Eskritoria i poetesa, envestigadora, traduktora i kontadera de kuentos, es ansina ke konosemos a Matilda Koen Sarano, el relampago de muestra kultura. Yo la yamo además Azize (santa en turko) por ke este personaje uniko de muestro tiempo dediko su egzistensia a salvar todos los trezoros de muestra literatura, kustumbres, kuentos, poesías i sovre todo testimonios de la perioda trajika del sieglo pasado durante la sigunda guerra mondiala. Eya no se lo pardono nunka de ke kedo en vida kuando miliones de kreaturas de su edad fueron matadas por el rejimen nazista. Matilda nasio en el 1939 en Milano de famiya djudia de orijin sefarad de Aydin (Turkia) ke fueron eskondidos durante todo el konflikto en las montanias de Italia, por italianos kristianos a sus perikolos de ser matados. La vida dura de su chikes la konta kon tristesa i kuando retorno a su vida normal despues de la guerra, no vijito nunka el lugar onde paso sus anios onde fue eskondida. Anios no le gusto kontar lo ke se paso en su kavesa chika fin ke su padre Alfredo sekretario de la Komunidad Djudia de Milano le demando a ke eskriva a este sujeto para ke deshe testimonios de la sufriensa de los djudios durante la Shoah.
Matilda se engrandesio en Milano estudio ayi i se kazo a la edad de 20 anios kon Aharon Kohen, de bindicha memoria , delegado para la djuventud djudia de akea epoka , ke la konvensio a vinir a bivir a Yerushalayim. Matilda keria estudiar i no kazarse, ma Aharon fue kapache de trayerla a Israel. Dezde de akel tiempo fin oy en dia Matilda izo partida de Yerushalayim . Aki engrandesio su famia ,2 ijas i un ijo, i a la edad de 40 anios se hue a estudiar en la Universidad de Yerushalayim, literatura italiana, folklor i Ladino. Eya lavoro 23 anios komo archivista en el Ministerio del Eksteryor.
La aktividad esensiala de Matilda se topa en el kampo de la konservasion i del arrebivimiento de la lingua, la kultura i el folklor djudeo-espanyol , ke eya veye komo misión de su vida. Kon el ayudo de otra figura muy importante de muestra lingua i su kultura Moshe Shaul, eya prezento dos vezes a la semana el notisiario en djudeo-espanyol en Kol Israel i además tuvo un programa semanal de kuentos i kantes i otros programas sporadikos de diferentes sujetos. En desparte eya ensenyo el Ladino en la Universidad Ben Gurion en el Negev, i dio diversos korsos en Yerushalayim. De otra parte eya ensenyo “el kuento popular djudeo-espanyol” en la Midreshet Amalia, dio korsos de lingua djudia en el Sentro de Muzika i Bayle Klasiko Oriental en Yerushalayim i en la Universidad Popular. Fue uno de los kolaboradores de “Aki Yerushalayim” i de la revista”Los Muestros” en Bruksel. Dezde muncho tiempo eskrive por” eSefarad” i “El Amaneser”. Kontadera de kuentos eya aparesio kon los kantantes komo Betty Klein, Kobi Zarko, Moti Abramov i munchos otros mas. Partisipo a la organizasion i a la prezentasion del Festiladino kada anio dezde su kreasion onde se prezentan kantikas muevas en Ladino. Evenemento mundial muy popular. Desparte de todo eya resivio varios premios por su lavoro i fue onorada a munchas okaziones por el Estado de Israel. Viajo en diferentes países onde se produizo en dando konferensias en el kampo de la difusión de la lingua,la kultura i el folklor djudeo-espanyol.
Entre sus publikasiones nombrozas eskoji los livros ke son importantes para akeyos ke kererian konoser el idioma i si kultura, a saver:
1-Kuentos del folklor de la famia djudia-espanyola
2-Djoha ke dize ¿
3-Vini kantaremos
4-Sefaradis de dor en dor (komedia muzikal-muzika de Hayim Tsur)
5-Kurso de Djudeo-espanyol(Ladino) para prinsipiantes i adelantados 2 volumes
6-Ritmo Antiko
7-Kon bayles i kantes
8-Diksionario Ebreo-Ladino, Ladino-Ebreo.
9-Gizar kon gozo
10-Kuentos del bel para abasho.
Mi amista kon Matilda no es muy vieja, ma solo vos dizere ke dezde 13 anios mos vemos a lo manko una ves al mez en Recanati onde organizamos el Salon de Ladino, idea ke dezvelopimos enjuntos onde se arekojen los Ladino avlantes para oyer konferensias i gostar al gizado sefaradi. Asiguro ke Matilda i yo somos dos amorosos de muestra kultura i somos atados a eya eternalmente.