El Prezidente de la Republika Turka felisito, komo de uzo, la fiesta de Hanuka de los sivdadinos Turkos “de relijion de Moshe”, ma en mezmo tiempo se anulo la ceremonia de encender luzes de Hanuka en Ortakoy, sefun se estava azyendo los últimos anyos por la musnisipalidad de Besiktash.
Por koinsidensia, el primer dia de esta fiesta, el 13 Desiembre 2017 el konvoko a los representantes de los 57 payizes musulmanos del mundo, para protestar la deklarasyon del Presidente Amerikano Donald Trump.
En realidad, Trump esta aplikando la desizyon del kongreso Amerikano del anyo 1995, ke rekonose Yerushalayim komo sivdad kapitala del Estado de Israel. Sus 3 predesesores :Clinton, Bush y Obama no avian implementado esta desizyon pensando a la reaksion de los Arabes.
El fakto ke esto es una desizyon Amerikana, ke fue la afirmasyon de un fakto muy klaro, ke El Estado de Israel deklaro antes 70 anios ke Yerushalayim es su kapitala no abastaron a los Palestinos y payses Islamikos enkavesados por la Turkiya.
El Estado de Israel , bazandose a la historia del puevlo Judio, a la signifikasyon relijiosa y nasyonala de la sivdad de Yerushalayim, la eskojo naturalamente komo kapitala. Ayi se installaron las institusyones governamentales, el parlamento ( la Kneset), la Alta Korte de Justisia, los ministerios, las residensias del Presidente del Estado y de su Primer Ministro.
El Presidente Turko Erdogan, ke estudio en un liseo ke da instruksion relijiosa, i ke no mostra una grande simpatía para el Estado Judio yamado Israel, y ke lo vijito en el anyo 2005 ofisialmente, felisito el Hanuka Judio sin saver lo ke signifika. Ademas, parese ke esta konvensido, ke yamar”Judios” a sus sivdadinos de relijion Judia es pejorativo (¡).
El se olvido una koza muy importante : los “ke kreen en Moshe” en su pays no son mas ke los Judios. Teologos Turkos tanbien akseptan ke los primeros ke dieron el Monotheismo a las otras religiones, y tanbien al Islam son los Judios.
Hanuka es la komemorasyon de una viktoria de los Judios a los Seleucides Gregos(Helenistas). Eyos rekonkistaron Yerushalayim kon su símbolo :El Beit Hamikdash, o el Templo ke fraguo Shlomo, rey de los Judios, ijo de David, ke deklaro Yerushalayim por kapitala del Reynado de Israel antes 3000 anyos. Esto fue la prima guerra ideolojika en la historia, contra la persekusyon paganista Grega, y un sukseso politiko para los Judios.
Esta parte del Mediano Oriente (Yehuda ke fue trokado por los Romanos en Palestina) troko munchas manos. Paganos, Judios, Gregos, Romanos, Memlukes , Kristyanos, Musulmanos, Ottomanos, y Inglezes. Desde el anyo 70, kon la destruksion del Bet Hamikdash en Yerushalayim, ke fueron aronjados los Judios verso otros payses, y todo el tiempo estuvieron rogando por el dia ke van a boltar a Yerushalayim .
En estos 2000 anyos, Kristyanos -por ke Yeshu el Judio nasyo i murió en este pays- fraguaron kilisyas en su memoria y en memoria de su madre- . Los Musulmanos okuparon en el siglo VII Yerushalayim –por ke el profeta Muahammed tuvo el esfuenyo de vinir a la meskita de Aksa ( de la otra punta) y suvir al sielo – .
El nombre Yerushalayim o Kuds no esta mensionado en el Kuran . Kuando el nombre de la sivdad Yerushalayim esta mensionado kuje 700 vezes en la Tora de los Judios.
Los lugares santos según el Islam, La Meskita el Aksa y la Meskita de Omar, komplekso yamado (Haram-u-Sherif), están situados ensima de las ruinas donde se topava el Beit Hamikdash, el monte de Moriah. Lo solo ke kedo y ke se ve es la pared eksteriora del Oueste (Kotel Hamaaravi), onde los Judios fueron permetidos de ir y lamentar la destruksion de sus Templo, el Beit Hamikdash. Los arkeologos lavoran y deskuvren las fundasyones del Templo de Shelomo, lo ke no les plaze a los Musulmanos.
