El konflikto Israel-palestiniano tura dezde mas de 100 anyos. El sivdadino Israeliano el dia de oy se demanda, porke i deke? Vos do unas kuantas razones de esto.
1-La relijion musulmana no permete ke tierra konkistada por los musulmanos sea retornada a los infieles. A este sujeto el dirijente arabo ke achetara de azer konsesiones a Israel, por egzemplo sovre Yerushalayim, será a la primera okazion matado komo fue el kavzo de Sadat en Egipto (Misrayim) malgrado ke el en sinyando un akordo de paz kon Israel resivio atras el Sinay. Un milyardo de musulmanos i espesialmente los relijiozos fondamantalistos a traverso el mundo no perdonaran a ke la mishkita El Aksa i su derredor sea eternelmente debasho la jurisdiksyon de los djudios. El espanto es bastante grande, ni Arafat ni Abas ni el kandidado ke lo remplasara, Mahmud Al-Aloul, tuvieron o tendran el koraje de achetar un semejante kompromizo. La tierra konkistada por el infiel kedara siempre tierra musulmana i un dia u otro, no se puede saver, se deklarara un cihad (konkista) para apatronarse de muevo del lugar pedrido. Es ansina ke nunka avra pas entre el arabo i el israeliano. Esta situasion es valavle para la totalidad de la Palestina inkluendo Israel. En pokas palavras mismo si Israel acheta 99 porsiento de las demandas de los Arabos palestinianos, sus dirijente al poder, dira komo en el pasado un grande NO. Manko de siento porsiento de las egzijensias arabas i el retorno total de la tierra pedrida, no avra paz, lo ke kere dizir la destruksyon pura i semple del estado djudio.
De otra parte diremos si los Estados Unidos kon el ayudo de los evropeos son kapaches de forsar a los arabos palestinianos a achetar d’una manera u otra un akordo sovre el territoryo ke Israel kere detener, el tratado ke sera firmado no tendra dinguna valor a los ojos de los arabos i del mundo musulmano en jeneral, malgrado ke munchos payizes komo el Azerbejian, el Turkmenistan, la Turkiya, el Kazakistan, el Egipto, la Jordania i siertos payizes musulmanos afrikanos rekonosen "de yure" el Estado de Israel.
2-Los arabos palestinianos, achakito mi ermaniko, kitan durante todas las negosiasiones de paz, ke se denombran a mas de 40 vezes fin oy en dia, la huehuenta de los refujiados del 1948 i de sus desendientes. Eyos no son achetados komo sivdadinos en los payizes en los kualos biven i mizmo no les es permitido de lavorar ahuera de los kampos en los kualos son enserrados. Eyos son mas de 4 milyones. Egzijir de aresentarlos en Israel, kere dizir la fin del payis djudio. Israel, la demokrasiya la mas performante del Medyo Oriente se topara en la ovligasyon de rekonoser los mizmos derechos de sus sivdadinos a estos muevos sivdadinos i ansi pedrer demografikamente su identidad.
En este kampo muestros negosiatores metieron sovre la meza dos argumentos. El primer fue, ke kontra la kantidad de arabos egzilados en 1948, Israel resivio si no mas igual kuantidad de refujiados djudios de los payizes arabos. Dunke no ay lugar de resivir mas arabos en Israel. El sigundo fue ke Israel aziendo un esforso, achetara de pagar indemnitades para ke estos refujiados arabos se aresenten en los payizes onde biven aktualmente. Ademas, Israel no reklamara indemnitades por los djudios viniendo de los payizes arabos. Malorozamente fin oy en dia a este sujeto no se topo un akordo .
3- Si los dirijentes arabos realmente dezeavan i dezean la paz, eyos devian de azer munchas kozas para aparejar a ke el puevlo palestino seya konvensido de el bien i de la prosperita ke traerá la paz. Eyos devian i deven de edukar a sus jovenes empesando de sus chikes a no ser teroristos, antisemitos, ni uzar los medios sosyales para boykotar los produktos israelianos, las universitades israelianas i los djudios de la diaspora. Koza kontrarya a la realita. Ademas eyos devian i deven de aretar de pagar milyones de dolares, kaji el 20 porsiento del budjeto de la Administrasion palestiniana a los teroristas enkarselados en las priziones israelianas. De otra parte deven al momento aktual de achetar a Israel komo el payis de los djudios, kondisyon "sine qua non" para ke se realize la paz. Oy se esta viendo ke la administrasion palestiniana de Abbas no esta enteresada a azer la paz kon Israel, visto ke los dirijentes lo ke les enteresa muncho mas es el "status quo" de oy, para pueder rovar mas i inchirsen las aldikeras. No mos alvidaremos ke oy egzisten dos payizes palestinianos, el de Gaza i el de Ramallah. Abbas no es achetado en Gaza, onde los dirijentes de este chiko lugar no rekonosen a la Autoridad palestiniana de Ramallah. Por supuesto aktualmente Israel no save kon ken azer paz, mizmo si esta pronto a azer sakrifisios.
4-No abastan los arabos palestinianos, Israel deve luchar kon los antisemitas evropeos, los kualos del selo inyoran el progreso teknolojiko de muestro payis. Eyos miran por todos los lados de boykotar muestro payis i les importa poko del grande dezeo aktual de azer paz en el Medyo Oriente. Israel es el malo i la Palestina es el bueno Mozotros somos el satan i los arabos palestinianos el mallah(!) . Esta opinión mala no esta para despareser en un tiempo serkano. Ademas las Nasiones Unidas en prinsipio son kontra Israel, no pasa mes ke no tomen una desizion anti israeliana. Faktor ke los Estados Unidos de oy kombaten al lado de Israel, ma ke los resultados no son tanto palpavles.
Kompatiendo kon mi puevlo , karos lektores, me demando de vez en kuando, ke pekado tuvimos de retornar a las tierras de muestros antepasados, porke muestra vida pasara sin konoser las frontieras finales del payís i sin ver la paz. Pasensia…