Primo Levi ( nasyo en Torino, el, 31 de julio de 1919 – i murio en Torino el 11 de avril de 1987) fue un eskritor Italiano de orijen Judio sefaradí, autor de memorias, historias, poemas y novelas. Fue un rezistente antifashista, y sovrebiviente del Holocausto.
Es konosido sovre todo por las ovras ke dedikó a dar testimonio sovre el Holokosto, partikularmente de los diez mezes que estuvo przionero en el kampo de konsentrasión de Monowice (Monowitz), subalterno del de Auschwitz..
Primo Levi no fue solamente un sovrebiviente del Holokosto o « el grande eskritor del Holokosto », el fue un humanisto ke insistio sovre la justisya, uno ke fue la boz kategorika de toda persona ke se revolta i lucha kontra akeyos ke no kedan de assasinar i matar a inosentes en todas las tierras i las kulturas.
Su ovra Si esto es un hombre es konsiderada como una de las más importantes del siglo XX.
En una entrevista el disho lo sigyente :
« Eskrivi porke senti la nesesidad de eskrivir. Si me demandan a ir mas leshos i deskuvrir kualo es lo ke produse esta nesesidad, no puedo responder. Tuve la sensasion ke para mi el akto de eskrivir era komo echarte en el divan de Freud. Senti una nesesidad irrezistible de kontar kon boz alta lo ke tenia en la kavesa. En estando ayi, en el kampo de konsentrasion kon paredes de kaudrados kolorados, munchas vezes tuve un suenio, en el kual yo boltava a mi kaza, i les kontava lo ke me paso en el kampo, i ningunos no me eskuchavan, komo si lo ke yo kontava no se kreyiyan i empesavan a tornar sus espalda i salir de la kamareta. Les konti este suenio a mis amigos del kampo de konsentrasion, i eyos me disheron ke eyos tanbien tenian en vezes suenios semejantes. Mas tadre lo vide en lo ke eskrivyeron otros ke pasaron los mesmos dias amargos. Kijo dizir ke esto era una situasyon tipika ».
« El cauchemar del suenio lo tenia ayinda en mi interior, Kuando yo empesi a eskrivir sovre la sovreviviensa de Auschwitz no estava seguro ke se podria puvlikar. Keria azer 45 kopias i darselas a mi novia i a mis amigos, solo para ke sepan komo de atrosidades bivimos. Es mas despues ke me vino la intension de deshar un testimonio. Ma mi primera razon era de eskrivir para liberarme, o para milizinarme puede ser».
Primo Levi fue un hombre que entendía la klaridad komo kondisión indispensable para ke lo ke es komplekso se izyera klaro i evidente. Ansi eskrivio : « La palavra, el avlar es el triunfo de la komunikasión sovre el estar kayado, sin dizir nada ». La erensia fundamental de Primo Levi es de avermos dicho que solo en avlando i kontando un ombre se aze de muevo humano, despues de aver traversado este silensiamiento bestial, la kayadez al kual estuvo forsado durante su estar en el kampo de konsentrasión,
“La palavra es el manadero fundamental para entender lo ke seria impensable o inimajinable, ke mezmo si no podemos enteramente entenderlo deve de ser akodrado ». Guillermo Yanco, del Museo de la Shoa en Argentina se referio al aniversario del nasimiento de Primo Levi, « Kuando vemos allegasyones i pretensiones del nazismo ay que pensar i akodrar a Primo Levi i sus escritos”, i izo referensia a la vida de Levi, ke «en su trilojía sovre Auschwitz dize ke komemorar i saver ko ke se paso es un dover de la memoria". Es un dover de saver i akodrar, sovretodo kuando en nuestros diyas no mankan bozes ke niegan la ekzistensia de la trajedia del Holokosto.El más importante de sus últimos lavoros fue su livro final, (Los undidos i los salvados), es una analiza del Holocausto, en el kual Levi ekspliko ke aunke el no odiava i no tenia sentimientos de vengansa por el pueblo Alemán por lo que avia pasado, el no lo aviya perdonado. Levi no era una persona kreyente o relijioza.
Su Djudaizmo el lo eksplka de la manera sigyente (*) : “Esto es para mi una kestion de kultura. Si no ekzistiyan estas leyes rasialas i el kampo de konsentrasyon puede ser ke yo no iva kedar Djudio, o solo por mi alkunya Levi. Ma despues lo ke pasi, el Magen David no esta solo ensima de lo ke visto, ma estampado en mi kuerpo i mi interior, komo markado sovre una plaka de fierro »A la kestion si el kontinua a kreer en Dio, Levi respondio ansi :« Si es ke ay Auschwitz, no puede aver Dio. Ma esto es para mi un dilemma ke no puedo solusionarla. Lo esto bushkando ma no lo ave topado”
Selim Amado31.7.2013(*) Ferdinando Camon, Conversations with Primo Levi, Marlboro,Vt : Marlboro Press, 1989