Ke kuriozo, ke el Sultan ke fraguo las paredes de la sivdad, Suleyman el Magnifiko (Kanuni), es el ke rekonosyo la santedad del Kotel Hamaaravi para los Judios , ke siempre nombraron y orientaron sus orasyones verso Yerushalayim.
Los Sultanes ke vinieron después, nunka vijitaron los lugares santos, la Palestina fue una provincia del sud de la Siria, sin importansia grande. puevlada por pokos Judios y munchos Arabos Beduines, kristyanos y akeyos ke vinieron de otros payses Arabos para mijor bivir. Alkunuas komo Al-Masri, Halabi,Al-Mugrabi, Al-Ajami,Al-Shami, etc. mostran de ande vinieron.
La politika y los menesteres del dia son los ke azen avlar a los politikantes de un pays: Por ke Turkiya fue uno de los primeros payses a rekonoser a Israel? Por ke abasho el nivel de sus diplomatos después de la guerra de 6 dias? Por ke en 1990 se restabilisyeron las relasyones al nivel de embasada, por ke el One minute de Davos, porke Mavi Marmara? Todo politika, todo para ganar votos, todo por mostrarse fuerte a los payses musulmanos. No siempre en los interesos del puevlo Turko.
I agora kualo es lo ke disho Trump? Ken es el ke no savia ke Israel es la kapitala de Israel? Lo ke es nuevo es ke los E.U. no rekonosen mas la desizyon de las Nasyones Unidas del 29 Nov.1947, desizyon 181, ke dize ke ElMandato Britaniko de Palestina será divisado entre Judios y Arabos, y ke Yerushalayim será (Corpus Separatum). Esta desizyon resivida kon tanta alegría por los Judios nunka fue respektada por los Palestinianos y el mundo Arabe, la prova es ke kuando Israel deklaro su independensia el 14 Mayo 1948 guerreyaron, y las limites de división trokaron, la parte oksidentala de Yerushalayim fue deklarada kapitala de Israel.
En mostrando los trokamientos de frontieras en esta parte del mundo, el Prezidente Turko se olvido ke todo vino kon las gerras ke impozaron y perdieron los Arabes. Si no guerreaban no iva aver “okupasyon”.
Verdad ke pokos payses avyeron sus embasadas en Yerushalayim, preferaron Tel Aviv asta ke el status final de la sivdad de Yerushalayim seyga rekonosido- kon akuerdo de las dos partidas. Ma este akordo no se esta realizando, y kuando se realizara, por seguro ke la kapitala de Israel va kontinuar a ser Yerushalayim. Trump no disho ke Yarushalayim entero apartiene a Israel, disho Jerusalayim es la kapitala de fakto de Israel, kuala será su forma y limitas en el futuro, esto será desidido por las dos partidas.
En reunyendo la Konferensia Internasyonala de payses Islamikos el 13 Dec. 2017, el Presidente Erdogan se mostro mas royalisto ke el rey ¡, y al lugar de protestar a la Amerika ke tomo esta desizyon, attako de una manera fuerte a Israel. En akuzando a Israel de emplear fuerza desproporsionada contra los manifestantes , se olvido lo ke el izo a los protestadores Turkos del “Gezi” en Mayo 2013. Kuando a las fotos de las “atrosidades” de la armada enfrente de los proves Palestinianos, ay muncha fabrikasyon y photo-shop, todas mal intensionadas..
En esta reunión Islamika, solo 16 personas importantes participaron, los Saudis no partisiparon, y el resto eran solo representantes de os 57 payses. Al final se deklaro la rekonosensia de un Estado Palestiniano futuro y su kapitala será Yerushalayim del Este. Israel no parese muy embarasada de esta desizyon, i la inisyativa Turka por seguro ke no va permeter de tener relasyones Turko-Israelianas según eran antes. Si uvo (altas y bashas) agora estamos en el (dip). Por las oras, los Palestinianos de Gaza (Hamas) y de Yehuda y Shomron se están kontinuando a pelear.
El remedio ke tiene Israel es de kontinuar a ser fuerte, en esperando ke los Palestinos entienderan ke en sus proprio intereso arivar a un kompromiso kon Israel, i abandonar el faktor relijiozo y provokasyones ke no los avansan a nada.
Es tanto de regretar ke el pays ermozo donde vinimos la Turkiya- troko tanto ¡