . Koro amator de valor, ke fue eskojido para las festividades del 69 aniversaryo del estado de Israel. Eyos mos kantaron kantikas de ‘Kamino’ i mos enkantaron kon sus bozes i melodías. Al final los participantes todos enjuntos mos kantaron la kantika famosa “adiyo”. Felisitasyones fueron dadas a los nuevos dirijentes de la Itahdut ,en partikular al prezidente Ovi Gulersen por sus kapachitades de organizar este modo de mega fiestas.
POR KANTIKAS:Turk Israel
